Alaksandr Łukašenka ŭ chodzie pryznačeńnia kiraŭnikoŭ miascovych vykanaŭčych orhanaŭ adznačyŭ važnaść alternatyŭnaha adboru kandydataŭ na kirujučyja pasady, u asnovie jakoha — patrabavańnie vysokaha prafiesijanalizmu. Jon ličyć absalutna nieprymalnym prapanoŭvać na kirujučyja pasady ludziej nieprafiesijnych, paviedamlaje pres-słužba kiraŭnika dziaržavy.
president.gov.by
«U nas niama takoha, što hubiernatar zachacieŭ, voś svoj čałaviek, my pryznačajem, zabyvajučy ab tym, što nam patrebnyja prafiesijanały, — skazaŭ kiraŭnik dziaržavy.
— Karennaje pytańnie — heta pytańnie prafiesijanalizmu. Padziei apošniaha času pakazali nam, u jakim kirunku ruchacca, i my mnohaje zrazumieli». Łukašenka zakranuŭ taksama temu aptymizacyi orhanaŭ dziaržkiravańnia i zajaviŭ pra nieabchodnaść pavyšać vykanalnickuju dyscyplinu.
«Nie budu chavać ad vas, što nam jašče pryjdziecca aptymizavać i pavyšać dyscyplinu. U mianie lažyć na stale prajekt dekreta, jaki bolš za ŭsio budzie tyčycca vas. U im vam dajucca vialikija pravy, i ad vas ža buduć vielizarnyja patrabavańni», — adznačyŭ jon.
«Skazaŭ kiraŭnik, pryniata rašeńnie ŭ vykankamie abo adnaasobnaje rašeńnie — usio pavinna być zroblena. Patrebna vykanalnickaja dyscyplina. Pryniata rašeńnie — kropka. Kali nie vykanana, to nastupajuć inšyja patrabavańni, až da kryminalnaj adkaznaści», — zapatrabavaŭ Łukašenka.
Jon padkreśliŭ, što i nadalej pytańniam vykanalnickaj dyscypliny budzie nadavacca samaja surjoznaja ŭvaha.
«Tak budzie i dalej, niahledziačy na toje, buduć, nie buduć u nas vybary. Na heta aryjentavacca nie treba.
Varta pamiatać, što heta ekzamien, i my ŭsie budziem zdavać hety ekzamien, — skazaŭ kiraŭnik dziaržavy.
— Ale padładžvacca pad vybary, jak mnie prapanoŭvajuć (tut užo ŭsio pišuć, pačynajučy ad niekatorych apazicyjanieraŭ) davajcie praviadziem nie ŭ listapadzie nastupnaha hoda, jak naležyć, kali termin kančajecca, a ŭ sakaviku, maŭlaŭ, ciapier abstanoŭka padychodziačaja, rejtynh u dziejnaha prezidenta ledź nie 90%, davajcie praviadziem. Heta budzie padman našych vybarščykaŭ i nasielnictva. My nie pavinny hetaha rabić, tym bolš padstaŭlacca tam, dzie nie treba, pad krytyku».
«My vyjdziem da naroda i skažam ščyra, što zmahli zrabić. Što nie zmahli — zrobim.
Choča narod — chaj hałasuje, nie choča — nie treba. Niachaj abirajuć inšaha čałavieka. Pavinna być usio sumlenna.
Na heta treba aryjentavacca, nastrojvacca i nie padładžvacca ni pad jakija vybary. Žyćcio pavinna iści svajoj čaradoj, — padkreśliŭ Łukašenka. — My pavinny ŭ asnovu našaj palityki pakłaści sumlennaść i spraviadlivaść. Bolš ničoha nie treba. Paniaćci sumlennaści i spraviadlivaści stali ŭžo nie psichałahičnymi, a ekanamičnymi».
Akramia taho, Łukašenka asablivuju ŭvahu źviarnuŭ na pracu ź ludźmi i pieraściaroh ad farmalizmu pry razhladzie zvarotaŭ hramadzian. Ni ŭ jakim razie nie pavinna być adpisak, pačynajučy ad zvarotaŭ u Administracyju prezidenta.
Źviartajučysia da pryznačencaŭ, Alaksandr Łukašenka skazaŭ: «Pahladzicie ŭvažliva na hetyja prablemy.
Voś jakraz pierad vybarami heta vielmi važna, i na hetyja prablemy treba źviartać surjoznuju ŭvahu. Jašče raz padkreślivaju — mnohija pytańni pavinny vyrašacca samim nasielnictvam i pradpryjemstvami. Z našaha boku pavinna być čałaviečaje staŭleńnie. Tamu źviarnicie samuju surjoznuju ŭvahu na pracu ź ludźmi, na razhlad skarhaŭ, prapanoŭ».
Łukašenka zapatrabavaŭ u bližejšy čas padrychtavać i pradstavić jamu na razhlad analiz zvarotaŭ u Administracyju prezidenta, va ŭrad, inšyja orhany.
Kiraŭnik dziaržavy taksama skazaŭ ab niedapuščalnaści faktaŭ, kali pastupajučyja skarhi pieranakiroŭvajucca ŭ tyja orhany, viedamstvy abo kiraŭnikam, na jakich ludzi i skardziacca. «Voś hetaha być nie pavinna. Nijakaha farmalizmu i biurakratyzmu, rabicie ŭsio adnaznačna», — zapatrabavaŭ Łukašenka.
Jon taksama zaklikaŭ kiraŭnikoŭ miascovych vykanaŭčych orhanaŭ być aktyŭnymi, prafiesijnymi i nie pracavać azirajučysia — aby nie było horš. «I samaje hałoŭnaje — nie manicie, heta nikomu nie treba, i heta abaviazkova vylezie», — skazaŭ Łukašenka.
Akramia taho, Łukašenka zapatrabavaŭ ad čynoŭnikaŭ reahavać nie tolki infarmacyju, jakaja atrymała rezanans u ŚMI.
«A kolki jość takich spraŭ, jakija nie majuć rezanansu, ale my pavinny reahavać —kali ŭ ludziej niama vady, kali nie pryvieźli pradukty, kali šmatdzietnyja siemji zastajucca pa-za ŭvahaj. Heta značyć ja patrabuju padłučacca i pa takich pytańniach», — skazaŭ Alaksandr Łukašenka.
Kiraŭnik dziaržavy taksama zakranuŭ temu naviadzieńnia paradku, padtrymańnia čyścini ŭ haradach i vioskach, kultury ziemlarobstva. Na toje, kab biełaruskija nasielenyja punkty nabyli dahledžany vyhlad, spatrebilisia hady, i siońnia heta ŭžo prynosić peŭnyja dyvidendy.
«Pobač z darohami i trasami ŭsio pavinna być idealna, bo praź Biełaruś siońnia miljony ludziej pieramiaščajucca. Jany miarkujuć ab našaj krainie pa tym, što bačać na palach, kala daroh i paraŭnoŭvajuć z susiednimi krainami. Dadzieny faktar ŭličvaje i inviestar, jaki ŭkładvaje ŭ krainu hrošy. Heta ŭžo palityka, ekanomika», — skazaŭ Łukašenka.
Jon taksama zapatrabavaŭ stroha karać tych, chto vyvozić i vykidvaje śmiećcie ŭ les, na pali.
«Nie čakajcie nijakaj dadatkovaj narmatyŭnaj bazy. Prymajcie samyja žorstkija miery. Heta ž biazładździe, pavykidali tony śmiećcia ŭ lesie, na darohach, i zatym treba hnać techniku za kimści prybirać», — adznačyŭ kiraŭnik dziaržavy.
Łukašenka taksama zakranuŭ pytańnie pavyšeńnia zarpłaty dziaržsłužačym.
«Padymać zarpłatu my pavinny, tolki skaračajučy i aptymizujučy dziaržaparat i jašče ź biudžetu niešta dadavać. Pacichu ruchajučysia, my vyrašym hetuju prablemu, kab dziaržsłužačy atrymlivaŭ naležnuju zarpłatu».
Pryznačajučy Leanida Anfimava staršynioj Kamiteta dziaržaŭnaha kantrolu, Alaksandr Łukašenka padkreśliŭ, što hetaje viedamstva hraje najvažnuju rolu ŭ žyćci dziaržavy. Što tyčycca asabistych jakaściaŭ novaha staršyni, Łukašenka adznačyŭ jaho pryncypovaść u adstojvańni dziaržaŭnych intaresaŭ.
Pa słovach Łukašenki, jon čakaje ad KDK bolš surjoznaha i hruntoŭnaha padychodu da kantrolu nad vykanańniem daručeńniaŭ prezidenta, u tym liku z ulikam mier pa pavyšeńniu vykanalnickaj dyscypliny.
«Daručeńnie prezidenta pavinna kantralavacca vami asabista, i vy pavinny vyrašać, vykanana ci nie vykanana, u poŭnym abjomie ci nie, — skazaŭ kiraŭnik dziaržavy. — I ŭ chodzie vykanańnia vy pavinny vielmi surjozna ŭpłyvać na hety praces, kab nie atrymałasia tak: čas pryjšoŭ — pahladzieli, ślozy, bo nie vykanana». «Treba ŭ pracesie hetyja pytańni vielmi surjozna kantralavać. Bo prezidentam dajucca daručeńni i prymajucca rašeńni pa asnoŭnych pytańniach žyćcia našaj dziaržavy», — padkreśliŭ biełaruski lidar.
Razam z tym jon zaŭvažyŭ, što ŭ rabocie KDK nie pavinna być i abvinavaŭčaha ŭchiłu, nieabchodna zaŭsiody abjektyŭna i spraviadliva padychodzić da razhladu i pryniaćcia rašeńniaŭ pa tych ci inšych pytańniach.
«My nie pavinny iści i zahadzia bačyć dzieści vorahaŭ i našych praciŭnikaŭ. Ale, kali ŭ vyniku my vyjavili, što heta praciŭnik i vorah, my pavinny na ŭsiu katušku ź jaho pytacca», — skazaŭ Łukašenka. Jon rastłumačyŭ, što słovy «praciŭnik» i «vorah» užyŭ ŭ suviazi z tym, što ludzi, jakija ździajśniajuć ekanamičnyja złačynstvy, robiać heta suprać dziaržavy i naroda. «Hetaha być nie pavinna. Tut spahnańnie pavinna być samym žorstkim», — skazaŭ kiraŭnik dziaržavy.
