Adzinaj pierśpiektyvaj Rasii ŭ vypadku paśpiachovaj jeŭraintehracyi Ukrainy budzie źmirycca z hetaj realnaściu i ŭ vyniku samoj stać častkaj Jeŭropy. U advarotnym vypadku RF pieratvorycca ŭ spustošanaha satelita Kitaja.
Pra heta ŭ efiry telekanała Inter zajaviŭ amierykanski dziaržaŭny dziejač, palitołah i były daradca pa nacyjanalnaj biaśpiecy ZŠA Źbihnieŭ Bžezinski.
«Ukraina pryśviaciła siabie svabodzie ŭ takoj miery, što luby, chto zachoča pakvapicca na jaje svabodu, budzie viedać: jon vielmi surjozna ryzykuje. Ale Ukraina pavinna dakazać, što jana na samaj spravie vyrašyła być častkaj jeŭrapiejskaha śvietu. Kali ŭ jaje atrymajecca, adzinaj pierśpiektyvaj Rasii budzie źmirycca z hetaj realnaściu i ŭ vyniku samoj stać častkaj Jeŭropy. Kali jana hetaha nie zrobić — pieratvorycca ŭ spustošanaha satelita Kitaja. Ja nie dumaju, što heta dobraja pierśpiektyva dla Rasii».
Na dumku Bžezinskaha, Rasija moža pasprabavać stać impieryjaj, ale «heta budzie pravał».
«Impieryja tolki ŭ tym sensie budzie paśpiachovaj, kali Rasii ŭdasca padparadkavać Ukrainu. Ale dasiahnuć hetaha vielmi składana z-za taho, jak vy nastrojenyja, z-za taho, što Zachad davoli vyrazna daje zrazumieć, što jamu nie ŭsio adno. Ale nie čakajcie, što Zachad budzie zmahacca za vas — heta hałoŭnaje, što vy pavinny zrazumieć. U vas pavinna być žadańnie zrabić usio nieabchodnaje, kab abaranić svaju svabodu, i tady tak ci inakš Zachad padtrymaje vas i situacyja pačnie palapšacca. Pa-pieršaje, u vas jość padtrymka śvietu, demakratyčnych krain, i asabliva ZŠA, jakija bolš adkrytyja i addanyja hetaj spravie. Pa-druhoje, usio zaležyć ad ukraincaŭ, asabliva, novaha pakaleńnia, jakija naradzilisia hramadzianami Ukrainy, a nie Savieckaha Sajuza», — ličyć jon.
Były daradca prezidenta ZŠA padkreśliŭ, što Zachad pavinien pierakanacca ŭ tym, što Ukraina zmoža spravicca z karupcyjaj, zachavańniem demakratyčnych pryncypaŭ i dasiahnuć pośpiechaŭ u ekanamičnym raźvićci.
«Heta vyklik, jaki vy pavinny pieraadoleć. I damahajučysia hetaha, vy ŭdaskanalicie vašyja zdolnaści damaŭlacca ŭ kanstruktyŭnaj i ŭ kančatkovym vyniku stanoŭčaj maniery z Rasijaj, jakoj daviadziecca prajści praz toj ža praces, kali jana choča stać sučasnym hramadstvam, a nie zahraznuć u adstałaści i karupcyi, šmat u čym zaležačy ad uschodniaha partniora, jaki stanovicca tolki macniej», — padkreśliŭ Bžezinski.
«Budučy aptymistam, ja pavinien kazać praŭdu maim ukrainskim siabram. Vy pavinny vykaranić karupcyju, jakaja demaralizavała nie tolki vašu ekanomiku, ale i vaša paŭsiadzionnaje žyćcio. I navat demaralizavała vašyja ŭzbrojenyja siły.
I ciapier vy pavinny źmirycca z faktam, što ŭ nastupnyja 10 hadoŭ vy pavinny budziecie achviaravać šmat čym, kab stać častkaj Jeŭropy. Upeŭnieny, vy budziecie vielmi paśpiachovyja ŭ Jeŭropie», — dadaŭ jon.
