U piatnicu, 2 studzienia, staršynia Łuhanskaj abłasnoj dziaržaŭnaj administracyi Hienadź Maskal pabyvaŭ u haradach Załatoje i Hornaje, jakija napiaredadni abstralali z artyleryi i sistem «Hrad» kazaki tak zvanaha Usievialikaha vojska danskoha.
Pra heta paviedamiła pres-słužba spadara Maskala, pieradaje NBN.
«Reaktyŭnyja i artyleryjskija snarady padali i vybuchali prosta ŭ žyłym siektary. U kvartale Soniečnym (h. Załatoje) adzin sa snaradaŭ trapiŭ u šmatpaviarchovy dom, razburyŭšy padjezd. Na ščaście, doma ŭ hety čas nikoha nie było, tamu haspadary nie paciarpieli. Adnak askołkami ad škła paranienyja dvoje dziaciej, jakim była akazanaja miedycynskaja dapamoha na miescy. Stan dziaciej narmalny, pahrozy žyćciu niama. Vybuchovymi chvalami ad snaradaŭ u Załatym paškodžanyja niekalki šmatpaviarchovak, a taksama haradski saviet i šmatprofilnaja himnazija (tut raźbityja vokny). Tolki cudam nichto ź ludziej nie paciarpieŭ», — havorycca ŭ paviedamleńni.
U Hornym artyleryjskimi snaradami i «Hradami» paškodžanyja dva žyłyja damy. Paranienych i zahinułych siarod mirnych žycharoŭ niama.
«Ni ŭ Załatym, ni ŭ Hornym ŭ zonie abstrełu i blizka niama ŭkrainskich siłavikoŭ. Hetyja tak zvanyja kazaki, jakija akapalisia ŭ Kiraŭsku i nazyvajuć siabie Danskaja Respublika, abo ź pierapoju stralajuć kudy zaŭhodna, niahledziačy na mirnych žycharoŭ, abo naŭmysna palać z harmat pa žyłych kvartałach, kab zabić i pakalečyć ludziej», — adznačyŭ spadar Maskal.
Jon paabiacaŭ adłoŭlivać kazakoŭ pa adnym i prymušać ich adnavić usie, što ciapier razburana. «Hetyja tak zvanyja kazački buduć pracavać na adnaŭleńni haspadarki i infrastruktury Łuhanskaj tak, jak u svoj čas pracavali pałonnyja niemcy paśla Druhoj suśvietnaj. Toje, što budzie mienavita tak, u mianie asabista niama nijakich sumnievaŭ», — padkreśliŭ hubiernatar.
