Praviły pryjomu ŭ VNU ŭ nastupnym hodzie źmianiać nie płanujecca. Pra heta siońnia na pres-kanfierencyi paviedamili staršynia Dziaržaŭnaj kamisii pa kantroli za chodam padrychtoŭki i praviadzieńnia ustupnych ispytaŭ va ŭstanovy vyšejšaj i siarednieśpiecyjalnaj adukacyi ŭ 2014 hodzie Anatol Rubinaŭ i ministr adukacyi Biełarusi Siarhiej Maskievič.
Rubinaŭ vysoka acaniŭ rašeńnie ab uviadzieńni dadatkovaha nabora. Pa jaho słovach, heta dazvoliła zapoŭnić studentami niepapularnyja, ale vielmi nieabchodnyja dziaržavie śpiecyjalnaści:
«Bajalisia, što pa dadatkovym nabory pojduć słabyja abituryjenty. Ale vyniki ŭstupnaj kampanii pakazali, što na mnohich śpiecyjalnaściach pry dadatkovym nabory prachadny bał byŭ značna bolšym za asnoŭny nabor».
Rubinaŭ paviedamiŭ, što tolki 200 čałaviek, što pastupili pa dadatkovym nabory, nie pieraadoleli prachadny paroh pa dvuch pradmietach, vyznačany dla asnoŭnaha naboru, i tolki 12 čałaviek nie pieraadoleli hety paroh pa ŭsich troch pradmietach.
Anatol Rubinaŭ źviazaŭ vyšejšy bał dadatkovaha naboru z tym, što jon pravodziŭsia pieravažna na techničnyja śpiecyjalnaści, i metavuju hrupu ŭ im składali ŭ tym liku vypuskniki siarednie-śpiecyjalnych navučalnych ustanoŭ, jakija majuć dobruju padrychtoŭku pa profilnym pradmiecie, ale drenna spravilisia z humanitarnymi navukami.
Usiaho paśla asnoŭnaha naboru zastałosia 2,5 tysiačy vakantnych biudžetnych miescaŭ. Dadatkovy nabor dazvoliŭ zapoŭnić 1,5 tysiačy ź ich.
«Treba skazać tak: niezapoŭnienym zastałosia 81 biudžetnaje miesca. Usie ŭ Biełaruskaj sielskahaspadarčaj akademii. Astatnija — heta niedabor na zavočnaje navučańnie za košt biudžeta. Hetyja miescy možna nie ŭličvać. Bo ludzi, jakija pastupajuć na ich, pracujuć i majuć srodki da isnavańnia. Uvohule treba pamianšać nabor na biudžetnaje zavočnaje navučańnie ci ŭvohule spyniać jaho. U adukacyi supracoŭnikaŭ musić być zacikaŭleny najmalnik, najmalnik zaŭsiody znojdzie, jak apłacić adukacyju», — skazaŭ Maskievič.
Rubinaŭ taksama padzialiŭsia i inšymi prablemami, jakija razhladajucca ciapier čynoŭnikami ad adukacyi.
Pa-pieršaje, Rubinaŭ ahučyŭ prapanovu skaracić praciahłaść ustupnaj kampanii praviadzieńniem niekalkich ekzamienaŭ u adzin dzień.
«Heta musiać być ekzamieny, jakija nie pierasiakajucca ŭ miežach adnoj śpiecyjalnaści. Naprykład, hieahrafija i historyja Biełarusi. Bo zdać dva ekzamieny za dzień niemahčyma», — patłumačyŭ jon.
Pa-druhoje, płanujecca pavialičyć sumu zboru za centralizavanaje teściravańnie.
Suma ŭ 10 tysiač rubloŭ za zdaču adnaho pradmieta ŭžo nie dazvalaje pakryvać vydatki na praviaździeńnie CT.
Pa-treciaje, abmiarkoŭvajecca prapanova dazvolić niepracaŭładkavanym žančynam z małymi dziećmi pastupać na zavočnuju adukacyju.
«Palityka dziaržavy nakiravanaja na pavieličeńnie naradžalnaści. Ale kab pastupić na zavočnaje, treba pracavać. Tamu žančyna moža zrabić vybar nie na karyść siamji, bo naradžeńnie dziciaci pieraškadžaje karjery», — skazaŭ Rubinaŭ.
Taksama Rubinaŭ nie abyjšoŭ uvahaj VNU z unutranymi ekzamienami. Jon paviedamiŭ, što dla baraćby z karupcyjaj u takich VNU treba zakanadaŭča zabaranić vykładčykam padrychtoŭčych kursaŭ prymać ustupnyja ekzamieny.
