Pavodle dadzienych kitajskaj internet-kampanii Alibaba, biełarusy ŭziali aktyŭny ŭdzieł va ŭstalavańni čarhovaha rekordu anłajn-handlu.
U kitajski Dzień chałaściaka, 11 listapada, internet-kampanii Padniabiesnaj ładziać tradycyjnyja hrandyjoznyja rasprodažy. Najbujniejšy z tych, chto biare ŭdzieł u Dni chałaściaka, — Aliexpress.com. Za pieršyja 20 chvilin rasprodažaŭ na im było nakuplena tavaraŭ na 2 miljardy dalaraŭ.
Uładalnik Aliexpress, kampanija Alibaba, padviała kančatkovyja vyniki «kitajskaj Čornaj piatnicy». Usiaho za dzień było nakuplena tavaraŭ na 9,3 młrd dalaraŭ. Heta novy suśvietny rekord anłajn-prodažaŭ. Navat papiaredni rekord Aliexpress, 5,8 młrd dalaraŭ za dzień u minułym hodzie, pieravyšaje amierykanskija «Čornuju piatnicu» i «Kibierpaniadziełak» razam uziatyja.
Pieršaje miesca pa vałavym abjomie pakupak i kolkaści zamovaŭ na Dzień chałaściaka zaniała ŭ hetym hodzie Rasija. Śledam za joj pa abjomie pakupak iduć Brazilija, Izrail i Ispanija.
Biełaruś maje piataje miesca pa vałavym abjomie pakupak na Aliexress na Dzień chałaściaka.
Śledam za nami iduć ZŠA, Kanada i Ukraina. Sam Kitaj nie trapiŭ u dziasiatku top-pakupnikoŭ «kitajskaj Čornaj piatnicy».
Siarod top-pakupak z Rasii — MP3-płejery, zavušnicy, nižniaja bializna, składskaja tara dy puchaviki. Pa inšyja tavary prychodzili amierykancy: kurtki, halštuki, łancužki dla klučej, branzalety i sukienki.
Najlepiej na Dzień chałaściaka pradajucca kitajskija brendy. Naprykład, top-brendy siarod mabilnych telefonaŭ — Xiaomi, Huawei i Meizu. Samsung dy Apple tolki na 4-ym i 5-ym miescach adpaviedna. Ale siarod spartovaha adzieńnia lidary — Adidas i Nike.
Hrandyjoznyja rasprodažy ładziacca nie tolki ŭ ZŠA ci Kitai — 27 listapada ŭ Biełarusi prajšła svaja Čornaja piatnica, dzie pradaŭcy abiacali źnižki da 70%. Niekatoryja pakupniki narakali na toje, što źnižki na najbolš cikavyja hrupy tavaraŭ nie pieravyšali 10—15%.
A čym Vy zakupilisia na Čornuju piatnicu i Dzień chałaściaka?
