U pasiołku «Družny»
Puchavickaha rajona nasielnictva pratestuje suprać namieru ŭłady pabudavać tut filijał rasiejskaha zavodu, jaki ŭ SSSR vyrablaŭ DDT.
DDT — heta dust. Niebiaśpiečny chimičny preparat. Atruta, jakaja spryjaje raźvićciu raku, psuje kroŭ, razburaje repraduktyŭnyja funkcyi čałavieka. Specyjalisty pierakonvajuć, što chacia ŭ 1970‑ia na vytvorčaść i vykarystańnie dustu byli ŭviedzienyja strohija abmiežavańni, ale jašče i na siońnia hetaj atruty ŭ Biełarusi — tony. Viaskoŭcy praciahvajuć vykarystoŭvać chimikat na prysiadzibnych učastkach. Niekatoryja truciać im vašej i błych
Najbolš pra dust ciapier havorać u pasiołku «Družny» Puchavickaha rajonu Niadaŭna tut adbyŭsia navat šmatludny schod. Pierad prysutnymi vystupiŭ hramadzki aktyvist Siarhiej Abrazoŭski. Milicyja zatrymała pramoŭcu. Pavodle pratakołu, jon abvinavačvajecca ŭ arhanizacyi pratestaŭ na rašeńnie pabudavać ŭ «Družnym» zavod pa vyrabu chimičnych paraškoŭ, vadzianych rastvoraŭ, emulsij.
— Mienskabłvykankam užo faktyčna daŭ dazvoł na budaŭnictva ŭ pasiołku pradpryjemstva rasiejskaj firmy «Avhust», — kaža spadar Abrazoŭski. — Matyvacyja biełaruskaj ułady — skaracić impart pestycydaŭ. Vyrašana, što rasiejcy pabudujuć taki ž zavod, jak i ŭ haradku Vurnary ŭ Čuvašyi. Mienavita jon i vyrablaŭ niekali dust.
Sa słovaŭ Siarhieja Abrazoŭskaha, raniej firmie «Avhust» prapanoŭvałasia budaŭničaja placoŭka ŭ mienskim mikrarajonie «Šabany». Adnak paśla ekspertyzy prajekta ŭ Nacyjanalnaj akademii navuk vyśvietliłasia: mahčymyja vykidy ŭ pavietra mohuć pahoršyć ekalahičnuju sytuacyju ŭ najbližejšych mikrarajonach «Čyžoŭka» i «Łošyca». Pa ekalahičnych parametrach daviałosia admovicca i ad namieraŭ pasadzić novy chimičny zavod la Barysava.
— Čynoŭniki vyrašyli, što možna trucić naš pasiołak, — hnievajecca Siarhiej Abrazoŭski. — Ciapier tut blizu piaci tysiač nasielnictva, pałova ź ich — biespracoŭnyja va ŭzroście 40‑50 hadoŭ. Niekali ich zamanili na budaŭnictva Mienskaj atamnaj stancyi, specyjalna pabudavali novy pasiołak. A jak adbyŭsia krach Čarnobylskaj stancyi, to ŭłada kinuła «Družny» na samavyžyvańnie. Ciapier padsoŭvajuć sumnieŭny prajekt, prapahandujuć jaho jak vyratavańnie ad biespracoŭja.
Staršynia kamitetu ekanomiki Mienskaha abłvykankamu Žana Biryč paviedamiła — «Avhust» całkam biare na siabie finansavyja zatraty ŭ stvareńni novaj vytvorčaści ŭ Biełarusi.
Pieršapačatkovyja raschody — 15 miljonaŭ dalaraŭ.
Akramia taho, jak zapeŭnivaje Žana Biryč, firma vyrašyć prablemu zachoŭvańnia chimičnych srodkaŭ achovy raślinaŭ, termin vykarystańnia jakich daŭno zakončyŭsia.
Mianie cikaviła i mierkavańnie načalnika Puchavickaj rajonnaj inspekcyi pryrodnych resursaŭ i achovy navakolnaha asiarodździa Ivana Hrybko.
— Ja ŭ hetaj spravie — drobny čynoŭnik, — kaža Hrybko, — vytvorčaść srodkaŭ chimičnaj apracoŭki raślinaŭ ciapier prybytkovaja, i hetamu biznesu ciažka piarečyć.
Ivan Hrybko niadaŭna za rasiejski košt naviedaŭ Čuvašyju i rajonny haradok Vurnary. Adpracoŭvaje zaraz vajaž: piša dobryja zamietki ŭ rajhazecie pra nibyta biasškodny zavod.
I pra apošniaje «pryvitańnie» z Čuvašyi. U respublicy praciahvajecca raśśledavańnie kryminalnaj spravy pa fakcie vybuchu na Novačebaksarskim chimzavodzie. Tam uvosień minułaha hodu paciarpieli adrazu šeść pracaŭnikoŭ. Prakurory šukajuć vinavatych u «parušeńniach praviłaŭ achovy pracy» i «zabrudžvańni atmasfery».
