Prezident Ukrainy Piatro Parašenka spadziajecca, što 5 vieraśnia ŭ Minsku šmatbakovaja kantaktnaja hrupa pačnie pieramovy ab pracesie mirnaha ŭrehulavańnia situacyi ŭ Danieckaj i Łuhanskaj abłaściach, a taksama buduć zroblenyja realnyja zachady dla dasiahnieńnia miru.
«Ja ŭskładaju vielizarnuju nadzieju na toje, što ŭ piatnicu ŭ Minsku budzie, urešcie, raspačaty mirny praces», — zajaviŭ Parašenka 3 vieraśnia ŭ Kijevie padčas sustrečy z ukraincami, vyzvalenymi ź livijskaha pałonu.
Pavodle źviestak pres-słužby prezidenta, jon padkreśliŭ, što Ukraina nie davała nijakaj nahody dla taho, kab spravakavać suprać siabie ahresiju. «Uvieś śviet viedaje, što Ukraina źjaŭlajecca krainaj, jakaja dakładna prytrymlivajecca abaviazacielstvaŭ, mižnarodnaha prava i jakaja siońnia źjaŭlajecca abjektam ahresii z boku susiedniaj dziaržavy», — skazaŭ Parašenka. Jon vykazaŭ nadzieju, što, narešcie, udasca spynić pastajannaje parušeńnie damoŭlenaściaŭ, rasstreł pałonnych, mirnaha nasielnictva, źniščeńnie navučalnych ustanoŭ i inšych abjektaŭ infrastruktury.
«Pieršaja zadača — heta mir. Siońnia a 5-j hadzinie ranicy, u suviazi z roźnicaj u časie, my razmaŭlali z prezidentam Pucinym (jon znachodzicca ŭ Manholii) ab tym, jakim čynam my možam spynić žudasnyja pracesy. Nielha admaŭlać toje, što ludzi pavinny pierastać hinuć», — zajaviŭ Parašenka.
Jon padkreśliŭ, što miru va Ukrainie žadajuć usie hramadzianie, tamu jon budzie zmahacca za mir. «Narod Ukrainy ŭvieś «za», palitykany žadajuć pahulać u vajnu. Ale ja chaču skazać, što nie dam heta zrabić. My pavinny razam zmahacca za mir», — adznačyŭ prezident.
Apošniaja sustreča kantaktnaj hrupy (Kijeŭ — sieparatysty Danbasa — Rasija — ABSIE) źbirałasia ŭ Minsku 1 vieraśnia. Baki padali svaje prapanovy i vyrašyli sabracca znoŭ 5 vieraśnia.
U sieradu prezident RF Uładzimir Pucin abviaściŭ svoj płan mirnaha ŭrehulavańnia, jaki składajecca ź siami punktaŭ. Kijeŭ u asobie premjer-ministra Arsienia Jacaniuka nie pryniaŭ prapanovy rasijskaha kiraŭnika, zajaviŭšy, što heta płan ratavańnia terarystaŭ.
