Pahadnieńnie, dasiahnutaje ŭ Minsku pa vynikach pieramoŭ «narmandskaj čaćviorki», vielmi chistkaje, vyklikaje šmat pytańniaŭ i moža być realizavanaje tolki pry vialikim žadańni ŭsich bakoŭ, najaŭnaść jakoha sumnieŭnaja. Takuju dumku vykazvaje aŭtarytetny niamiecki štotydniovy časopis Der Spiegel («Lusterka»).
Sustreča ŭ Minsku stała hałoŭnaj temaj śviežaha numaru. Materyjały publikujucca pad ahulnym zahałoŭkam «Biełaruskaja noč».
«Vynikam Minska stała pieradyška. Nie bolš za toje, ale chacia b štości», — piša časopis.
«Na praciahu 17 hadzin u Pałacy niezaležnaści na kanu stajała mnohaje, — zaznačaje Der Spiegel. — Na piarednim płanie byli demarkacyjnyja linii, miascovyja vybary, spynieńnie krovapralićcia na ŭschodzie Ukrainy. Ale nasamreč abmiarkoŭvalisia značna bolš hłabalnyja pytańni. Razmova pra Rasiju i Jeŭropu, pra toje, ci ŭdasca paźbiehnuć praciahłaj kanfrantacyi z Rasijaj Uładzimira Pucina. Razmova pra palityku ŭ dačynieńni da ahresara: ci možna iści Pucinu na sastupki? Dzie kampramis stanovicca palitykaj prymireńnia?»
Časopis pryvodzić niekatoryja techničnyja detali pieramoŭ: spačatku niamieckaja i francuzskaja delehacyi sustrelisia ŭ pasolstvie Hiermanii ŭ Minsku, zatym była źvierka pazicyj z ukrainskim bokam i ŭžo paśla hetaha pačalisia pieramovy z Rasijaj. Taki ž ałharytm vykarystoŭvaŭsia i raniej. «U paradnaj zale pieramovy iduć usiu noč, biez paŭz. Inšy raz niejki ŭdzielnik pačynaje dramać, pakłaŭšy hałavu na stoł. Na stale šmat ałkaholu, adnak Anhieła Mierkiel da jaho nie dakranajecca. Tanalnaść razmovy spakojnaja, zaznačajuć udzielniki. Ale potym robicca hołasna, pamiž Pucinym i Parašenkam uspychvaje haračaja palemika. Jany znoŭ supakojvacca. Ustajuć, kab abmierkavać sprečny punkt sam-nasam. Viartajucca, havorać dalej. Asabisty kantakt pamiž imi dobry. Uładzimir Uładzimiravič i Piotr Alaksiejevič na «ty», — zaznačaje vydańnie.
Der Spiegel piša, što nižejšym punktam pieramoŭ stała ranica čaćviarha, 12 lutaha, kali pradstaŭnik ABSIE ŭ trochbakovaj kantaktnaj hrupie Chajdzi Taljavini «sieła ŭ mašynu na Vajskovym zavułku, 4, kab pieradać drennuju navinu» ŭdzielnikam pieramoŭ u Pałacy niezaležnaści: «Paŭstancy nie chočuć padpisvać vynikovy dakumient». Pryčynaj staŭ punkt ab advodzie ciažkaha ŭzbrajeńnia, zhodna ź jakim sieparatysty pavinny advieści jaho faktyčna da miažy z Rasijaj. Pavodle infarmacyi Der Spiegel, Pucin padniaŭsia na treci pavierch pałaca ŭ śpiecyjalna abstalavany dla jaho kabiniet i vyjšaŭ na suviaź z pradstaŭnikami sieparatystaŭ Alaksandram Zacharčankam i Iharam Płatnickim, jakija prybyli ŭ Minsk. Praź dźvie hadziny abodva ŭchvalili dakumient.
«Kali b pieramovy ŭ Minsku poŭnaściu pravalilisia, Mierkiel vyhladała b vielmi niedarečna, asabliva ŭ vačach amierykancaŭ, častka jakich z uśmieškaj kažuć, što dla vialikaj palityki jeŭrapiejcam patrebny vialiki brat. Paśla Minska dla hetaha niama padstaŭ, prynamsi zaraz. Nievialiki pośpiech źviazvajecca ź imieniem Mierkiel. Zbroja pavinna zamaŭčać», — piša Der Spiegel.
