BiełTA
Ab hetym kiraŭnik dziaržavy zajaviŭ siońnia na naradzie pa aktualnych pytańniach sacyjalna-ekanamičnaha raźvićcia.
«Užo viadomyja pieršyja vyniki studzienia, dy i luty skončyŭsia. Niahledziačy na niekatoryja stanoŭčyja vyniki ŭ asobnych halinach, u cełym ekanomika nie raście.
Adstaje pramysłovaść, pavialičvajucca zapasy na składach i ŭzajemnyja niepłaciažy. Pakul nie spracoŭvajuć prymajemyja miery padtrymki ekspartu. I ŭsio heta pačynaje adbivacca na ludziach. Realnyja dachody nie rastuć», — kanstatavaŭ jon.
«My viedajem, što takija prablemy siońnia nie tolki ŭ nas. Ale nielha ŭsio zvalvać na źniešnija faktary», — padkreśliŭ biełaruski lidar.
Ad kiraŭnictva ŭrada kiraŭnik dziaržavy zapatrabavaŭ pradstavić nie tolki spravazdaču ab biahučaj situacyi, ale i vykazać kankretnyja prapanovy, a taksama paviedamić ab vykanańni raniej dadzienych daručeńniaŭ.
«Daŭno ŭžo para vyłazić z kabinietaŭ i zajmacca kankretnaj vytvorčaściu. Siońnia heta pytańnie numar adzin, — skazaŭ Alaksandr Łukašenka. — Vy pryniali prahramu dziejańniaŭ, paviedamili jaje deputatam, jak i pałožana pa zakanadaŭstvie. Ale mianie siońnia cikavić nie heta. Raspracavanyja vami scenary — try-piać ci dziesiać — heta vyklučna vaša sprava. Mianie cikavić tendencyja, zruchi, što zroblena dla taho, kab elemientarna, pradaŭšy pradukcyju, atrymać hrošy».
Łukašenka žorstka papiaredziŭ ab niedapuščalnaści najaŭnaści praterminavanaj debitorskaj zapazyčanaści za pastaŭlenuju za miažu pradukcyju. «Heta kryminalnaje złačynstva. My ŭžo vyvieli hetuju prablemu na ŭzrovień prakuroraŭ Biełarusi i Rasii», — adznačyŭ jon.
Premjer-ministr Andrej Kabiakoŭ prainfarmavaŭ na naradzie ab stanie spraŭ u ekanomicy i płanach urada pa vyrašeńni isnujučych prablem.
Pavodle jaho słoŭ, śniežański šok ad devalvacyi rasijskaha rubla, faktyčnaje ściskańnie ŭnutranaha rasijskaha rynka vielmi niehatyŭna adbiłasia na biełaruskaj ekanomicy.
«Vidavočna, što žorstkija miery bałansavańnia ekanomiki, jakija byli realizavany ŭ śniežni-studzieni, nie mahli nie adbicca na realnym siektary i jaho finansavym stanie. Tamu siońnia da zadačy adnaŭleńnia narmalnaj pracy pramysłovaści ŭ šyrokim jaje razumieńni zvodziacca klučavyja pytańni ekanamičnaj palityki. Na heta zaviazanyja bankaŭskaja sistema, ekspart, zaniataść i dachody nasielnictva», — skazaŭ Andrej Kabiakoŭ.
