PA
U piatnicu ŭ Biełarusi prahnazujecca nievialikaja vobłačnaść. Takim čynam, nadvorje budzie spryjać nazirańniu za soniečnym zaćmieńniem, jakoje pačniecca ŭ Minsku ŭ 11:57, paviedamlaje Biełhidramiet.
Maksimalnaje zaciamnieńnie (amal 70%) Miesiacam soniečnaha dyska možna budzie ŭbačyć u 13:06.
Uvaha: nazirać soniečnaje zaćmieńnie treba praź śviatłafiltr, naprykład, mocna zadymlenaje škło. Padyduć taksama i staryja dyskiety.
Bi-Bi-Si taksama pieraścierahaje, što fatahrafavańnie z dapamohaj smartfonaŭ soniečnaha zaćmieńnia moža pryvieści da ślepaty.
Kaledž optamietrystaŭ Vialikabrytanii zajaviŭ, što niebiaśpieka zaklučajecca ŭ tym, što ludzi, jakija robiać zdymki siabie (sełfi), mohuć niespadziavana pahladzieć prosta na sonca. Heta moža pryvieści da vypalvańnia kletak rahavicy i časovaj straty zroku.
Luby achvotny bolš padrabiazna razhladzieć usie fazy zaćmieńnia moža zrabić najpraściejšuju pryładu dla hetaha.
Dastatkova ŭziać kavałak kardona, nalapić na jaho kavałak falhi i prakałoć ihołkaj u centry malusieńkuju adtulinu.
Kali nakiravać takuju pryładu na sonca, na padstaŭlenym sa zvarotnaha boku arkušy biełaj papiery źjavicca pierakuleny malunak kavałka soniečnaha dyska. Tak možna nazirać usie fazy zaćmieńnia, a taksama soniečnuju karonu, h.zn vierchnija słai atmaśfiery Sonca.
Možna vyrabić ułasny filtr z čorna-biełaj plonki, ale vyklučna sapraŭdnaj čorna-biełaj plonki (da prykładu, Kodak Tri-X abo Pan-X). Padobnyja plonki ŭtrymlivajuć u sabie płast srebra paśla ich prajaŭki. Mienavita hety płast srebra słužyć dla abarony vačej.
Uvaha: Nie vykarystoŭvajcie kalarovuju abo chramahiennuju čorna-biełuju plonku, jakaja na samoj spravie źjaŭlajecca kalarovaj plonkaj. Prajaŭlenaja kalarovaja plonka, niezaležna ad stupieni jarkaści, źmiaščaje vyklučna kalarovyja farbavalniki, jakija nie abaraniajuć zrok. Mienavita mietaličnaje srebra, jakoje źmiaščajecca ŭ čorna-biełaj ploncy paśla jaje prajaŭki, słužyć dla stvareńnia biaśpiečnaha śviatłafiltra.
Dla taho, kab nazirać zacmieńnie biaśpiečna, možna taksama dastać plonku z dyskiety i skłaści jaje ŭdvaja. Soniečny dysk budzie čyrvonym i ŭmierana jarkim.
Jak paviedamlałasia, zaŭtrašniaje zaćmieńnie stanie samym vialikim dla Jeŭropy sa žniŭnia 1999 hoda.
Zaŭtra kala budynka rektarata BDU buduć ustanoŭlenyja adzin ci dva teleskopy absiervatoryi, i luby žadajučy zmoža biaspłatna nazirać soniečnaje zaćmieńnie. Aprača taho, ubačyć astranamičnuju źjavu ŭ teleskop možna budzie ŭ Minskim płanietaryi z 12 da 14 hadzin.
Taksama nazirać za zacmieńniem možna anłajn tut i tut.
Nastupnaje poŭnaje soniečnaje zacmieńnie čakajecca 9 sakavika 2016, ale pabačyć jaho mahčyma budzie tolki ŭ Aŭstralii dy Uschodniaj Azii. Zatoje 28 vieraśnia biełarusy zmohuć ubačyć poŭnaje zaćmieńnie Miesiaca, poŭnaja faza jakoha budzie doŭžycca 1 hadzinu 13 chvilin. Śpis zacmieńniaŭ na bližejšyja piać hod možna pahladzieć na sajcie NASA.
