18 sakavika ŭ infarmacyjna-vystavačnaj zale Centralnaj navukovaj biblijateki NAN Biełarusi (Surhanava, 15) projdzie prezientacyja knihi Mikoły Vołkava «Artyleryja Niaśvižskaha zamka».
Artyleryja staražytnaha Niaśviža – unikalnaja źjava historyi ŭzbrajeńnia i liciejnaha mastactva nie tolki Biełarusi, ale i ŭsioj Jeŭropy. Harmaty, vykananyja ŭ kancy XVI – pačatku XVII st. pa zamovie mahnata Mikałaja Kryštafa Radziviła Sirotki, byli nie tolki daskanałaj zbrojaj svajho času, ale na doŭhija stahodździ stali ŭzoram vybitnaha dekaratyŭnaha azdableńnia.
Biełaruski historyk Mikoła Vołkaŭ udała spałučyŭ u svajoj knizie analiz techničnych i bajavych charaktarystyk niaśvižskaj artyleryi z raspoviedam pra prymianieńnie harmat u abaronie radziviłaŭskaj fartecyi i ich značeńnie dla mahutnaha mahnackaha rodu
Novaja histaryčnaja kniha budzie cikavaja nie tolki śpiecyjalistam-zbrojaznaŭcam, ale i ŭsim, chto cikavicca historyjaj dekaratyŭnaha mastactva.
Vydańnie bahata ilustravanaje ŭnikalnymi hraviurami, staražytnymi zamaloŭkami i sučasnymi fatahrafijami, bolšaść ź jakich drukujecca ŭpieršyniu.
Na prezientacyi vy daviedajeciesia, chto taki Molcfielt, čamu radziviłaŭskija harmaty majuć takija dziŭnyja nazvy – «Chimiera», «Papuhaj», «Sałamandra», čym adroźnivajecca bambarda ad falkaneta i šmat inšaha. Mikoła Vołkaŭ raspaviadzie taksama, jak skłaŭsia pakručasty los znakamitych radziviłaŭskich harmat u XIX–XX stahodździach.
Pačatak prezientacyi – 18 sakavika a 15-aj hadzinie. Adras CNB imia Ja.Kołasa: h. Minsk, vuł. Surhanava 15.
Mikoła Vołkaŭ – historyk maładoj hienieracyi. Vypusknik histaryčnaha fakulteta BDU. Paśpiachova skončyŭ mahistarskija prahramy «Achova i interpretacyja historyka-kulturnaj spadčyny» ŭ Jeŭrapiejskim humanitarnym univiersitecie i «Mastactvaznaŭstva» ŭ Instytucie padrychtoŭki navukovych kadraŭ NAN Biełarusi. Pracuje ŭ Instytucie historyi NAN Biełarusi, dzie rychtuje kandydackuju dysiertacyju.
Asnoŭnaja śfiera navukovych intaresaŭ – historyja fartyfikacyj, artyleryi, vajennaj spravy, architektury i horadabudaŭnictva Vialikaha Kniastva Litoŭskaha ŭ pieryjad rańniaha Novaha času. Aŭtar šmatlikich publikacyj u navukovych vydańniach Biełarusi, Polščy, Rasii i Ukrainy.
Z asobnymi raździełami i źmiestam vydańnia možna aznajomicca tut.
Nabyć knihu možna ŭ mienskich kniharniach «Akademkniha», «Łohvinaŭ», «Knižny sałon», knižnych kirmašach na Janki Kupały i ŭ KZ «Minsk, a taksama ŭ biełaruskich internet-kramach.
