20 śniežnia Mitrapalit Minski i Zasłaŭski, Patryjaršy Ekzarch usioj Biełarusi Pavieł pravioŭ vialikuju pres-kanfierencyju z nahody hadaviny zaniaćcia svajoj pasady.
Bolšuju častku svajoj pres-kanfierencyi mitrapalit pryśviaciŭ pytańniu mahčymaj samakiravanaści Biełaruskaj pravasłaŭnaj carkvy, jakaja ŭpieršyniu ŭspłyła ŭ ŚMI 16 śniežnia 2014 hoda.
Mitrapalit patłumačyŭ, što padčas schodu jeparchii Minskaj mietrapolii adzin «nadzvyčaj nabožny čałaviek uklučyŭ mikrafon i, možna skazać, u žyvym efiry pieradavaŭ toje, što adbyvajecca na pracoŭnaj sustrečy».
U vyniku vyjšła tak, apraŭdvaŭsia ijerarch, što «nieapracavany, niekanstruktyŭny, dyskusijny materyjał byŭ pieradadzieny šyrokaj hramadskaści. Heta kananičnaje i dyscyplinarnaje parušeńnie vyklikała ceły šerah niezdarovaha staŭleńnia i dyskusij», — dadaŭ mitrapalit. Pa jaho słovach, kali b rašeńnie było ŭzhodniena schodam, jaho nieabchodna było b dać na abmierkavańnie Sinodu, a ŭžo potym — Patryjarchu.
Tamu «ŭ suviazi z reakcyjaj hramadstva» mitrapalit vyrašyŭ « źniać heta pytańnie z paradku dnia». Pry hetym varta zaŭvažyć, što Pavieł nie kankretyzavaŭ, što hutarka idzie pra situacyju z abmierkavańniem niezaležnaści BPC ad RPC i ŭžyvaŭ raspłyvistaje «hetaje pytańnie».
«Usie rašeńni Sinoda słužać dabru i adzinstvu našaj carkvy. U dadzienym vypadku ciahnik pajšoŭ pa niezapłanavanaj kalainie», — padsumavaŭ mitrapalit.
Pra biełaruskuju movu
Mitrapalit u adkazach na pytańni žurnalistaŭ zakranuŭ i temu biełaruskaj movy ŭ pravasłaŭnaj carkvie.
«Što tyčycca ŭviadzieńnia biełaruskaj movy ŭ bahasłužeńni, to zabaronaŭ carkoŭnych ci kananinčnych na heta nie isnuje. Adnak adrazu chaču paprasić: nie treba źbirać podpisy, heta nie carkoŭny mietad. Kali treba, źviarniciesia da nastajaciela. A nastajaciel jak dobry pastyr musić vyrašyć, ci budzie heta słužyć na karyść ci nie. Tamu što byli vypadki, kali nastajaciel pačynaŭ słužyć pa-biełarusku, a ludzi sychodzili, bo nie razumieli. U takim razie treba dumać i vypracoŭvać niejkija inšyja padychody», — patłumačyŭ mitrapalit.
Pra siabie Pavieł skazaŭ, što ŭ jaho jość spakusa nie vučyć biełaruskuju movu, bo vakoł usie razmaŭlajuć pa-rasijsku:
«Kali ja apynuŭsia ŭ ZŠA, u asiarodku, dzie razmaŭlajuć pa-anhlijsku, ja byŭ vymušany volaj-niavolaj štości vučyć. Adnak tut usie razmaŭlajuć pa-rasiejsku, i ŭ mianie jość vialikaja spakusa nie vučyć movu. Kali b usie my razmaŭlali pa-biełarusku, ja b vučyŭ movu chutka. A da mianie padychodzili niekalki žančyn, pytalisia na dobraj biełaruskaj, ci razumieju ja. A ja kažu, što ja jak toj ciućka: usio razumieju, ale skazać ničoha nie mahu».
«Tamu razumieć razumieju, a razmaŭlać mnie jašče ciažka», — skazaŭ Mitrapalit pa-biełarusku.
Karykatury
Nie abyšłosia i biez pytańnia pra terakt u redakcyi francuzskaj satyryčnaha časopisa Charlie Hebdo.
Adkazvajučy na pytańnie nakont dazvolenaści karykatur na relihijnuju tematyku, mitrapalit Pavieł zasiarodziŭ uvahu na vinavataści karykaturystaŭ u pravakavańni viernikaŭ. Pra niedapuščalnaść zabojstva čałavieka navat praz abražanyja pačućci Pavieł nie ŭzhadaŭ:
«Ja nie viedaju, z čym heta źviazana, Žyli ludzi hadami, viakami, žyli pobač, siabravali, pracavali, mieli znosiny. I raptam źjaŭlajucca karykatury. Ja nie viedaju, jakaja meta hałoŭnaja. Kali heta pakazać svajo majsterstva mastackaje, vy sami možacie ŭbačyć: jano na takim uzroŭni, što i mastactvam nielha nazvać. A voś varožaść i nianaviść jano pasieje. I voś chočacca zadać pytańnie: a navošta, kamu heta patrebna? Nu kamu? Čaho jany dabilisia hetym?»
«Siońnia lubaja karykatura, luboje źniesłaŭleńnie źjaŭlajecca niejkaj pravakacyjaj. Značyć jość sproba razhajdać ład žyćcia ludziej, pasvaryć ludziej. Ale navošta było pravakavać? Vy ž razumieli, što namierana pravakujecie ludziej! Tamu ja liču, heta ci to pravakacyja, ci to niedalnabačnaść ludziej, ci to złaja zaduma, skiravanaja, kab spravakavać supraćstajańnie ŭ hramadstvie», — skazaŭ mitrapalit.
Ab prodažy śviatoj vady
Mitrapalit skazaŭ niekalki słovaŭ i pra finansavy bok carkoŭnaj dziejnaści. Pa jaho słovach, BPC uparadkavała niekatoryja momanty hrašovych adnosin. Tamu, naprykład, ciapier va ŭsich źbiralnikaŭ miłaściny jość paśviedčańnie, jakoje dakazvaje, što źbiralnik nie machlar i sabranyja srodki buduć vykarystany na patreby carkvy.
Prodaž śviatoj vady Mitrapalit nazvaŭ «niedapuščalnym»: «Heta nonsens pradavać śviatuju vadu.
Heta hłupstva.
Kali vy chočacie dapamahčy, dapamahajcie, ale kali ja daviedajusia što pradajuć śviatuju vadu, ja budu karać. Inšaja sprava, vy možacie rastłumačyć i skazać, što vydatkavali hrošy na jomistaści, na toje, kab vadu pryvieźci, i paprasić dobraachvotnaje achviaravańnie. Ale pradavać śviatuju vadu niedapuščalna».
