Były deputat Anańjeŭ zaklikaje zamianić vybary plebiscytam ab daviery Łukašenku
«Siońnia patrebna prostaja pracedura plebiscytu — finansava sproščanaha apytańnia hramadzian našaj krainy z vyniasieńniem adnoj temy abmierkavańnia «Ci daviarajecie Vy Alaksandru Ryhoraviču Łukašenku kiravać dziaržavaj da 2020 hoda — hoda ŭvodu druhoha enierhabłoka Astravieckaj AES?» — piša były deputat pałaty pradstaŭnikoŭ Raman Anańjeŭ u liście, dasłanym u hazietu «Naša Niva».
Takija plebiscyty pravodzilisia dla praciahu paŭnamoctvaŭ kiraŭnika dziaržavy ŭ Turkmienii, Siryi dy inšych dyktaturach.
«Jakija vybary-2015? — piša Anańjeŭ. — Kamu treba hetaje pustoje marnavańnie hrošaj ź dziaržaŭnaha biudžetu? Biełarusy za apošnija paŭhoda nahladzielisia ŭsialakich jeŭramajdanaŭ, aŭtamajdanaŭ, antymajdanaŭ, SOS-majdanaŭ. Nie… Nam hetaha nie treba! Nam treba atamnuju elektrastancyju dabudavać, kab našy nastupnyja pakaleńni nie chadzili z praciahnutaj rukoj, prabačcie, pišu biez sarkazmu, pa hetak patrebnuju enierhiju dla ekanomiki Respubliki Biełaruś, jakaja burna raźvivajecca ŭ XXI stahodździ».
Anańjeŭ pryznaje, što pracedury dla admieny vybaraŭ niama.
Ale, piša jon, «jość 110 deputataŭ, jakija vałodajuć pravam zakanadaŭčaj inicyjatyvy, sienatary, roznyja pravavyja centry, niachaj dumajuć, zarobak u ich nie nizki».
Svoj dopis jon supravadžaje antyzachodniaj rytorykaj: «Bo ŭžo ŭsim ludziam, jaki bolš-mienš ciamiać u palitycy, zrazumieła, što za pryncypovuju pazicyju A.R. Łukašenki ŭ pytańni jeŭrazijskaje intehracyi, nam spadary Makiejn, Sikorski i inšyja rychtujuć svoj płan nie Maršała, a Apakalipsisu».
Anańjeŭ pracavaŭ dyrektaram ZAT «Biełnaftahaz» i deputatam ad Lepielskaj akruhi. Jon byŭ deputatam Viarchoŭnaha Savieta 13-ha sklikańnia, zastaŭsia pracavać u pałacie pradstaŭnikoŭ pieršaha sklikańnia, a paśla zastaŭsia tam i na druhoje sklikańnie.
Ad Redaktara. Darahi deputat Anańjeŭ, Vy adarvany ad žyćcia čałaviek. Pra jakija vybary Vy havorycie? Daŭno niama nijakich vybaraŭ.
Kamientary