Pałata pradstaŭnikoŭ pryniała siońnia ŭ pieršym čytańni zakonaprajekt ab alternatyŭnaj słužbie, a taksama adpaviednyja papraŭki ŭ niekatoryja zakony.
Pieršapačatkova prapanoŭvałasia, što hramadzianie biez vyšejšaj adukacyi pavinny buduć prachodzić alternatyŭnuju słužbu na praciahu 30 miesiacaŭ, a vypuskniki VNU — 20 miesiacaŭ. Ciapier terminy vyrašana pavialičyć da 36 i 24 adpaviedna.
Jak adznačyła siońnia ministr pracy i sacabarony Marjana Ščotkina, zakonaprajekt prymajecca dla taho, kab zabiaśpiečyć prava, zakładzienaje ŭ art. 57 Kanstytucyi. «Abarona Respubliki Biełaruś — śviaščenny abaviazak hramadzianina krainy. Paradak prachodžańnia voinskaj słužby, padstavy i ŭmovy vyzvaleńnia ad voinskaj słužby abo zamiena jaje alternatyŭnaj vyznačajucca zakonam», — pracytavała ministr.
Płanujecca, što «alternatyŭščyki» buduć pracavać u śfiery sacabarony, miedustanovach, lasnoj haspadarcy i śfiery ŽKH. U zakonaprajekcie havorycca, što na čas prachodžańnia takoj słužby čałavieka zabiaśpiečvajuć pamiaškańniem, prydatnym dla pražyvańnia.
«Alternatyŭščykam» treba budzie pracavać 48 hadzin (6 dzion) u tydzień. Hrašovaje zabieśpiačeńnie płanujecca ŭ pamiery 150 pracentaŭ ad najbolšaj vieličyni biudžetu pražytačnaha minimumu ŭ siarednim na dušu nasielnictva za dva apošnija kvartały. U dalejšym vypłaty mohuć pavyšacca, kali «alternatyŭščyk» budzie słužyć biez narakańniaŭ.
