kommersant.ru
Da pačatku 2015 surjozna vyrasła kolkaść tych, chto ličyć Rasiju bahataj, raźvitaj i svabodnaj krainaj, vynikaje z dakładu fondu «Hramadskaja dumka». Hramadzianie ŭpeŭnienyja, što i ŭ śviecie RF ličać pieradavoj krainaj, ale zamiežniki staviacca da jaje drenna i pry hetym bajacca. U apošnim nie sumniavajucca 86% respandentaŭ.
Bolšaść rasiejcaŭ (69%) upeŭnieny, što žyvuć u «raźvitaj, pieradavoj krainie», vynikaje z dakładu fondu «Hramadskaja dumka» (FHM) «Rasija ŭ novaj realnaści: vobraz krainy i reputacyja ŭłady». Usiaho 23% miarkujuć, što Rasija — «nieraźvitaja i adstałaja». U sakaviku 2012 hoda dumki ab tym, raźvitaja Rasija kraina ci nie, padzialilisia praktyčna paroŭnu (43% ličyli, što žyvuć u «pieradavoj krainie», 45% — što RF «adstałaja»).
Prykładna hetak ža aceńvajuć rasiejcy i ŭsprymańnie RF zvonku: 59% upeŭnienyja, što ŭ śviecie Rasiju taksama ličać «raźvitaj, pieradavoj krainaj» (u sakaviku 2012 hoda tak kazali ŭsiaho 44%). Pra toje, što za miažoj RF usprymajuć jak «adstałuju krainu», kažuć 27% (40% ličyli tak u sakaviku 2012 hoda).
Kiraŭnik FHM Alaksandr Osłan ličyć, što «samapavahu, jakaja sfarmavałasia ŭ 2014 hodzie» na fonie paharšeńnia mižnarodnych adnosin, dapamoža ŭładzie pieraadoleć kryzis. «Budzie baraćba cen z samapavahaj. Ja staŭlu na samapavahu», — zajaviŭ spadar Osłan, pradstaŭlajučy dakład. Pakul samapavahi u rasiejcaŭ sapraŭdy dastatkova. Tak, 66% rasiejcaŭ ličać, što žyvuć u bahataj krainie (ab biednaści kažuć 27%). Za miažoj, upeŭnienyja 77%, Rasiju taksama ličać bahataj (14% kažuć pra imidž RF jak biednaj krainy). Pieravažnaja bolšaść (78%) dumaje, što Rasija «samastojnaja ŭ svaich rašeńniach i dziejańniach i nie zaležyć ad inšych krain».
Bolš za toje, 73% apytanych miarkujuć, što RF — svabodnaja kraina (try hady tamu tak kazali 54%). Z 2012 hoda dola tych, chto nazyvaje Rasiju «niesvabodnaj», skaraciłasia z 34% da 18%. Bolšaść (61%) rasiejcaŭ ŭpeŭnienaja, što i ŭ śviecie Rasiju ŭsprymajuć jak «svabodnuju krainu».
Pry hetym 48% pierakananyja, što ŭ śviecie da RF staviacca drenna, — heta samaja vialikaja dola za čas nazirańniaŭ z 2003 hoda. Tolki 36% dumajuć, što za miažoj staŭleńnie da RF dobraje. Pryčynami paharšeńnia adnosiny da Rasii ŭ śviecie respandenty FHM nazvali «situacyju va Ukrainie» (8%), «uviadzieńnie sankcyj» (6%), «niezaležnuju źniešniuju palityku RF» (5%), «dałučeńnie Kryma» (4%). Tyja, chto dumaje, što da Rasii stali stavicca lepš, ličać heta pierš za ŭsio «zasłuhaj Uładzimira Pucina».
Adnak drennaje staŭleńnie da RF, miarkujučy pa adkazach respandentaŭ FHM, nie značyć, što ŭ śviecie jaje nie pavažajuć. 68% kažuć pra pavahu Rasii za miažoj. Ale acenka RF jak «pavažanaj krainy», miarkujučy pa dadzienych sacyjołahaŭ, moža być pradyktavana pierš za ŭsio jaje rezkaj źniešniaj palitykaj: 86% pierakananyja, što za miažoj Rasiju bajacca.
Apytańnie FHM było praviedzienaje 27-28 śniežnia siarod 1,5 tys. respandentaŭ u 43 rehijonach RF.
