Mašyny, telefony, technika: biełarusy pačali masava zakuplacca ŭ Rasii
Paśla abvału rasijskaha rubla biełarusy nabyvajuć tam techniku i novyja aŭto.
Biełaruskija aŭtarynki stajać paŭpustyja. Praz abvał rasijskaha rubla ceny va ŭschodniaj krainie-susiedcy stali bolš pryvabnymi. Pieršyja kupcy aŭtamabilaŭ paciahnulisia ŭ Rasiju jašče ŭ pačatku hoda, ciapier vyhada jašče bolšaja.
U Rasii dalar kaštuje 46 rubloŭ, heta na tracinu mienš, čym uletku. A voś ceny nie paśpieli vyraści tak chutka.
Pačniem z tannych madelaŭ. Novaja madel «Reno Sandera» z ruchavikom 1,6 u kamplektacyi «kamfort» (biez bartavoha kampjutara i padahrevu kresłaŭ) kaštuje ŭ Minsku $11 tysiač, i heta z ulikam akcyi.
Taki samy aŭtamabil kaštuje ŭ Maskvie $9500, ale rasiejcam dastupnaja i jašče bolš prostaja kamplektacyja. Za jaje daviadziecca addać $8500. Zborka, viadoma ž, rasijskaja.
Čym aŭtamabil daražejšy, tym roźnica ŭ canie bolšaja. Naprykład, novy «Falksvahien Pasat» — lehiendarnaja mašyna dla biełarusaŭ — kaštuje ŭ Rasii ad $21 tysiačy. U našaj krainie minimalny ceńnik staić na ŭzroŭni $33 500.
Na mašynach premium-kłasa aščadzić jašče praściej. BMW X6 na ŭschodzie kaštuje $64 tysiačy, a ŭ Biełarusi — $88 tysiač. Na roźnicu možna nabyć jašče adno novaje aŭto!
Niekatoryja biełaruskija dylery, jakija śpiecyjalizujucca na prodažach mašyn, sabranych u Rasii, pa zmaŭčańni ŭkazvajuć ceny ŭ rasijskich rublach. Naprykład, «Tajota Kamry» ŭ abiedźviuch krainach kaštuje kala $21 tysiačy (kala 1 miljona rasijskich rubloŭ). U takoj situacyi aščadzić nie ŭdasca.
Biełarusy, jakija sprabavali nabyć darahi tavar — asabliva aŭto — u Rasii, čaściakom sutykalisia z padmanam. U damovach u apošni momant uźnikajuć punkty pra dadatkovyja kamisijnyja płaciažy albo vyśviatlajecca, što mašyny pa raniej ukazanaj canie bolš niama. Z takimi vypadkami kupcy sutykajucca štodnia, i vielmi redka ŭdajecca vyjści ź niepryjemnaj situacyi biez hrašovych strataŭ.
Što da byłych u vykarystańni aŭtamabilaŭ, to roźnica ŭ canie taksama ahromnistaja. Ale i pierśpiektyva sustreć machlaroŭ uzrastaje jašče bolš.
Biełarusy jeduć u Rasiju i pa techniku. Dyj nie tolki biełarusy — novyja «ajfony» ŭ Maskvie tańniejšyja, čym va ŭsich inšych krainach śvietu! Reč u tym, što Apple nie źmianiaje svaich cenaŭ u zaležnaści ad vahańniaŭ kursaŭ.
U vyniku iPhone 6 pradajecca ŭ rasijskich sałonach pa $680. Naprykład, u Polščy aficyjnaja cana — $885. Pry kupli ŭ Jeŭrasajuzie častku hrošaj možna viarnuć pa sistemie taks-fry, adnak usio adno rasijskaja prapanova bolš vyhadnaja. Dla paraŭnańnia, u biełaruskich internet-kramach taki samy iPhone 6 (pryciahnuty z Rasii ci Jeŭropy) kaštuje $835.
Ceny na lohki noŭtbuk MacBook Air 13' ad toj ža kampanii Apple u Rasii, Polščy (z ulikam viartańnia taks-fry), a taksama ŭ internet-kramach Biełarusi vyhladajuć nastupnym čynam: $880 — $1050 — $1100 adpaviedna.
Inšyja vytvorcy i pradaŭcy chutčej adhukajucca na situacyju na finansavym rynku. Naprykład, televizar LG47LB650V z mahčymaściu prahladu 3D možna nabyć u Rasii za $575. Takaja ž cana i ŭ Polščy z ulikam poŭnaha viartańnia vataŭ. U biełaruskich internet-kramach daviadziecca zapłacić na $100 bolš.
Lusterkavy fotaaparat Canon EOS 1100D biez abjektyva ŭ Maskvie možna nabyć za $230. U Polščy za jaho prosiać $310, u Minsku taki ž kaštuje $330.
«Staryja» ceny pratrymajucca jašče niekalki miesiacaŭ, pakul rasijskija kramy nie raspradaduć tavar, zakupleny pa raniejšym kursie. Adnak pieradnavahodni ažyjataž vymyje z rynku samyja vyhadnyja prapanovy.
Kamientary