Aŭtamabil Lamborghini Gallardo Spyder 49 koštam bolš za 2 młrd rubloŭ kanfiskavała Minskaja rehijanalnaja mytnia (MRT).
Fota Uładzimira Čudziancova
Fota Uładzimira Čudziancova
«Kanfiskavany transpartny srodak 2008 hoda vypusku naležyć hramadzianinu Balivaryjanskaj Respubliki Vieniesueła, na terytoryju Mytnaha sajuza byŭ uviezieny časova», — rastłumačyli ŭ Minskaj rehijanalnaj mytni. U chodzie pravierki mytnyja supracoŭniki vyśvietlili, što ŭładalnik mašyny parušyŭ terminy časovaha ŭvozu, za ich pradaŭžeńniem ŭ mytniu nie źviartaŭsia.
«Zhodna z p.2 st.358 Mytnaha kodeksa Mytnaha sajuza, zamiežnyja fizičnyja asoby majuć prava časova uvozić na mytnuju terytoryju Mytnaha sajuza transpartnyja srodki dla asabistaha karystańnia, zarehistravanyja na terytoryi zamiežnych dziaržaŭ, z vyzvaleńniem ad vypłaty mytnych płaciažoŭ na termin svajho časovaha znachodžańnia, ale nie bolš čym na adzin hod. Pa matyvavanym zvarocie zamiežnaaj fizičnaj asoby termin časovaha ŭvozu transpartnych srodkaŭ dla asabistaha karystańnia moža być pradoŭžany mytnymi orhanami ŭ miežach adnaho hoda z dnia časovaha ŭvozu takich transpartnych srodkaŭ», — nahadali ŭ MRT.
Uładalnik aŭtamabila padazrajecca ŭ parušeńni č.2 st.14.7 KoAP Biełarusi. Sankcyi hetaha artykuła praduhledžvajuć u tym liku kanfiskacyju transpartnaha srodku. Materyjały spravy nakiravanyja ŭ sud.
***
Hetuju biełuju Lamborghini viedaje, bieź pierabolšańnia, kožny žychar Minska — hałoŭnym čynam z-za taho, što jaje haspadar rehularna pa-chamsku parkavaŭ svoj srodak pieramiaščeńnia ŭ samych nieprydatnych dla hetaha miescach. Asabliva jamu palubiłasia piešachodnaja zona pobač z haścinicaj «Jeŭropa», dzie zamožny inšaziemiec doŭhi čas pražyvaŭ. Pry hetym na aŭtamabili nie było nijakich rehistracyjnych numaroŭ.
Aburanyja žychary stalicy nieadnarazova paviedamlali ab złosnym parušalniku ŭ DAI, a da miesca parkoŭki supierkara niekalki razoŭ pryjazdžali milicejskija evakuatary. Pa słovach krynicy ŭ Minskaj dziaržaŭtainśpiekcyi, nakolki pa-naplavalnicku ŭładalnik Lamborgini staviŭsia da biełaruskich PDR, nastolki ž akuratna jon płaciŭ štrafy: vidać, ich suma zdavałasia jamu drobiaźziu.
