Hałoŭny dziaržaŭny sanitarny doktar Biełarusi nadzieleny pravam prymać rašeńni pra zabaronu ŭvozu na terytoryju krainy ci abaračeńnia na jaje terytoryi (u tym liku vyvazu) pradukcyi, jakaja nie adpaviadaje patrabavańniam zakanadaŭstva ŭ halinie sanitarna-epidemijałahičnaha dabrabytu nasielnictva.
Adpaviednaja norma praduhledžana prezidenckim ukazam № 567 ad 5 śniežnia «Ab dadatkovych mierach pa abaronie pravoŭ spažyŭcoŭ», tekst jakoha raźmieščany na Nacyjanalnym pravavym internet-partale.
Ukaz uskładaje na Ministerstva handlu kantrol za vykanańniem subjektami haspadarańnia, jakija ažyćciaŭlajuć realizacyju spažyvieckich tavaraŭ, zakanadaŭstva Respubliki Biełaruś ab cenaŭtvareńni, zachavaŭšy za Ministerstvam ekanomiki funkcyi pa kantroli za vykanańniem subjektami, jakija ažyćciaŭlajuć realizacyju inšych tavaraŭ, a taksama rabot, pasłuh, zakanadaŭstva ab cenach i cenaŭtvareńni.
Dakumient daje prava hałoŭnamu dziaržaŭnamu sanitarnamu doktaru, hałoŭnym dziaržaŭnym sanitarnym daktaram abłaściej i Minska prypyniać da 90 dzion pracu handlovaha abjekta, abjekta hramadskaha charčavańnia ŭ vypadku vyjaŭleńnia pa vynikach pravierki takoha abjekta parušeńniaŭ zakanadaŭstva ŭ halinie sanitarna-epidemijałahičnaha dabrabytu nasielnictva.
Ministr handlu i jaho namieśniki nadzielenyja pravam prypyniać da 90 dzion pracu handlovaha abjekta, abjekta hramadskaha charčavańnia ŭ vypadku ŭstanaŭleńnia pa vynikach pravierki takoha abjekta faktaŭ parušeńnia zakanadaŭstva ab cenaŭtvareńni, handli i hramadskim charčavańni.
Akramia taho, ministr handlu zmoža zabaraniać pracu handlovaha abjekta, abjekta hramadskaha charčavańnia ŭ vypadku nieŭstaranieńnia vyjaŭlenych pa vynikach pravierki parušeńniaŭ va ŭstanoŭleny ŭ pradpisańni termin abo ŭ vypadku paŭtornaha faktu ŭstanaŭleńnia parušeńniaŭ, jakija pasłužyli padstavaj dla prypynieńnia pracy takoha abjekta, na praciahu hoda z dnia prypynieńnia jaho pracy.
Ukaz byŭ raspracavany «ŭ metach uzmacnieńnia abarony pravoŭ spažyŭcoŭ, u tym liku pravoŭ na naležnuju jakaść i biaśpieku tavaraŭ, zabieśpiačeńnia vykanańnia subjektami haspadarańnia zakanadaŭstva ab cenaŭtvareńni».
