23 studzienia novy premjer-ministar Ukrainy sustreniecca ŭ Maskvie sa svaim rasiejskim kaleham. Hetaj sustrečy papiaredničali padziei, što śviedčać pra pačatak novaj hazavaj vajny.
Pierad sustrečaj kiraŭnikoŭ uradaŭ baki abmianialisia niepryjemnymi zajavami, paviedamlaje «Kommiersant-Ukraina». Pavodle vydańnia, Rasieja paviedamiła, što praź pieraboi ź siarednieazijackim hazam, pastaŭlaje va Ŭkrainu ŭłasnaje błakitnaje paliva, dziakujučy čamu ŭkraincam daviadziecca zapłacić razam z praterminavanaj zapazyčanaściu $830 młn. Novy kiraŭnik «Naftahaza» Aleh Dubina, pavodle infarmacyi hazety, užo siońnia ŭ časie pieramovaŭ maje prapanavać «Hazpramu» novyja ŭmovy tranzytu paliva praz terytoryju Ŭkrainy. Zhodna im, ukrainski bok žadaje pavialičyć staŭku za prakačku 1 tys. kub. m rasiejskaha hazu ŭ Eŭropu pa 100 km terytoryi krainy z $1,7 da $9,32. Akramia taho Kijeŭ budzie damahacca likvidacyi pasiarednickaj kampanii «RosUkrEnergo», a taksama abmiežavańnia dziejnaści «UkrHaz-Enierho» na ŭnutranym rynku, čyje 50% aktyvaŭ naležać pieršaj kampanii. Vyhladaje na toje, što novy ŭrad Ukrainy nia tolki žadaje atrymać dadatkovyja prybytki šlacham pavieličeńnia ŭ 5,5 razoŭ myta za tranzyt, ale j pazbavić manapalista prybytkaŭ ad prodažu hazu na ŭnutranym rynku.
«Hazpram» paćvierdziŭ hatoŭnaść pierajści da naŭprostavych pastava hazu va Ŭkrainu i nazvaŭ canu sastupki — $7,43 młrd dadatkovych płaciažoŭ. Ukraina hatovaja da takoha pavarotu, zajaviŭ adzin z profilnych čynoŭnikaŭ. Pry ŭmovie, što tranzyt rasiejskaha hazu pa terytoryi Ŭkrainy budzie adbyvacca pavodle prapanovy A. Dubiny: u takim razie prybytak ad tranzytu akupić vydatki ad sastupki «Hazpramu».
Valery Nieścieraŭ z «Trojka Diałoh» miarkuje, što nastojlivaść Ukrainy moža pryvieści da zryvu pieramovaŭ. Dyrektar Instytutu hlabalnych stratehij Vadzim Karasioŭ ličyć, što Julija Cimašenka śviadoma idzie na kanfrantacyju. Ekspert pieraścierahaje nakont mahčymaha paŭtoru sytuacyi, što ŭźnikła ŭ studzieni 2006 h., kali Rasieja adklučyła Ŭkrainie haz.
