 Eduard Akulin |
Kažuć, što kasetnyja varyjanty dvuch albomaŭ Eduarda Akulina razyjšlisia ŭ narod prosta vializnymi nakładami. Ad času vydańnia adnaho ź ich — «Maja Kryvija» prajšło ŭžo 13 hod. Z taho času hety vykanaŭca sapraŭdy ŭvajšoŭ u pačesnyja bardaŭskija šerahi i šanujecca nia mienš za Alesia Kamockaha ci Siarhiej Sokałava‑Vojuša. Tym i tłumčycca inicyjatyva vydaŭcoŭ dysku pad nazvaj «Pieśni załatoj Kryvii» vydać jaho ŭ seryi «Biełaruski muzyčny archiŭ».
Sam Eduard Akulin kaža, što heta nastolki pačesna, što raniej jon i maryć nia śmieŭ pra taki honar:
«Mienavita ŭ hetaj pašanotnaj seryi da mianie vyjšli dyski takich słavutaściaŭ, jak Zabejda‑Sumicki i Ravienski, pieśni na vieršy Łarysy Hienijuš, albomy Sokałava‑Vojuša i Dančyka… Viadoma ž ja zhadziŭsia na prapanovu pieravydać svaje albomy na dysku!», — kaža bard.
Pry hetym jon zaznačaje, što praca nad «Pieśniami załatoj Kryvii» zaciahnułasia ažno na hod:«Ale moža toje i da lepšaha, bo dysk byŭ hatovy na Kalady — dobry śviatočny padarunak i mnie, i maim prychilnikam».
Na «Pieśni…» źmieściłasia ažno 37 trekaŭ, u tym liku viadomyja «akulinskija» hity «Heta my!», «Zorka Maksima», «Amur i sumny i pryhožy» (na vierš Bahdanoviča). Heta materyjał dvuch albomaŭ — zhadanaj užo «Majoj Kryvii» (1995) i «Jak jana i ja» (2000). I kali pieśni z alboma siamihadovaj daŭniny jašče zachavalisia ŭ prystojnaj jakaści, to niekatoryja pieršyja kampazycyi Eduarda ŭratavać nie ŭdałosia:
«Piać piesień daviałosia pierapisać nanoŭ, bo zapis na kasetach niedaŭhaviečny, — apaviadaje bard. — Kab nie rasčaravać svaich prychilnikaŭ ja pajšoŭ na hety krok. Niekamu śviežyja zapisy viadomych užo piesień spadabalisia jašče bolej, a niechta vykazaŭ svaje zaŭvahi. Vitaŭt Martynieka voś skazaŭ, što nielha ŭvajści dvojčy ŭ adnu i tuju ž raku, bo raniejšy zapis mieŭ inšuju enerhietyku. Mahčyma, tut jość niejkaja racyja».
Svaje staryja‑novyja pieśni i hety dysk Eduard Akulin miarkuje prezentavać pa samym bližejšym časie — 2 lutaha ŭ dolnaj zali mienskaha Čyrvonaha kaściołu adbudziecca impreza, pryśviečanaja «Pieśniam załatoj Kryvii». Bard zaprasiŭ uziać u joj udzieł viadomych biełaruskich litarataraŭ i muzykaŭ. Buduć Aleś Kamocki i Volha Ipatava, Kastuś Hieraščanka i Leanid Drańko‑Majsiuk. Vykanaŭca zaprašaje ŭsich, chto šanuje rodnaje słova pryjści na hetuju imprezu.
