Chavierbord Hendo.
Na radaść šmatlikim fanatam filma «Nazad u budučyniu» kampanija Hendo stvaryła sapraŭdny chavierbord — došku kštałtu snoŭborda ci skiejtborda, zdolnuju łunać nad ziamloju.
Doška padymajecca nad pavierchniaj za košt mahnitnaha pola ad admysłovaj kambinacyi zvyšmahutnych mahnitaŭ. Dla levitacyi patrebna pavierchnia ź niefieramahnitnaha pravadnika — u Hendo karystajucca miednymi panelami. Pakul vyšynia palotu nie pieravyšaje niekalkich santymietraŭ, što zusim nie padobna da kadraŭ sa znakamitaha filma. Dy i kiravać doškaj nielha.
Adnak Hendo, finansavanaja praz kraŭdfandynhavy partał Kickstarter, zrabiła latučuju došku, kab prademanstravać patencyjał svajoj hałoŭnaj raspracoŭki: ruchavika mahnitnaj levitacyi. U kampanii ŭžo jość pratatyp dystancyjna kiravanaha ruchavika.
Dyrektar Hendo Hreh Chiendersan kaža, što prymianiać jaho ruchavik mahnitnaj levitacyi možna i dla transpartnych srodkaŭ, pieranosu hruzaŭ ci navat u architektury. Chiendersan maryć realizavać svaju ideju ab latučych budynkach: ruchaviki ŭ padmurku buduć padymać dom nad ziamloj u vyniku niebiaśpieki, naprykład, padčas ziemlatrusu.
Adnak heta nie značyć, što latučuju došku Hendo nielha nabyć: kampanija abiacaje vysłać rabočy ekzemplar za 10 tysiač dalaraŭ.
