Turma nie da spaznańnia źmianiła rabotnic Miniusta, jakich sudziać za chabar FOTY

Pavialičyć

Supracoŭnic Ministerstva justycyi zatrymali ŭ svaich kabinietach jašče ŭ žniŭni 2013. Halina Hryškaviec uznačalvała ŭpraŭleńnie advakatury i licenzavańnia jurdziejnaści, Natalla Bierazoŭskaja była jaje namieśnicaj. Abiedźviuch uziali, jak paviedamili ŭ KDB, pry atrymańni chabaru ŭ $1000 ad zasnavalnika budaŭničaj firmy. Ale vypadki byli nie adzinkavyja.

Da aryštu žančyny zapomnilisia tym, što paśla Płoščy-2010 pazbaŭlali licenzij niekatorych advakataŭ, što abaraniali apazicyjnych palitykaŭ. U pryvatnaści, Paŭła Sapiełku (abaronca Sańnikava), Aleha Ahiejeva (Michaleviča), Tamaru Sidarenku (Niaklajeva).

Praz paŭtara hoda paśla aryštu pačaŭsia sud. Pa spravie prachodziać 65 śviedkaŭ. A na łavie padsudnych — jašče troje abvinavačanych: Marcinkievič, Ściopin i Šeŭčyk. Adzin ź ich — toj samy zasnavalnik budaŭničaj firmy, inšy — dyrektar ryełtarskaha ahienctva.

Nie pahrebavała i dacentka BDU

Byłych čynoŭnic vinavaciać u tym, što dapamahali zdavać ekzamieny: kamu na atrymańnie advakackaj licenzii, kamu na atestat jurysta. Nie za tak, jak śćviardžaje prakuror.

Adnoj sa śviedkaŭ na pracesie stała dacentka BDU, viadučy juryskonsult pryvatnaha pradpryjemstva «Technałohii kiravańnia» Valeryja Žyhulič.

Maładaja žančyna, jak vyśvietliłasia, u 2013 atrymała licenziju jurysta. Praŭda, jana choć i była ŭžo kandydatam navuk i vykładčykam jurfaka BDU, ale ekzamien u Miniuście zdać sama nie zmahła.

Atrymać ža zapavietny dakumient dapamoh vypadak.

Jaje švahier na kursach zamiežnaj movy paznajomiŭsia z rabotnikam Miniusta Mikałajem Azarankam. A kali pačuŭ, što svajačcy treba jak najchutčej zdać ekzamien, źviarnuŭsia da pryjaciela. Toj pry sustrečy ŭžo z Halinaj Hryškaviec udakładniŭ, «ci možna źviarnucca da jaje, kali ŭźniknuć prablemy».

Pytańnie hučała tak: «Kab čałaviek moh paśpiachova zdać ekzamien». Jana adkazała, što, kali budzie mahčymaść, dapamoža», — raskazaŭ na sudzie Azaranka.

U dzień ekzamienu, 27 sakavika 2013, Žyhulič nie zmahła pravilna prajści test. Daviałosia jaje zaprašać u kabiniet da Hryškaviec. Praŭda, kali ŭ zału suda zaprasili samoha dacenta, jana amal ničoha nie zmahła raskazać.

«Nie pamiataju», — adkazvała Valeryja. Ni jak zdavała ekzamien, ni jak vypraŭlała test.

Daviałosia začytvać jaje śviedčańni, jakija davała na dopycie ŭ KDB: «Zajšła ŭ kabiniet Hryškaviec, pavitałasia. Apošniaja prapanavała mnie pierapravić niedakładnyja varyjanty adkazaŭ na pravilnyja, što ja i zrabiła».

Vyjaviłasia, što ŭžo ŭ sakaviku 2013 u kabiniecie Hryškaviec stajała schavanaja kamiera. Na zapis trapiła i sustreča haspadyni kabinieta z Žyhulič.

«Ja sapraŭdy joj dapamahała skarektavać test», — paćvierdziła na sudzie Hryškaviec.

A dzieści paŭhoda tamu Žyhulič zdała ŭ Miniust svajo paśviedčańnie jurysta. U ministerstvie namiaknuli na rasśledavańnie: «Zavualavana było skazana, vyrazna nichto nie kazaŭ», — skardzicca jana.

A dakumient vyrašyła zdać, kab «nie było šumichi, kamisij niejkich».

Dapamahali nie tolki jurystam

U spravie fihuruje taksama advakat Topaz, jaki ŭ mai 2013 atrymaŭ advakackuju licenziju.

Pavodle prakurora, u błanku adkazaŭ Topaza byŭ šerah vypraŭleńniaŭ. Pa słovach ža byłoj rabotnicy Miniusta Valanciny Jakimovič, jakaja ŭ kamisii prymała ekzamieny, vypraŭleńni nie praduhledžany praviłami. Toj z členaŭ kamisii, chto praviaraŭ test, u kancy stavić ahulnuju kolkaść pravilnych adkazaŭ. I nichto nie pierapraviaraje.

«Pra toje, što Topaz moh źviartacca da Bierazoŭskaj z prośbaj paspryjać jamu ŭ paśpiachovaj zdačy ekzamienu na atrymańnie licenzii na advakackuju dziejnaść, mnie viadoma nie było. Mnie Bierazoŭskaja ničoha nie kazała», — začytali pakazańni inšaj śviedki, taksama rabotnicy Miniusta, Barejšy.

Pa viersii śledstva, tak prymalisia ekzamieny i na kamisii Miniusta pa ryełtarskich pasłuhach. Za hrošy možna było damovicca na stanoŭčy vynik.

• 0
• 0
• 0
• 0
• 0