Alaksandr Łukašenka 28 śniežnia padpisaŭ dekret «Ab nieadkładnych mierach pa procidziejańni niezakonnamu abarotu narkotykaŭ». Dekret nabyvaje moc 1 studzienia 2015 hoda.
Jak paviedamlaje pres-słužba prezidenta, dekret nakiravany na zabieśpiačeńnie abarony žyćcia i zdaroŭja biełaruskich hramadzian, stvareńnie ŭmoŭ dla biaśpiečnaha raźvićcia dziaciej i moładzi, spynieńnie raspaŭsiudžvańnia narkamanii jak pahrozy dla demahrafičnaj biaśpieki i zdaroŭja nacyi. Dla dasiahnieńnia hetych metaŭ uvodzicca kompleks nieadkładnych mier pa procidziejańni niezakonnamu abarotu narkotykaŭ.
Ahulnyja namahańni i dadatkovyja paŭnamoctvy
Praduhledžvajecca maksimalnaja aktyvizacyja namahańniaŭ dziaržorhanaŭ, ustanoŭ adukacyi i achovy zdaroŭja, savietaŭ hramadskich punktaŭ achovy pravaparadku, dobraachvotnych družyn, hramadskich abjadnańniaŭ i inšych arhanizacyj.
Urad zaćvierdzić kompleksny płan mierapryjemstvaŭ, jaki ŭtrymlivaje efiektyŭnyja miery pa procidziejańni niezakonnamu abarotu narkotykaŭ, prafiłaktycy ich spažyvańnia i sacyjalnaj reabilitacyi asob, chvorych na narkamaniju. Pry hetym urad budzie abaviazany nie mienš čym adzin raz na hod u metach efiektyŭnaha procidziejańnia novym formam i mietadam raspaŭsiudžvańnia narkotykaŭ razhladać stan pracy ŭ nazvanaj śfiery na pasiadžeńniach prezidyuma Savieta Ministraŭ z nastupnym infarmavańniem ab vynikach prezidenta Biełarusi.
Praduhledžany taksama dadakovyja paŭnamoctvy MUS pa kaardynacyi dziejnaści dziaržaŭnych orhanaŭ u śfiery procidziejańnia niezakonnamu abarotu narkotykaŭ.
Da 25 hadoŭ pazbaŭleńnia voli
Uzmacniajecca kryminalnaja adkaznaść za złačynstvy, źviazanyja ź niezakonnym abarotam narkotykaŭ. Tak, pavialičvajecca maksimalny termin pazbaŭleńnia voli za dziejańni, źviazanyja sa zbytam narkotykaŭ pry najaŭnaści abciažarvalnych prykmiet (naprykład, učynienyja hrupaj asob, abo adnosna asabliva niebiaśpiečnych narkotykaŭ, abo ŭ bujnym pamiery, abo na terytoryi ŭstanovy adukacyi), — z 13 da 15 hadoŭ; zbyt narkotykaŭ zaviedama niepaŭnaletniamu — z 8 da 15 hadoŭ; dziejańni, źviazanyja sa zbytam narkotykaŭ, učynienyja arhanizavanaj hrupaj, — z 15 da 20 hadoŭ, a taksama za vyrab abo pierapracoŭku narkotykaŭ u łabaratornych umovach — z 8 da 20 hadoŭ.
Uvodzicca kryminalnaja adkaznaść za dziejańni, źviazanyja sa zbytam narkotykaŭ, što paciahnuła pa nieaściarožnaści śmierć čałavieka ŭ vyniku spažyvańnia im narkotykaŭ (ciahnie pazbaŭleńnie voli na termin ad 12 da 25 hadoŭ); niezakonnaje pieramiaščeńnie narkotykaŭ praź dziaržaŭnuju miažu Biełarusi pry adsutnaści prykmiet kantrabandy (ciahnie pazbaŭleńnie voli na termin da 12 hadoŭ); paŭtornaje na praciahu hoda paśla nakładańnia administracyjnaha spahnańnia za takoje ž parušeńnie spažyvańnie ŭ hramadskim miescy narkotykaŭ, abo źjaŭleńnie ŭ hramadskim miescy ŭ stanie narkatyčnaha apjanieńnia, abo znachodžańnie na pracoŭnym miescy ŭ pracoŭny čas u stanie narkatyčnaha apjanieńnia (ciahnie maksimalnaje pakarańnie ŭ vyhladzie abmiežavańnia voli terminam na 2 hady).
Źnižajecca ŭzrost nastupleńnia kryminalnaj adkaznaści za dziejańni, źviazanyja sa zbytam narkotykaŭ, z 16 da 14 hadoŭ.
Vinavatych pakarajuć i rublom
Uzmacniajucca miery administracyjnaj adkaznaści za pravaparušeńni, źviazanyja sa spažyvańniem narkotykaŭ. Uvodzicca administracyjnaja adkaznaść za źjaŭleńnie ŭ hramadskim miescy ŭ stanie narkatyčnaha apjanieńnia (štraf u pamiery ad 5 da 10 bazavych vieličyń); niepryniaćcie indyvidualnym pradprymalnikam abo jurydyčnaj asobaj mier pa niedapuščeńni na dyskatekach, u kulturna-zabaŭlalnych (načnych) kłubach, ihralnych ustanovach spažyvańnia narkotykaŭ abo ich zbytu, a taksama za nieinfarmavańnie orhanaŭ unutranych spraŭ ab vyjaŭlenych faktach učynieńnia takich dziejańniaŭ (štraf u pamiery ad 20 da 50 bazavych vieličyń).
Pavialičvajucca maksimalnyja pamiery štrafaŭ za znachodžańnie na pracoŭnym miescy ŭ pracoŭny čas u stanie narkatyčnaha apjanieńnia (z 10 da 12 bazavych vieličyń); spažyvańnie narkotykaŭ biez pryznačeńnia ŭrača ŭ hramadskim miescy (z 8 da 15 bazavych vieličyń).
Pieraškoda na šlachu «spajsaŭ»
Zamacoŭvajucca pałažeńni, jakija dazvalajuć apieratyŭna zabarianć abarot na terytoryi Biełarusi novych psichaaktyŭnych rečyvaŭ (kurylnych sumiesiej, «spajsaŭ») i pryciahvać da adkaznaści ich raspaŭsiudžvalnikaŭ. Praduhledžvajecca ŭdakładnieńnie paniaćcia anałahaŭ narkotykaŭ, jakoje dazvalaje adnosić da ich bolš šyroki śpiektr chimičnych rečyvaŭ. Maksimalna spraščajecca pracedura adniasieńnia novych psichaaktyŭnych rečyvaŭ da narkotykaŭ i ŭviadzieńnia tym samym zabarony na ich niezakonny abarot u Biełarusi.
Kantrol u Internecie
U suviazi z pahrozaj šyrokaha raspaŭsiudžvańnia narkotykaŭ z vykarystańniem interneta zamacoŭvajecca miechanizm apieratyŭnaha abmiežavańnia dostupu karystalnikaŭ internet-pasłuh da internet-resursaŭ, jakija ŭtrymlivajuć materyjały, nakiravanyja na niezakonny abarot narkotykaŭ. Rašeńni ab takim abmiežavańni prymajucca Mininfarmam na padstavie piśmovych paviedamleńniaŭ MUS i źjaŭlajucca abaviazkovymi dla vykanańnia ŭsimi pastaŭščykami internet-pasłuh na terytoryi Biełarusi.
U metach pavyšeńnia efiektyŭnaści prafiłaktyčnych i apieratyŭna-vyšukovych mierapryjemstvaŭ pa baraćbie ź niezakonnym abarotam narkotykaŭ, u tym liku ŭ internecie, svoječasovaha vyjaŭleńnia asob, zaniatych u niezakonnym abarocie narkotykaŭ, Dekretam uskładajucca abaviazki na ŭładalnikaŭ internet-resursaŭ analizavać źmiest ich internet-resursaŭ, nie dapuskać ich vykarystańnia dla raspaŭsiudžvańnia materyjałaŭ, nakiravanych na niezakonny abarot narkotykaŭ, a taksama infarmavać orhany ŭnutranych spraŭ ab sprobach raspaŭsiudžvańnia takich materyjałaŭ.
Taksama ŭskładajucca abaviazki na pastaŭščykoŭ internet-pasłuh z 1 studzienia 2016 hoda farmiravańnie i zachoŭvańnie aktualnych źviestak ab internet-resursach, jakija naviedvajuć karystalniki internet-pasłuh, u paradku, jaki vyznačajecca Minsuviazi.
Adzinaja sistema ŭliku narkamanaŭ
Z 1 sakavika 2015 hoda stvarajecca Adzinaja sistema ŭliku asob, jakija spažyvajuć narkatyčnyja srodki, psichatropnyja rečyvy, ich anałahi.
Abaviazkovaja identyfikacyja ŭładalnikaŭ elektronnych kašalkoŭ
Uvodzicca abaviazkovaja identyfikacyja ŭładalnikaŭ elektronnych kašalkoŭ, stvoranych u elektronnych płaciežnych sistemach, dziejnych na terytoryi Biełarusi (niezaležna ad pamieraŭ sum elektronnych hrošaj, jakija ličacca ŭ takich elektronnych kašalkach).
Izalacyja «narkabaronaŭ»
Uradu pradpisvajecca pryniać miery pa stvareńni asobnych papraŭčych ustanoŭ dla asob, asudžanych za złačynstvy, źviazanyja ź niezakonnym abarotam narkotykaŭ; arhanizacyi śpiecyjalizavanych lačebna-pracoŭnych prafiłaktoryjaŭ dla chvorych na narkamaniju abo taksikamaniju, a taksama pa stvareńni profilnych lačebna-vychavaŭčych ustanoŭ, jakija zabiapiečvajuć kompleksnuju reabilitacyju niepaŭnaletnich, jakija stajać na narkałahičnym uliku.
