Na achoŭnika mahiloŭskaj kramy «777» Dźmitryja Procharava paskardziŭsia ŭ milicyju raspaŭsiudžvalnik haziety «Novy čas» piensijanier Viktar Čarauchin, jaki zajaŭlaje, što Procharaŭ źniavažyŭ jaho, nazvaŭšy «fašystam». Milicyja ŭhledzieła ŭ dziejańniach achoŭnika fakt źniavahi i pieradała spravu ŭ sud.
U sudzie Procharaŭ svajoj viny nie pryznaŭ. Jon admoviŭsia i pajści na prapanavanaje sudździoj Kastryčnickaha rajona abłasnoha centra Taćcianaj Michajłavaj prymireńnie z Čarauchinym. Procharaŭ zajaviŭ, što nie źnievažaŭ, nazyvajučy fašystam, Čarauchina. I hetamu, śćviardžaje jon, jość šmat śviedak. Nivodzin ź ich na sudovaje pasiadžeńnie, praŭda, nie źjaviŭsia.
Procharaŭ davodziŭ sudu, što Čarauchin pieradavaŭ hazietu achoŭnikam i što jon doŭha pilnavaŭ raspaŭsiudžvalnika, kab skazać, što nasić vydańnie nie treba.
«Jon raspaŭsiudžvaŭ hazietu «Novy čas», jakaja ŭtrymlivaje nacyscki, fašyscki i nacyjanalistyčny źmiest suprać prezidenta i našaj respubliki.
Ja ciaham doŭhaha času sprabavaŭ jaho vyłavić, ale jon davaŭ hazietu i ŭciakaŭ. Kali mnie pieradali, što jon pryjšoŭ, ja padyšoŭ i skazaŭ jamu: «Dziadula, nie nasicie bolej haziety fašysckija i nacyjanalistyčnyja». Jon u adkaz pačaŭ aźviaracca. Ja jaho tady vykinuŭ z kramy — voś i ŭsio. Jon tady skazaŭ, što budzie nasić ich i dalej», — raspavioŭ u sudzie Procharaŭ.
Kali Viktar Čarauchin pačaŭ zadavać achoŭniku pytańni na biełaruskaj movie, toj adrazu aburana zajaviŭ, što adkazvać na ich pa-biełarusku nie budzie. Adkazvaŭ pa-rusku.
Viktar Čarauchin kazaŭ na sudzie, što raspaŭsiudžvaje hazietu «Novy čas» šmat hadoŭ i ŭ jaho była vusnaja damoŭlenaść z adnym z achoŭnikaŭ kramy, što jon budzie nasić vydańnie dla jaho kaleh.
Prynosiŭ zaŭždy adzin asobnik. Siarod pakupnikoŭ haziety nie raspaŭsiudžvaŭ, bo nie mieŭ, pavodle jaho słoŭ, takoha prava — nie damaŭlaŭsia na hety kont z haspadarom kramy.
U dzień, kali zdaryŭsia incydent, Čarauchin zajšoŭ u kramu, kab nabyć, jak jon kazaŭ, pradukty. Pavodle słoŭ paciarpiełaha, Procharaŭ niadaŭna pracavaŭ u kramie. «Jon ubačyŭ mianie i zajaviŭ, kab ja nie raspaŭsiudžvaŭ fašysckija haziety. Ja tady aburyŭsia. Jak, kažu, fašysckija? Jana nie fašysckaja. Jana zarehistravanaja ŭ Ministerstvie infarmacyi. Ja maju prava jaje raspaŭsiudžvać… Jon parušyŭ maje pravy. Źniavažyŭ mianie. Pieršaje, što ź jaho vusnaŭ prahučała, heta: «Nie raspaŭsiudžvaj fašysckaj haziety». Heta aznačaje, što ja fašyst. Potym jon mianie vyvałak na vulicu. Ja padviarnuŭ nahu i padrapaŭ ruku», — davodziŭ sudu Viktar Čarauchin.
Pavodle słoŭ raspaŭsiudžvalnika, učastkovy, jaki afarmlaŭ pratakoł, adhavaryŭ jaho źviartacca ŭ sudmiedekśpiertyzu, kab zafiksavać cialesnyja paškodžańni.
Čamu Procharaŭ zrabiŭ vysnovu, što zarehistravanaje vydańnie «Novy čas» — «fašysckaje», zastałosia niajasnym. Sud nie staŭ hetaha vyśviatlać.
U sudzie Procharaŭ kazaŭ, što čytaŭ hazietu. Na pytańni žurnalista paśla sudovaha pasiadžeńnia adkazvać admoviŭsia, tolki zhadaŭ pra «banderaŭcaŭ» i zaŭvažyŭ, što «padziei va Ukrainie pačynalisia z takoha».
U sudovym pracesie abvieščany pierapynak da 12 studzienia, bo nie pryjšli śviedki. Sudździa pryhraziła Procharavu, što kali śviedki ź jaho boku nie źjaviacca, to ich pryciahnuć da adkaznaści.
Kamientujučy sudovy praces, Viktar Čarauchin zaznačyŭ, što Dźmitryj Procharaŭ — achviara rasijskaj prapahandy. «Vidać, inšaj infarmacyjaj jon nie vałodaje, tamu ŭ jaho adnabokaje mierkavańnie: «fašysckaja hazieta» — i ŭsio. U nas ciapier usio duža nasyčana rasijskaj infarmacyjaj. A mnohija kamientatary vykazvajucca, što mienavita pucinski režym blizki da fašysckaha», — skazaŭ jon.
Kidać raspaŭsiudžvańnie niezaležnaj presy Viktar Čarauchin nie źbirajecca. Kaža, što kanfliktnych situacyjaŭ, pakul zajmajecca hetym, było niamała, ale z hetkaj ahresijaj, jak ad achoŭnika ŭ kramie, jon nie sutykaŭsia.
