BiełaPAN
Prajektam dekreta ab stymulavańni zaniataści prapanujecca abaviazać pracazdolnych hramadzian, jakija nie ŭdzielničajuć u finansavańni dziaržaŭnych raschodaŭ, vypłačvać adnarazovy zbor.
Adpaviedny dakumient abmiarkoŭvaŭsia 13 studzienia na naradzie ŭ Łukašenka. «Prezidentam dadzieny daručeńni ab dapracoŭcy prajekta dekreta. Kiraŭnik dziaržavy daručyŭ, kab dakumient byŭ vyčarpalny i paŭnacenny dla prymianieńnia biez usialakich adsyłačnych norm», — raskazaŭ žurnalistam namieśnik kiraŭnika Administracyi prezidenta Valeryj Mickievič.
Prajektam dakumienta prapanujecca miechanizm, u adpaviednaści ź jakim pracazdolnyja hramadzianie, jakija na praciahu bolš jak paŭhoda nie vypłačvali padatki i, adpaviedna, nie prymali ŭdzieł u finansavańni dziaržraschodaŭ, buduć abaviazany raz u hod vypłačvać adnarazovy zbor.
Na hety čas prapanujecca spahaniać jaho ŭ pamiery 20 bazavych vieličyń [na siońnia — 3,6 młn rubloŭ — NN]. Za ŭchileńnie, niasvoječasovuju abo niapoŭnuju vypłatu zboru budzie praduhledžana administracyjnaja adkaznaść.
Adnačasova budzie vyznačany šerah katehoryj hramadzian, jakich vyzvalać ad vypłaty zboru, naprykład, niepracazdolnych abo tych, chto zajmajecca vychavańniem dziaciej.
Pry hetym razmova idzie ab tym, što adpaviedny zbor nie budzie źjaŭlacca niejkaj lehalizacyjaj, naprykład, niezakonnaj pradprymalnickaj dziejnaści, kali čałaviek pracuje, ale nie vypłačvaje padatki. U vypadku vyjaŭleńnia takich faktaŭ u adnosinach da vinavatych buduć prymacca miery, praduhledžanyja dziejučym zakanadaŭstvam.
