 Alaksandar Milinkievič |
Biełaruś duža adstaje ad pracesaŭ, jakija iduć u Eŭropie. Na tle intensiŭnaha supracoŭnictva, dyskusij pra pryjarytety i stratehii, u jakich u poŭnaj miery biaruć udzieł takija krainy jak Małdova, Hruzija, Ukraina, Biełaruś padajecca pustym miescam, jakoje nichto nie zaŭvažaje. Takuju dumku vykazaŭ eks‑kandydat u prezydenty Biełarusi Alaksandar Milinkievič u razmovie pra vyniki kanferencyi vysokaha ŭzroŭniu «Bałtyjskija krainy i susiedzkaja palityka Eŭrapiejskaha Źviazu», jakaja prajšła 23 listapada ŭ Ryzie. Biełarusiki palityk braŭ udzieł u mierapryjemstvie na zaprašeńnie premjer‑ministra Łatvii.
«Pieršy raz słova «Biełaruś» prahučała niedzie pad abied. Pra Małdovu, Hruziju, Ukrainu havorycca ŭ kantekście realizacyi prahram supracoŭnictva z Eŭraźviazam, a my jak byccam pustoje miesca», — skazaŭ AFN Milinkievič.
«Moža, heta takoje emacyjnaje ŭspryniaćcie, ale heta naša biada vialikaja»
«Tut možna śmieła kazać, što vinavatyja ŭłady, tamu što ŭsio, što možam rabić my (hramadzkaść), my robim. Ale jość momanty, jakija musić rabić ułada, tamu što pytańnie idzie pra ekanamičnaje supracoŭnictva, pra reformy. I naturalna, heta moža rabić tolki ŭłada. My možam rekamendavać, analizavać, padkazvać, navodzić masty, ale ŭsio‑taki pravodzić u žyćcio ŭsie hetyja rečy toj, chto staić la ŭłady».
Milinkievič vystupiŭ z dakładam, u jakim vykazaŭsia na karyść raŭnapraŭnaha i pavažlivaha dyjalohu miž biełaruskaj hramadzkaściu i ŭładami.
«Vyzvaleńnie ŭsich palitviaźniaŭ i spynieńnie represij — heta pieršy krok, jaki abaviazany zrabić aficyjny Miensk».
Biełaruskuju ŭładu na presavaj kanferencyi pradstaŭlaŭ namieśnik ministra zamiežnych spraŭ Andrej Jeŭdačenka, jaki vystupiŭ z dakładam pra aficyjnaje staŭleńnie ŭładaŭ da dyjalohu z Eŭraźviazam.
«Pradstaŭnikam ułady, jakija tam byli, ščyra kažučy, nie było čaho skazać», — adznačyŭ Alaksandar Milinkievič.
«Nielha paŭtarać, jak heta rabiłasia šmat hadoŭ, što voś davajcie tolki handlavać, ekanamična supracoŭničać, i ni słova nia budziem havaryć pra demakratyju, pra vybary, pra pravy čałavieka».
«Tak nie atrymajecca. A pradstaŭniki aficyjnaj ułady mienavita tak stavili pytańnie. Heta ŭčorašni dzień, siońnia nichto na heta nie reahuje, prosta apuskajuć ruki».
«Važny momant palahaje ŭ tym, što nam prapanoŭvajuć vielmi vyhodnaje supracoŭnictva z adnoj umovaj — heta demakratyja ŭ krainie. Usie, chto supracoŭničaje z EZ, vykonvajuć padobnyja ŭmovy. Heta ž nia jość pretenzii kankretna da nas».
«Nichto nie patrabuje, kab demakratyzaccyja adbyłasia za adzin dzień. Usie kažuć pra pakrokavaje zbližeńnie bakoŭ», — nahadaŭ Milinkievič.
