Hramadskaj arhanizacyjaj «Achova ptušak Baćkaŭščyny» była abvieščana ptuška 2015 hoda ŭ Biełarusi – sava vušataja.
— Vušatyja sovy nie budujuć hniozdaŭ samastojna. Hetyja ptuški zajmajuć hniozdy voranavych ptušak, takich, jak hrak, šeraja varona, saroka. Tam, dzie niama prydatnych miescaŭ, vušatyja sovy nie hniazdujucca. Naš dośvied pakazvaje, što mienavita hetyja ptuški dobra adhukajucca na bijatechničnyja mierapryjemstvy — zajmajuć štučnyja hniazdoŭi, jakija robić i ŭstaloŭvaje čałaviek. U hod vušataj savy APB budzie ładzić šmat akcyj pa budoŭli takich hniazdoŭjaŭ. Zaprašajem – navučym usich achvotnych! – dzielicca płanami śpiecyjalist pa pryrodaachoŭnych pytańniach APB Siamion Levy.
Što jašče budzie adbyvacca ŭ hod savy? Sumiesna z Nacbankam i Biełpoštaj płanujecca tradycyjny vypusk maniety i marki z vyjavaj ptuški hoda. Z praktyčnaha – u kožnaha achvotnaha budzie mahčymaść pasprabavać svaju moc u budoŭli štučnych hniazdoŭjaŭ dla vušataj savy padčas letnikaŭ i majstar-kłasaŭ. Na praciahu hoda šukajcie ŭ našych sacsietkach admysłovyja viktaryny pra savu.
Siabry kłuba APB «Redkaja ptuška» patrapiać na sapraŭdnuju savinuju ekskursiju. Z pryrodaachoŭnych mierapryjemstvaŭ adbudziecca pošuk miescaŭ hniezdavańnia vušataj savy, vyviešvańnie štučnych hniazdoŭjaŭ. Rychtujecca šerah infarmacyjnych materyjałaŭ, jakija datyčacca hetaj ptuški.
Samych maleńkich udzielnikaŭ kampanii čakajuć konkursy malunkaŭ, fotakonkurs vyrabaŭ z pryrodnych materyjałaŭ, vieršaŭ-čatyrochradkoŭjaŭ i inšyja cikavostki. Pałažeńni konkursaŭ u chutkim časie źjaviacca na aficyjnym sajcie APB.
— Kampanija «Ptuška hoda» ładzicca ŭ Biełarusi štohod pačynajučy z 2000 h. Jana admietnaja tym, što mierapryjemstvy prachodziać na praciahu ŭsiaho hoda i daje mahčymaść paŭdzielničać u našych akcyjach vialikaj kolkaści čałaviek samaha roznaha ŭzrostu, pasprabavać svaju moc nie tolki ŭ tvorčych konkursach, ale i ŭ pryrodaachoŭnych mierapryjemstvach. Tamu sačycie za abviestkami, kožny znojdzie što-niebudź cikavaje dla siabie, — raspaviadaje supracoŭnik pa raźvićci APB Karyna Sałaviej.
Kantaktnaja asoba – Karyna Sałaviej, supracoŭnik pa raźvićci APB
+37529 2648766, [email protected]
10 cikavych faktaŭ pra savu vušatuju
1. Paznavalnyja «vuški» ź pierja ŭ vušataj savy nie majuć ničoha ahulnaha z vušami. Sapraŭdnyja vušy nie prosta ŭbačyć, bo jany schavanyja pad pierjem.
2. Vušataja sava – adna z 11-ci vidaŭ soŭ, jakija hniazdujucca ŭ Biełarusi.
3. Pa źviestkach kalcavańnia, samaja staraja vušataja sava pražyła 29 hadoŭ i 9 miesiacaŭ!
4. Hetaja sava moža pavaročvać hałavu na 270 hradusaŭ
5. Jak i inšyja vidy soŭ, vušataja sava nie buduje hniazda. Arendadaŭcami vystupajuć šeryja varony, hraki i saroki. Nie tak važnaja vyšynia raźmiaščeńnia hniazda, jak miesca: hniazdo pavinna być dobra schavana ŭ hustoj kronie dreva.
6. Vušataja sava ź vialikaj achvotaj zasialaje štučnyja hniazdoŭi.
7. U Biełarusi vušataja sava zimuje. Cikava, što na miescach zimovak sovy źbirajucca šmatlikimi kampanijami. Čarody pa 8—12 soŭ – zvyčajnaja źjava, ale zdarajecca, što ŭ adnym miescy źbirajecca da 30 ci bolej ptušak, jakija znachodziacca ŭ dzionny čas pobač, niaredka na adnym drevie.
8. Jana na dziva nahadvaje źmienšanuju kopiju puhača svaimi vostrymi «vuškami» ź pierja roznaj daŭžyni i jaskrava-aranžavaj afarboŭkaj radužnaj abałonki voka.
9. Vorahaŭ u savy vušataj niašmat. Najbolšuju niebiaśpieku stvaraje puhač, nie suprać pačastavacca žycharami savinaha hniazda i kunica.
10. U łapy da vušataj savy traplajuć vyklučna myšapadobnyja hryzuny, asabliva šeryja paloŭki. Kab schapić adnu achviaru, savie treba zrabić pa 2-3 kidki, a pry mocnym vietry ci daždžy efiektyŭnaść palavańnia źnižajecca ŭ 2-3 razy.
Daviedka: nacyjanalnuju kampaniju «Ptuška hoda» APB pravodzić z 2000 h. Hałoŭnaja meta kampanii – pryciahnuć uvahu nasielnictva da charastva pryrody i ptušak, što žyvuć vakoł nas, nieabchodnaści ich zachavańnia.
U minułyja hady ptuškami hoda abiralisia bieły busieł, biełaja pliska, avialha, damavy vierabiej, haradskaja łastaŭka, baradataja kuhakaŭka, knihaŭka, zvyčajny sałaviej, vialikaja biełaja čapla, šeraja huś, sokał-pustalha, vialiki kulon, čorny śvirhul, udod, ziaziula.
Daviedka APB
Hramadskaja arhanizacyja «Achova ptušak Baćkaŭščyny» — najbujniejšaja niedziaržaŭnaja pryrodaachoŭnaja arhanizacyja Biełarusi i nacyjanalny partnior najbujniejšaj mižnarodnaj sietki pryrodaachoŭnych arhanizacyj «BirdLifeInternational». APB — heta bolš za 3500 členaŭ i prychilnikaŭ, kala 120 školnych kłubaŭ i 14 adździaleńniaŭ pa ŭsioj krainie. Arhanizacyja pracuje dla zachavańnia bijaraznastajnaści i ŭklučeńnia nasielnictva ŭ pryrodaachoŭnuju dziejnaść. Tolki razam my zmožam zachavać dzikuju pryrodu našaj krainy — dałučajciesia i vy!
Kantakty arhanizacyi:
h. Minsk, vuł. Parnikovaja 11, k.4
(+375 17) 263 06 13
(+375 29) 223 06 13
(+375 29) 101 68 87
