Śledčyja admovili svajakam Natalli Sak u zaviadzieńni kryminalnaj spravy. A miedyki vykazali viersiju, čamu dziaŭčynie nie zrabili tamahrafiju hałavy.
20-hadovaja Natalla Sak zahinuła ŭ kancy traŭnia paśla avaryi na vieładarožcy. Dziaŭčyna sutyknułasia z 40-hadovym viełasipiedystam Juryjem Č. Jana zmahła padniacca na nohi, adkazvała na pytańni. «Chutkaja» dastaviła Natašu ŭ staličnuju balnicu chutkaj mieddapamohi. A tam nie zmahli vyjavić ciažkuju traŭmu i adpravili pacyjentku ŭ zvyčajnuju pałatu. Ranicaj dziaŭčyny nie stała.
Blizkija zahinułaj źviarnulisia ŭ pravaachoŭnyja orhany. Akazałasia, što ŭ pryjomnym pakoi Natašy nie zrabili navat tamahrafiju hałavy (tak zvanaje KT).
Tolki ŭ pačatku śniežnia stali viadomyja vyniki pravierki Śledčaha kamiteta. Svajakam zahinułaj paviedamili, što nichto nie vinavaty i kryminalnuju spravu nie raspačali.
Juryj Č., jaki sutyknuŭsia z Natašaj: Jechaŭ na viełasipiedzie z chutkaściu 2 km/h
Pastanova ab admovie ŭ kryminalnaj spravie ad samaha pačatku ździŭlaje niekatorymi momantami. 40-hadovy Juryj Č., jaki sutyknuŭsia z Natašaj Sak, paviedamiŭ śledčamu, što ŭ momant sutyknieńnia «jechaŭ nakatam z chutkaściu ŭ paru kiłamietraŭ za hadzinu». Para kiłamietraŭ - heta 2 km/h. Z takoj chutkaściu špacyrujuć piešachody. Adznačym, što ŭ miežach pravierki pravodziłasia navat trasałahičnaja ekśpiertyza, vyvučalisia paškodžańni na abodvuch viełasipiedach. Darečy, u vyniku ŭsioj karcinki sutyknieńnia ŭstanavić tak i nie zmahli.
Ale, vidać, nie sam fakt viełasipiednaj avaryi staŭ dla dziaŭčyny fatalnym.
Paśla pierałomu kostak čerapa miedyki nie zaŭvažyli ničoha padazronaha.
Blizkija Natalli Sak fatalnym ličać rašeńnie ŭrača-niejrachirurha Andreja T. z pryjomnaha pakoja balnicy. Tam pacyjentcy zrabili ŭsiaho tolki renthien, jaki pierałomu čerapa nie pakazaŭ. Choć tryvožnyja zvanočki zaŭvažyŭ jašče fielčar, jaki pryjechaŭ na miesca viełasipiednaj avaryi. «Strata prytomnaści i halucynatorna-biazhłuzdyja vykazvańni», — tak spasyłajucca na słovy miedyka z «chutkaj» ŭ «Pastanovie» śledčaha.
Užo ŭ balnicy doktar-niejrachirurh Andrej T. vystaviŭ Natašy papiaredni dyjahnaz: «Zakrytaja lohkaja čerapna-mazhavaja traŭma, strasieńnie hałaŭnoha mozhu, udar miakkich tkanak patylicy». I adpraviŭ u pałatu z pacyjentami, jakija išli na papraŭku. Na spravie, jak pakazała ekśpiertyza, paškodžańni dziaŭčyna atrymała sakrušalnyja. Śmierć, jak paviedamlajecca, nastupiła «ad zakrytaj čerapna-mazhavoj traŭmy, jakuju supravadžaŭ pierałom kostak čerapu, krovaźlićcia nad mazhavymi abałonkami i pad imi ŭ rečyva hałaŭnoha mozhu. Traŭma ŭskładniłasia raźvićciom acioku i źmiaščeńniem hałaŭnoha mozhu…».
Darečy, Minzdaroŭja pravodziła u balnicy chutkaj dapamohi svaju pravierku i ŭ kryŭdu svaju fłahmanskuju lačebnuju ŭstanovu nie dało. Voś jak śledčamu patłumačyli, čamu ŭrač mieŭ prava nie rabić Natalli tak zvanaje KT:
«Pavodle zahadu Minzdaroŭja №1110 kampjutarnaja tamahrafija hałaŭnoha mozhu źjaŭlajecca dadatkovym mietadam daśledavańnia i pravodzicca pa pakazańniach - pacyjentam, z uzroŭniem śviadomaści 12 bałaŭ i nižej (vymiareńni pravodziacca pa tak zvanaj škale komy Hłazha, - Jeŭraradyjo). U Sak N.V. pry pastupleńni było 15 bałaŭ».
«Usio skłałasia suprać hetaj dziaŭčynki. Bamžam robiać KT, a joj nie zrabili…»
Blizkija Natalli raspaviadali pra toje, što hutaryli z pacyjentami pałaty, dzie lažała dziaŭčyna. Z hetaj hutarki jany zrazumieli, što ŭ noč pierad śmierciu za jaje stanam asabliva nie nazirali. Było stračana zašmat času. A kali ranicaj Natalla «zachrypieła», u reanimacyi dziaŭčynu nie ŭratavali.
Ale ŭ «Pastanovie» śledčaha pra dopyty śviedak z pałaty razmovy nie viadziecca. Zatoje jašče adzin urač, jaki dziažuryŭ u adździaleńni, paviedamiŭ, što ŭ 6 hadzin 10 chvilin ranicy «paŭtorna ahladaŭ pacyjentku». Pavodle jaho viersii, Natalli mieraŭsia cisk, jana była ŭ śviadomaści, adkazvała na pytańni, skardziłasia na rvotu. A ŭ 8 ranicy da hetaha ž urača prybiehła miedsiastra i raptoŭna paviedamiła, što pacyjentka ŭ komie.
Pa voli losu ŭ złaščasnaj pałacie razam z Natallaj lažała Ł., jakaja ŭsio žyćcio prapracavała ŭ miedycynie. Źviazvajemsia z žančynaj i prosim uzhadać, ci ahladaŭ Natašu doktar a šostaj ranicy.
«Adnaznačna śćviardžać składana. Toje, što doktar zachodziŭ, mieraŭ cisk i razmaŭlaŭ z pacyjentkaj a- chutčej za ŭsio, heta nie zusim adpaviadaje praŭdzie. Ja jaho nie bačyła, ale i ja mahła spać, — razvažaje Ł. — Dziaŭčynka, kali jaje pryvieźli, ni na što nie skardziłasia. Adzinaje, što jana spačatku płakała, było ŭražańnie, što kapryźničaje. Ja padychodziła da jaje niekalki razoŭ, vyklikała miedsiastru, taja ŭvodziła joj preparaty. A potym ja vyśviatlała, što zdaryłasia ź joj u reanimacyi. Traŭma była, jak kažuć, niesumiaščalnaja z žyćciom. Kazali, što adziny šanc byŭ, kali b adrazu z pryjomnaha pakoja jaje dastavili na apieracyjny stoł. Ale ŭsio tady skłałasia suprać hetaj dziaŭčynki. Bamžam robiać KT, a joj nie zrabili…».
Jašče adna žančyna, A., pryjšła u pałatu a vośmaj ranicy, kab adviedać chvoruju maci. Jaje i napałochała toje, što Natalla dziŭna dychaje.
«Ja pryjšła i pytajusia ŭ žančyn: «Daŭno jana tak chrapie?» Adkazvajuć: «Tak, daŭno». I nichto nie prychodziŭ, — uzhadvaje A. — Zachodziła tolki sanitaračka, pamianiała łožak i syšła. Viedaju, što žančyny, jakija byli ŭ pałacie, davali pakazańni nakont taho, što ŭ pałatu nie zachodzili».
Sudova-miedycynski ekśpiert: tamahrafija hałavy nie dapamahła b
Sudova-miedycynski ekśpiert abhruntavaŭ toje, što daktary nie mahli pradkazać biadu, jakaja zdaryłasia z pacyjentkaj Sak. I tut usio składna. Na dumku ekśpierta, ranicaj u Natalli zdaryłasia »krytyčnaje parušeńnie stanu». A što tyčycca tamahrafii hałavy, to takoje daśledavańnie, pavodle łohiki ekśpierta, ničym by nie dapamahło: «Nie vykananaje KT nie paŭpłyvała b na taktyku viadzieńnia pacyjentki Sak u suviazi z adsutnaściu ačahovaj i značnaj ahulnamazhavoj simptamatyki».
Zrešty, pravierka pa fakcie hibieli Natalli Sak dahetul nie zavieršana. Užo niekalki miesiacaŭ ciahniecca tak zvanaja sudova-miedycynskaja ekśpiertyza jakaści akazańnia miedycynskaj dapamohi. Na momant padrychtoŭki materyjału ŭ Śledčym kamitecie nam nie zmahli paviedamić pra vyniki ekśpiertyzy z-za zahruzki supracoŭnikaŭ. Ale, uličvajučy «Pastanovu», jakuju atrymali blizkija Natalli Sak, pra niejkija parušeńni ŭ balnicy chutkaj mieddapamohi my tak i nie pačujem.
Sumnaja historyja z hibiellu Natašy — tolki adzin sa skandałaŭ hetaha hoda ŭ biełaruskaj miedycynie. Za dni da sutyknieńnia viełasipiedystaŭ u Minsku trahiedyja zdaryłasia ŭ bresckim filijale miedcentra «ŁADE». Dziaŭčyna pryjšła na pryjom da hiniekołaha, i paśla ŭviadzieńnia nie nazvanaha pakul preparata jana zahinuła praz anafiłaktyčny šok. Dniami stała viadoma pra vypadak na Viciebščynie. 11-hadovamu chłopčyku niaŭdała nakłali hips i nie adreahavali naležnym čynam na skarhi maleńkaha pacyjenta. U vyniku dziciaci amputavali levuju ruku.
