18 lutaha paśla 15 sutak aryštu vychodzić na volu Siarhiej Štoda. Jaho ŭziali, kab sarvać akcyju hruzapieravozčykaŭ. Sprava ŭ tym, što Siarhiej Štoda 26 studzienia abviaściŭ, što pieravozčyki vyjduć 4 lutaha da Saŭmina abaraniać svaje pravy.
Siarhiej byŭ zatrymany 3 lutaha «za niecenzurnuju łajanku» paśla taho, jak jon vyjšaŭ z budynka Saŭmina. Ranicaj 3 lutaha Siarhiej Štoda adpraviŭsia na sustreču ź pieršym vice-premjeram Vasilom Maciušeŭskim, na jakuju byŭ zapisany zahadzia.
Z Maciušeŭskim, jak paźniej vyśvietliłasia, jon tak i nie sustreŭsia (toj byŭ u adjeździe), ale pamočnik pieršaha vice-premjera abiacaŭ, što Siarhieja ŭ bližejšy čas zaprosiać dla razhladu pytańnia. Siarhiej vyjšaŭ ad jaho natchniony, što sprava zrušyłasia ź miortvaha punkta.
Na sustrečy płanavałasia abmierkavać, jak vyjści ź situacyi, jakaja skłałasia — biełaruskija hruzapieravozčyki akazalisia na miažy źniščeńnia. Ułady abiacali pravieści amnistyju pa štrafach, jakija ŭtvarylisia ŭ pieršyja try miesiacy pracy sistemy BelToll z pryčyny techničnych zbojaŭ sistemy i niedastatkovaha infarmavańnia pieravozčykaŭ z nahody novaŭviadzieńniaŭ. Adnak paśla źmieny ekanamičnaj situacyi, ułady zabrali svajo abiacańnie nazad.
Siarhiej Štoda pajšoŭ na pryjom da pieršaha vice-premjera V. Maciušeŭskaha, kab nie davodzić pytańnie da vuličnaj akcyi, adnak sustreča z druhim čałaviekam va ŭradzie, jak my bačym, akazałasia pastkaj. Bo ab pieranosie zapłanavanaj sustrečy pamočnik moh paviedamić Siarhieju pa telefonie, ale nie zrabiŭ hetaha.
Naiŭna vieryć biełaruskim čynoŭnikam.
Na 4 lutaha na 9.00 na Savieckaj, 11 byŭ abvieščany zbor padmanutych hruzapieravozčykaŭ.
Siarhiej Štoda, jaki vystupaŭ u roli lidara hruzapieravozčykaŭ, 26 studzienia byŭ vymušany źviarnucca da kaleh pa niaščaści sa zvarotam:
«Pavažanyja kalehi, pieravozčyki, chto sutyknuŭsia sa štrafami BelToll! Liču patrebnym paviedamić vam, što abiacanaj raniej uładami amnistyi pa našych štrafach nie budzie, ministerstvu finansaŭ usio mała hrošaj…
Transpartnaja inśpiekcyja zapuściła praceduru bankructva dla nievialikich arhanizacyj i indyvidualnych pradprymalnikaŭ. U vašy banki buduć prychodzić elektronnyja listy z płaciežnym patrabavańniem spahnać hetyja šalonyja štrafy biez paviedamleńnia vam. Vašy hrošy biez vas zdymuć, dla kahości heta budzie kaniec.
U nas jość jašče mahčymaść, jość šaniec, što niešta źmianić. Prychodźcie 4 lutaha ŭ 09:00 da Saŭmina na Savieckuju, 11, usie razam źvierniemsia da Łukašenki. Usie kancy zvodziacca da jaho. Źvierniemsia i paprosim razabracca.
My nie terarysty, ničoha supraćzakonnaha rabić nie budziem, my tolki prosim razabracca ŭ našaj situacyi, my — častka naroda, my zakonapasłuchmianyja padatkapłacielščyki. Hetyja pavietranyja štrafy pryviaduć da bankructva mnohich, nastupstvy ŭsie razumiejuć, nielha da hetaha davodzić.
Prašu ŭsich: prychodźcie. Buduć pytańni — telefanujcie mnie pa telefonie (29) 169 76 49.
Siarhiej Štoda»
Videazvarot Siarhieja Štody ad 26 studzienia možna pahladzieć tut.
