Padatkovy manieŭr Rasii moža pryvieści da pierahladu biełaruskaha biudžetu na 2015 hod, paviedamiŭ 3 kastryčnika na pasiadžeńni pastajannaj kamisii Pałaty pradstaŭnikoŭ pa mižnarodnych spravach pradstaŭnik Biełarusi ŭ Jeŭrazijskaj ekanamičnaj kamisii Siarhiej Rumas.
«Kali prapanovy biełaruskaha boku nie buduć padtrymanyja, 1 młrd dołaraŭ dla Biełarusi — istotnaja suma, i, mabyć, uradu daviadziecca pierahladać artykuły raschodaŭ biudžetu», — zajaviŭ Rumas.
Jon adznačyŭ, što 3 kastryčnika ŭ Maskvie znachodzicca pieršy vice-premjer Uładzimir Siamaška. Biełaruski bok prapanoŭvaje padpisać pratakoł i ŭrehulavać pytańnie, źviazanaje z upłyvam padatkovaha manieŭra na Biełaruś. «Naša prapanova zaklučajecca ŭ kampiensacyi strat, vyklikanych padatkovym manieŭram. My prapanoŭvajem poŭnaściu zaličvać u biełaruski biudžet vyvaznyja pošliny na naftapradukty, naležnyja Rasii da 2017 hoda», — skazaŭ čynoŭnik.
Pavodle jaho słoŭ, prapanova biełaruskaha boku abumoŭlenaja tym, što zaraz biełaruskija NPZ pravodziać madernizacyju. «My spadziajemsia, što da 2017 hoda našy pradpryjemstvy zavieršać madernizacyju i pavialičać hłybiniu pierapracoŭki», — adznačyŭ Rumas.
Ciapier Biełaruś pieraličvaje ŭ rasijski biudžet vyvaznyja mytnyja pošliny na naftapradukty, vyrablenyja z rasijskaj nafty i ekspartavanyja za miežy Mytnaha sajuza. U 2013 hodzie Biełaruś pieraličyła ŭ rasijski biudžet 3,3 młrd dołaraŭ ZŠA.
U mai hetaha hoda ŭ pracesie padrychtoŭki dahavora ab Jeŭrazijskim ekanamičnym sajuzie Maskva i Minsk damovilisia, što biełaruski bok zmoža z 2015 hoda pakidać u svaim biudžecie štomiesiac naftapošlin na 125 młn dołaraŭ (1,5 młrd dołaraŭ u hadavym vyražeńni). Adnak u vieraśni stała viadoma, što rasijski ŭrad płanuje realizavać u nastupnym hodzie «padatkovy manieŭr» (rezkaje źnižeńnie ekspartnych pošlin na naftu i naftapradukty i adnačasova z hetym značnaje pavyšeńnie padatku na zdabyču karysnych vykapniaŭ). Adpaviedny zakonaprajekt uniesieny ŭ Dziarždumu.
29 vieraśnia Alaksandr Łukašenka, sustrakajučysia z deputatami Pałaty pradstaŭnikoŭ, zajaviŭ, što zapłanavany Rasijaj padatkovy manieŭr u naftavaj halinie moža pryvieści da značnych strat dla Biełarusi i stvaryć prablemy ŭ funkcyjanavańni Jeŭrazijskaha ekanamičnaha sajuza.
«My nakiravali hrupu śpiecyjalistaŭ na čale z Uładzimiram Siamaškam, jaki viadzie pieramovy na hetuju temu. Kali taki krok budzie zrobleny z boku Rasijskaj Fiederacyi, heta stanie vielmi vialikaj prablemaj u funkcyjanavańni ciapierašniaha sajuza. Pa-pieršaje, tamu, što my damaŭlalisia ab inšym. Pa-druhoje, kali ažyćciaŭlajucca niejkija dziejańni ŭ adnym kirunku, značyć treba, kab u inšym była kampiensacyja. Heta vialikija hrošy, jakija my ni ŭ jakim vypadku nie pavinny hublać», — padkreśliŭ Łukašenka.
Zhodna z raźlikami biełaruskich uładaŭ, straty Biełarusi, źviazanyja z padatkovym manieŭram u naftavaj halinie Rasii, mohuć pieravysić 1 młrd dołaraŭ.
