Pryhavorany Minskim abłasnym sudom da vyšejšaj miery pakarańnia — rasstrełu — Eduard Łykaŭ napisaŭ prašeńnie ab pamiłavańni, paviedamili ŭ Viarchoŭnym sudzie.
11 listapada stała viadoma, što vykanany śmiarotny pryhavor u dačynieńni da Alaksandra Hrunova, asudžanaha za žorstkaje zabojstva studentki ŭ Homieli. Pravaabaroncy vykazvali mierkavańnie, što ŭ toj ža čas mahli rasstralać i Eduarda Łykava, taksama asudžanaha da śmiarotnaj kary ŭ 2013 hodzie.
«Ad byłoha načalnika SIZA № 1 Minska Aleha Ałkajeva viadoma, što zvyčajna ŭ adzin dzień rasstrelvajuć pa niekalki čałaviek, tamu ŭźnikli padazreńni, što prysud u dačynieńni da Łykava taksama vykanany», — skazaŭ kaardynatar kampanii «Pravaabaroncy suprać śmiarotnaj kary ŭ Biełarusi» Andrej Pałuda.
BiełaPAN nakiravaŭ zapyt u Viarchoŭny sud. U adkazie havorycca, što
asudžany Łykaŭ źviarnuŭsia da Alaksandra Łukašenki z chadajnictvam ab pamiłavańni. «Vykanańnie prysudu ŭ dačynieńni da asoby, asudžanaj da śmiarotnaj kary, prypyniajecca da razhladu chadajnictva ab pamiłavańni»,
— havorycca ŭ dakumiencie za podpisam namieśnika staršyni VS Valeryja Kalinkoviča.
Advakat Alaksandr Klukač admoviŭsia paviedamić, u jakim stanie znachodzicca jaho padabaronny i kali jon padaŭ prašeńnie ab pamiłavańni.
Pravaabaroncy adznačajuć, što pramoha dostupu da infarmacyi pa spravie Łykava ŭ ich niama.
«Adnak my prasočvajem situacyju praz paciarpiełaha Michaiła Hładkaha, — skazaŭ Pałuda. — Jon byŭ asudžany na vosiem hadoŭ pazbaŭleńnia voli za zabojstva rodnaha brata, chacia na samoj spravie byŭ nievinavaty — brata i maci zabiŭ Eduard Łykaŭ.
Zaraz Michaił sprabuje damahčysia kampiensacyi za niezakonnaje pazbaŭleńnie voli, ale ŭ Minskim rajonnym sudzie adkazvajuć, što pakul sprava Łykava znachodzicca na razhladzie, jak my razumiejem — u kamisii pa pamiłavańni, skarhu Hładkaha razhladać nie buduć».
Nahadajem, 25 listapada 2013 hoda sudovaja kalehija pa kryminalnych spravach Minskaha abłasnoha suda pryhavaryła Łykava na padstavie pp. 2, 6, 8, 10, 16 č. 2 art. 139 KK da vyklučnaj miery pakarańnia — rasstrełu.
Zhodna z materyjałami śledstva, pieršyja dva zabojstvy Łykaŭ učyniŭ u 2002 hodzie — paśla zastolla razhareŭsia kanflikt, u vyniku jakoha jon zabiŭ byłoha sukamiernika i jaho maci. Za hetaje złačynstva pakarańnie ŭ turmie adbyvaŭ nievinavaty Michaił Hładki. Treciaje zabojstva Łykaŭ učyniŭ u 2004 hodzie — zabiŭ paluboŭnika sužycielki, mierkavany matyŭ — reŭnaść. U 2011 hodzie, pavodle viersii śledstva, Łykaŭ zabiŭ i samu sužycielku, za toje, što jana chacieła vyhnać jaho z domu. Złačyncu zatrymali ŭ vieraśni 2011 hoda. Napiaredadni ŭ pasiołku Ždanovičy pad Minskam byŭ zabity 74-hadovy piensijanier. Zhodna z materyjałami spravy, pamiž zabitym i abvinavačanym uźnikła svarka, zaviazałasia bojka, padčas jakoj Łykaŭ nanios znajomamu niekalki ŭdaraŭ mietaličnaj truboj.
Takim čynam, pamiž pieršym zabojstvam i zatrymańniem Łykava prajšło dzieviać hadoŭ.
Psichijatryčnaja ekśpiertyza pakazała, što ŭ Łykava pavyšana ahresiŭny charaktar, ale jon pry śviadomaści, zdolny kantralavać svaje ŭčynki. Usie złačynstvy jon učyniŭ u stanie ałkaholnaha apjanieńnia.
15 krasavika 2014 hoda pastanovaj sudovaj kalehii pa kryminalnych spravach Viarchoŭnaha suda pryhavor Minskaha abłasnoha suda ŭ dačynieńni da Łykava byŭ pakinuty bieź źmienaŭ.
Pavodle infarmacyi pravaabaroncaŭ, asudžany nie źviartaŭsia sa skarhaj u Kamitet AAN pa pravach čałavieka.
