25 listapada ŭ Homielskim abłasnym sudzie pačałosia zakrytaje pasiadžeńnie, na jakim razhladajuć kryminalnuju spravu jašče adnaho ŭdzielnika bandy Marozava.
Andreju Šylcu (u kryminalnych kołach viadomy pa mianušcy Dron) vystaŭlena abvinavačańnie va ŭdziele ŭ vaśmi zabojstvach jašče pa adpaviednym artykule Kryminalnaha kodeksa BSSR — redakcyi 1960 hoda. Mienavita hety kodeks dziejničaŭ u Biełarusi ŭ 1990-ch, kali Homielščynu trymali ŭ strachu «marozaŭcy». Tady ž, u 1995 i 1996 hadach, i byli ździejśnieny zabojstvy, niepasredny udzieł u jakich, jak miarkuje śledstva, prymaŭ i Andrej Dron. Pa Kryminalnym kodeksie ŭ sučasnaj redakcyi Šylca abvinavacili jašče i va ŭdziele ŭ arhanizavanaj złačynnaj hrupoŭcy, niezakonnym nabyćci, zachoŭvańni i našeńni ahniastrelnaj zbroi i bojeprypasaŭ u składzie arhanizavanaj hrupy.
Termin daŭniny pa zabojstvach, jakija byli ździejśnieny 20 hadoŭ tamu, nie minuŭ, bo heta asabliva ciažkija złačynstvy. Siarod zabitych byli jak kryminalnyja aŭtarytety, tak i vypadkovyja ludzi, jakija apynulisia «nie ŭ tym miescy nie ŭ toj čas».
Dronu za ŭdzieł u zabojstvach pahražaje śmiarotnaje pakarańnie. Jon, jak i šerah jaho siabrukoŭ-«marozaŭcaŭ», byŭ zatrymany na terytoryi Rasii. Mienavita ŭ «sajuznaj dziaržavie» chavalisia ad 1990-ch, dyj ciapier žyvuć udzielniki bandyckich arhanizacyj «marozaŭcaŭ» i «pažarnikaŭ».
Złačynnaja hrupoŭka pad kiraŭnictvam Siarhieja Marozava dziejničała ŭ Homielskaj vobłaści z kanca 1980-ch pa 2004 hod. Na rachunku hrupoŭki kala 100 złačynstvaŭ, u tym liku 15 zabojstvaŭ, rekiet, vymahalnictva, zhvałtavańni, rabaŭnictva.
Viarchuška bandy — Siarhiej Marozaŭ, Valeryj Harbaty i Ihar Dančanka — była asudžana da rasstrełu. Usiaho pa spravie «marozaŭcaŭ» da roznych terminaŭ pazbaŭleńnia voli byli asudžany 46 čałaviek. A niekatorych tak i nie znajšli.
Darečy, u homielskich sudach razhladajucca novyja spravy byłych udzielnikaŭ kryminalnych hrupovak 1990-ch, jakija ŭžo adbyli termin, viarnulisia dachaty i znoŭ uzialisia za raniejšaje. Vosieńniu 2014 znoŭ zajavili ab sabie byłyja «pažarniki» («NN» pisała pra hetyja spravy).
«Marozaŭcy» i «pažarniki» varahavali pamiž saboj. Pa adnoj kryminalnaj spravie, jakaja razhladałasia ŭ sudzie ŭ pačatku «nulavych», «pažarniki» prachodzili jak paciarpiełyja, «marozaŭcy» — jak abvinavačanyja. Apošnija, kab mieć biassprečnaje lidarstva ŭ złačynnym śviecie Homiela, vyvozili kankurentaŭ u les, katavali. Nie spynialisia navat i pierad zabojstvami. Imi byŭ zabity Viktar Asipienka (pa mianušcy Kaban) razam z synam i kiroŭcam aŭtamabila.
* * *
Andrej Šylec (Dron) naradziŭsia ŭ 1973 u Homieli. U bandu jon trapiŭ zusim maładym. Kali pačalisia aryšty «marozaŭcaŭ», jon zdoleŭ źniknuć. Jak mierkavaŭ, biez znaku. U 2007 jaho abvieścili ŭ vyšuk praź Interpał. Šukali doŭha. Letaś vyjavili ŭ Śviardłoŭskaj vobłaści Rasii, dzie jon žyŭ pa padroblenych dakumientach. Abzavioŭsia siamjoj. Nibyta pačaŭ novaje žyćcio. Jon staraŭsia ŭsialak adciahnuć vydaču ŭ Biełaruś, šukaŭ lubuju začepku.
