Praz dva miesiacy Hrecyi pahražaje defołt. Heta vykliča padzieńnie jeŭra adnosna dalara, turbulentnaść u suśvietnaj finansavaj sistemie plus, mahčyma, dalejšaje źnižeńnie cenaŭ na naftu. Toje ekanamičnyja nastupstvy, jakija adabjucca i na Biełarusi.
Ale naša kraina moža sutyknucca i z palityčnymi kansiekviencyjami hałasavańnia na addalenaj pieryfieryi ES, u krainie suvymiernaha ź Biełaruśsiu pamieru.
U Jeŭrasajuzie rašeńni prymajucca kansensusam. Tamu radykalna levy ŭrad Hrecyi zmoža błakavać lubyja rašeńni ES, skiravanyja na strymlivańnie rasijskaha nastupu va Ukrainie ci na abaronu pravoŭ čałavieka ŭ Biełarusi.
U Jeŭraparłamiencie Siryza ŭvachodzić u jeŭrapiejski błok «Jeŭrapiejskija levyja». Lidar Siryza Aleksis Cypras navat byŭ kandydatam ad hetaha zhurtavańnia na pasadu kiraŭnika Jeŭrakamisii. A Jeŭrapiejskija levyja tradycyjna vystupajuć suprać sankcyj da Rasii za jaje ahresiju va Ukrainie. Jany ŭskładajuć vinu za padziei ŭ Krymie i Danbasie na centralny ŭrad Ukrainy.
Taksama levyja hałasavali suprać abmiežavalnych mieraŭ u dačynieńni da łukašenkaŭcaŭ za parušeńni pravoŭ čałavieka ŭ Biełarusi. Hałoŭny vorah dla jeŭrapiejskaj radykalnaj lavicy — heta ZŠA i pravyja siły ŭ Jeŭropie. U zmahańni ź imi jany hatovyja jadnacca navat z dyktatarami. Čaves — kumir jeŭrapiejskich levych, a Pucin — nadzieja na źmienu status-kvo na suśvietnaj palityčnaj arenie. Niekatoryja z palityčnych siłaŭ, što ŭtvaryli Siryzu, atrymlivali finansavańnie z Maskvy jašče ŭ savieckija časy.
Jak pradkazvajuć sacyjołahi, levaradykalny błok Siryza vyjhraje siońniašnija vybary. Pytańnie ŭ tym, ci ŭdasca jamu dabicca absalutnaj bolšaści, ci spatrebicca padtrymka levacentrysckich partyj dla stvareńnia ŭradavaj kaalicyi.
Jak miarkujecca, druhoje miesca zojmuć kansiervatary z «Novaj demakratyi». Prachadny barjer majuć adoleć taksama «treciaja siła» z novaj partyi «Raka», kamunisty-stalinisty, nieanacysty, nacyjanalisty i partyja sacyjał-demakratyčnaha tołku PASOK.
Palitołahi nie dajuć rady pradkazać, jak buduć razhortvacca padziei paśla pieramohi Siryzy. U palityčnych kołach Hiermanii nie vyklučali varyjantu vychadu Hrecyi ź jeŭrazony i Jeŭrasajuza ŭvohule — pieršy taki vypadak u historyi ES.
Bolšaść analitykaŭ u samoj Hrecyi dapuskajuć, što paśla prychodu da ŭłady Siryza nie budzie vykonvać bolšaści pieradvybarnych abiacańniaŭ i praciahnie vykanańnie patrabavańniaŭ mižnarodnych kredytoraŭ, kab utrymacca ŭ jeŭrazonie. Dźvie traciny hrekaŭ chočuć zachavańnia jeŭra. Hałasavańnie za Siryzu — pratestnaje pa svaim charaktary.
Kamunisty i radykały ŭvachodzili va ŭradavyja kaalicyi ŭ jeŭrapiejskich krainach i raniej. Heta zdarałasia ŭ Francyi pry Fransua Miteranu, u Italii ŭ 1990—2000-ja. Heta nie pryviało da dezintehracyi ES, ale nakładvała adbitak na palityku sajuza. Roźnica ŭ tym, što Siryza — samaja radykalnaja palityčnaja siła, jakaja kali-kolviek prychodziła da ŭłady ŭ krainie ES. Akramia taho, Hrecyja — pravasłaŭnaja kraina, a asłableńnia Jeŭrasajuza dabivajecca Kreml.