Dypłamat: Biełarusy pavinny zmahacca za dyjałoh z uradam, navat kali jon nie choča supracoŭničać

U miežach śpiecyjalna stvoranych prahram Fond pravoŭ čałavieka i «Małyja prajekty pasolstva Karaleŭstva Niderłandaŭ» (Matra/KAP) dla padtrymki raźvićcia hramadzianskaj supolnaści ŭ krainach Uschodniaha partniorstva za apošnija siem hadoŭ u Biełarusi realizavali 150 prajektaŭ.

Pra heta paviedamiŭ namieśnik pasła Niderłandaŭ u Biełarusi Adryjan Pałm 17 lutaha ŭ Minsku na sustrečy z žurnalistami.

«Hałoŭnaja meta našych prahram — uklučyć u praces raźvićcia hramadzianskaj supolnaści Biełarusi ŭsio jaje nasielnictva. My ŭpeŭnienyja, što dynamičnaje raźvićcio jarkaj, sučasnaj i enierhičnaj hramadzianskaj supolnaści žyćciova važnaje dla jakaści demakratyi, ekanamičnaha raźvićcia i prahresu hramadskaści ŭ krainie», — skazaŭ jon.

Dypłamat paviedamiŭ, što krajni termin padačy novych prajektnych prapanoŭ ad niedziaržaŭnych arhanizacyj dla atrymańnia pasolskaj padtrymki ŭ ich realizacyi — 15 sakavika 23.59. 

Pavodle słoŭ Pałma, Niderłandy padtrymlivajuć raźvićcio hramadzianskaj supolnaści ŭ Biełarusi ŭžo bolš jak 20 hadoŭ. 

«My viedajem ciažkuju situacyju z pravami čałavieka i raźvićciom hramadzianskich inicyjatyŭ u vašaj krainie, i dla vyrašeńnia prablem nieabchodna vieści kanstruktyŭny dyjałoh z usimi členami biełaruskaha hramadstva, i ŭradam u tym liku, — skazaŭ Pałm. — Aprača taho, treba krytykavać — havaryć ab prablemach i parušeńniach pravoŭ čałavieka. My sa svajho boku hatovyja dapamahać i słovam, i spravaj».

Na kožny adabrany prajekt, zaznačyŭ dypłamat, vydzialajecca hrant u 25 tysiač jeŭra, i jon pavinien być realizavany na praciahu 12 miesiacaŭ.

Pałm źviarnuŭ uvahu na toje, što ŭ Biełarusi ŭrad nie choča dapamahać drobnym hramadskim arhanizacyjam vyraści ŭ bujnyja inicyjatyvy. U paśpiachovym vyrašeńni hetaha pytańnia pavinny prysutničać try aśpiekty, miarkuje pradstaŭnik niderłandskaj dypmisii: žadańnie dziejničać, sami dziejańni arhanizacyi, uklučanaść u dziejańnie hramadstva i ŭład.

«Važna, kab vy sami sprabavali razmaŭlać z uradam, jak heta robim my, navat kali jon nie choča supracoŭničać, — padkreśliŭ jon. — Za hety praces treba zmahacca». 

Na konkurs zvyčajna prychodziać kala 100 prapanoŭ, tamu nieabchodna dakładna akreślić metu prajekta i dakładna vyznačyć metavuju hrupu, u tym liku akreślić toje, jak u prajekt budzie ŭklučana nasielnictva, nahadaŭ Pałm.

«Ja nie bajusia padtrymać prajekt, reaizacyja jakoha moža nie ŭkłaścisia ŭ 12 miesiacaŭ. Hałoŭnaje, kab prahrama pracavała», — skazaŭ jon i dadaŭ, što pravy čałavieka — heta krajevuholny kamień hałandskaj źniešniaj palityki. 

«U śfiery pravoŭ čałavieka my chočam padtrymać tych, chto znachodzicca ŭ ciažkich žyćciovych umovach, chto nie atrymlivaje naležnaj uradavaj padtrymki, chto ŭščamlony ŭ svaich pravach», — padsumavaŭ dypłamat. 

Z padrabiaznaściami i patrabavańniami abiedźviuch prahram možna aznajomicca na sajcie.

• 0
• 0
• 0
• 0
• 0
• 0
• 0
• 0