U škołach treba ŭdzialać bolš uvahi zaniatkam sportam i fizkulturaj. Takuju dumku vykazaŭ siońnia staršynia Minharvykankama Mikałaj Ładućka na forumie piedahohaŭ Minska.
Mikałaj Ładućka adznačyŭ, što jaho naściarožvajuć danyja miedycynskich ahladaŭ školnikaŭ. «Vyniki miedahladaŭ prymušajuć nas surjozna zadumacca, tamu pytańnie azdaraŭleńnia dziaciej na praciahu navučalnaha hoda staić vostra. Pryčym miedyki śćviardžajuć, što bolšaść zachvorvańniaŭ, vyjaŭlenych u dziaciej, źjaŭlajucca nie pryrodžanymi, a nabytymi ŭ pieryjad navučańnia ŭ škole», — skazaŭ jon.
Pavodle słoŭ staršyni Minharvykankama, dadatkovyja zaniatki sportam i fizkulturaj možna pravodzić u šosty školny dzień. «Usie našy haradskija spartyŭnyja zbudavańni pavinny być adkryty dla naviedvańniaŭ školnikami. Stvaryć umovy dla viadzieńnia zdarovaha ładu žyćcia vučniaŭ — heta zadača nie tolki baćkoŭ, ale i piedahahičnaha kalektyvu. Dyrektaram škoł i kłasnym kiraŭnikam treba ŭdzialić uvahu hetamu pytańniu», — dadaŭ mer.
U Minsku ŭžo jość niekalki škoł z basiejnami, jakija zapatrabavany siarod školnikaŭ. «U budučym pry prajektavańni škoł treba ŭličvać hety momant. Abstalavańnie basiejna ŭ škole patrabuje peŭnych zatrat, ale heta inviestycyi ŭ zdaroŭje školnikaŭ», — padkreśliŭ Mikałaj Ładućka.
