Minenierhavuhla Ukrainy nakiravała abłasnym enierhazabieśpiačalnym kampanijam paviedamleńni ab mahčymym časovym spynieńni elektrazabieśpiačeńnia nasielnictva, jak heta było ŭ 90-ch hadach, u suviazi z uźniknieńniem deficytu mahutnaściaŭ u abjadnanaj enierhasistemie Ukrainy.
Pra heta havorycca ŭ paviedamleńni «Prykarpaćcievobłenierha» sa spasyłkaj na dakumient Minenierhavuhla.
«Rašeńnie źviarnucca da takich mietadaŭ abumoŭlena razbałansavanaściu pamiž vytvorčaściu i spažyvańniem elektraenierhii z-za deficytu paliva i hidraresursaŭ», — havorycca ŭ paviedamleńni.
«Vykonvajučy rašeńni dziaržaŭnaha pradpryjemstva «Nacyjanalnaja enierhakampanii Ukrainy», «Ukrenierha» i profilnaha ministerstva, enierhietyki vymušanyja ŭvodzić tak zvanyja hrafiki avaryjnych adklučeńniaŭ z metaj ekanomii paliva», — adznačajecca ŭ paviedamleńni.
Jak adznačyli ŭ kampanii, adklučeńni buduć pravodzicca pa ŭzhodnienych z abłdziaržadministracyjaj hrafikach avaryjnych adklučeńniaŭ padčas ranišnich i viačernich pikavych nahruzak, aryjentyrovačna ŭ 9:00-11:00 i ŭ 20:00-22:00.
«Adklučeńnie asobnych hrup spažyŭcoŭ budzie doŭžycca nie bolš za dźvie hadziny. Hrafiki ŭvodziacca ŭ dziejańnie na praciahu 10-15 chvilin paśla rasparadžeńnia hałoŭnaha dyśpietčara elektraenierhietyčnaj sistemy Ukrainy», — havorycca ŭ paviedamleńni.
U kampanii nahadali, što raniej takija abmiežavalnyja hrafiki byli ŭviedzienyja dla pradpryjemstvaŭ i jurydyčnych spažyŭcoŭ vobłaści, ale jany nie dali čakanaha efiektu.
«Adznačym, što dla kožnaj vobłaści ŭstanoŭleny kankretnyja limity mahutnaści. U vypadku, kali vobłaść pieravysić spažyvańnie elektraenierhii, u dziejańnie budzie ŭviedzieny hrafiki avaryjnych adklučeńniaŭ. Zaraz naša vobłaść nie ŭkładajecca ŭ peŭnyja limity, tamu adklučeńni całkam vierahodnyja», — adznačajecca ŭ paviedamleńni.
