Biełarusi i Rasii nieabchodna pracavać nad abjadnańniem nacyjanalnych płaciežnych sistem. Pra heta zajaviŭ premjer-ministr Biełarusi Michaił Miaśnikovič 21 kastryčnika na pres-kanfierencyi pa vynikach pasiadžeńnia Savieta ministraŭ Sajuznaj dziaržavy ŭ Minsku.
«Miarkujem, što treba pavialičvać u raźlikach va ŭzajemnym handli ŭdzielnuju vahu rasijskaha rubla, — skazaŭ biełaruski premjer. — My za toje, kab pracavać nie tolki nad stvareńniem nacyjanalnych płaciežnych sistem, ale i nad abjadnańniem nacyjanalnych płaciežnych sistem».
Na samim pasiadžeńni sajuznaha Saŭmina kiraŭnik biełaruskaha ŭrada zajaviŭ: «Hrošy — reč dalikatnaja, heta bazavy elemient suvierenitetu. Ale ŭ najaŭnaj situacyi nam dla pašyreńnia našaha sumiesnaha handlu treba šyrej vykarystoŭvać rasijski rubiel. Heta abjektyŭnaja realnaść».
Razmaŭlajučy z žurnalistami, Michaił Miaśnikovič padkreśliŭ, što Biełaruś i Rasija pavinny taksama aktyvizavać pracu nad stvareńniem sumiesnych kampanij i akcyjaniernych tavarystvaŭ jak na dvuchbakovaj asnovie, hetak i z udziełam treciaha boku.
Nahadajem, u Biełarusi pracujuć 2 tysiačy 706 kampanij z rasijskim kapitałam. «Za apošnija paŭtara hady kolkaść našych sumiesnych kampanij pryrasła na 200, heta amal 15%. Za paŭhoda 3,6 miljarda dołaraŭ inviestycyj z Rasii pryjšli ŭ Biełaruś i 1 miljard dołaraŭ — ź Biełarusi ŭ Rasiju», — paviedamiŭ biełaruski premjer.
