Dva tydni tamu padletki zładzili ŭ Baranavičach fłešmob, kładučysia na žyvot u roznych miescach horada. Poza «tvaram u padłohu» stała repietycyjaj dalejšaha raźvićcia padziej – akcyjaj surjozna zacikavilisia ŭ milicyi. Pry hetym, sa słovaŭ školnikaŭ, u ich dziejańniach pravaachoŭcy nastojliva šukajuć palityčny padtekst.
Płankinh – fłešmob, udzielniki jakoha pavinny lažać na ziamli ci niejkich pradmietach. Suśvietnaviadomym staŭ u 2009 hodzie, kali niekalki anhlijskich miedykaŭ atrymali štrafy za zaniatak płankinham na pracoŭnym miescy. Fota: Sacsietka Vkontaktie
Fotazdymki z sacyjalnych sietak, na jakich kampanija školnikaŭ pa čarzie lažyć to ŭ kinateatry, to ŭ kramie, to na darozie, to na prystupkach harvykankama, chutka stali viadomymi na ŭsiu krainu — ich pieradrukavali amal usie bujnyja ajčynnyja internet-vydańni.
Baranavickija dzieci zajmalisia tak zvanym «płankinham» – fłešmobam, jaki byŭ dosyć papularny ŭ Jeŭropie i Amierycy niekalki hadoŭ tamu. Jak patłumačyŭ adzin z udzielnikaŭ akcyi, takim čynam jon i jaho siabry chacieli ŭrazić haradžan.
– Ciapier modnyja roznaha kštałtu fłešmoby – ablivańnie vadoju, jašče štości. Tamu ludzi pryzvyčailisia i ździvić ich niečym vielmi składana. Adnak my pasprabavali, i ŭ nas atrymałasia, – skazaŭ padletak.
Ale razam sa «słavaju» ŭ sietcy ŭ hierojaŭ fota niečakana źjavilisia prablemy ź milicyjaj — dziaciej pačali dapytvać inśpiektary IDN.
Siarod usich fotazdymkaŭ, sa słovaŭ školnikaŭ, asnoŭnuju ŭvahu milicyjanty čamuści źviartali na toj kadr, dzie niekalki čałaviek lažać tvarami ŭniz na prystupkach harvykankama. Padčas dopytu inśpiektar navat prarekłamavaŭ dzieciam internet-resursy, ab jakich raniej jany ničoha nie čuli.
– Nam pakazvali razdrukoŭku z sajta, zdajecca, Chartyi-07. Pieršy raz jaho bačyli. Ale nas pytali, jakim čynam my na jaho patrapili, što majem suprać dziaržaŭnaj palityki i suprać čaho my vystupali, kali fotkalisia na prystupkach harvykankama. My navat nie razumieli, ab čym idzie havorka. Raniej uvohule dumali, što našyja ŭłady nasuprać ZAHSa siadziać, a nie nasuprać Lenina, – raskazaŭ 14-hadovy chłopiec.
Pa słovach padletkaŭ, milicyjanier navat «abiacaŭ dakazać», što «ŭsio heta jany rabili pad spajsami». I možna było b padumać, što zapałochanyja školniki ad strachu niešta nabłytali, ale amal takija ž słovy školnaj nastaŭnicy pracytavała maci adnaho z «padazronych».
– Vykładčyca majho dziciaci (havorka ab škole №10) vykazała zdahadku, što kampaniju padletkaŭ napiaredadni prezidenckich vybaraŭ padkupiła ledź nie Amieryka i pad spajsam prymusiła lehčy na prystupki harvykankama. Marazm niejki! – raskazała žančyna.
Taksama maci aburałasia, što cisk, jaki adčuli školniki z boku milicyi, praciahnuŭsia ŭ škole siarod ludziej, jakija pavinny viedać dziaciej, razumieć ich psichałohiju i toje, što ŭ takim uzroście im naŭrad ci vypadaje dumać ab vybarach.
– Dzieciam pa čatyrnaccać hadoŭ, im «da lichtara» ŭsialakaja palityka. Nu padumaješ, palažali jany tam u roznych miescach dla «prykolnaj» fotki… Uborščykam tolki žyćcio spraścili, pavyciraŭšy kurtkami padłohi. Ci ŭ nas harvykankam užo śviatyniaj ličycca? Ci lažać na ziamli zabaroniena? Chaj tady zabirajuć usich, chto takija fłešmoby kožny dzień pad vinnymi adździełami ładzić. Ci chiba ŭ Baranavičach užo ŭsie złačyncy pieravialisia, kab haniać pa niejkaj biazhłuździcy školnikaŭ? – aburałasia maci «parušalnika».
Naŭrad ci chto raźličvaŭ na taki rezanans padletkavaj duraści, ale ŭ milicyi da hetaj «spravy» adnieślisia nadzvyčaj surjozna – u HAUS zapeŭnivajuć, što jašče naležyć ustanavić usich udzielnikaŭ fłešmobu i dać ich dziejańniam pravavuju adznaku.
– Vy pavinny viedać, što milicyja pa-za palitykaj, – zapeŭnivaŭ načalnik Baranavickaha HAUS Viačasłaŭ Hierasimovič, – na adnym z fotazdymkaŭ padletki lažać na darozie. A heta – parušeńnie darožnaha ruchu.
Ale zusim niečakana kiraŭnik baranavickich milicyjantaŭ paviarnuŭ havorku ŭ inšy bok i nibyta znajšoŭ «vinavatych»:
– Heta internet va ŭsim vinavaty. Voś adpraviacca jany razam z baćkami na kamisiju, a tam im patłumačać, što takoje palityka i što takoje internet.
