Najbujniejšyja naftavyja kampanii vydatkavali miljardy dalaraŭ, sprabujučy paŭtaryć amierykanski słancavy bum u inšych krainach. Piać apošnich hadoŭ mnohija krainy spadziavalisia dasiahnuć enierhaniezaležnaści, dziakujučy novych technałohijam. Ale amal nidzie nadziei nie spraŭdzilisia, piša The Wall Street Journal.
U Polščy dziejnaść pa raspracoŭcy słancavych radoviščaŭ praciahvajuć tolki małyja kampanii.
Chevron, ExxonMobil i Royal Dutch Shell zharnuli praktyčna ŭsiu dziejnaść pa raspracoŭcy słancavych radoviščaŭ u Jeŭropie, Rasii i Kitai. Pryčyny roznyja: u Rasii — sankcyi, va Ukrainie — vajna, u Francyi i Bałharyi — zabarona ŭładaŭ, u Hiermanii — maratoryj, u Polščy j Rumynii — drennyja vyniki hieołaharaźviedki, a taksama źnižeńnie cenaŭ na naftu, jakoje robić prajekty ekanamična niavyhadnymi.
U vyniku, pavodle źviestak Administracyi enierhietyčnaj infarmacyi ZŠA (EIA), za miežami Złučanych Štataŭ kamiercyjnaja zdabyča słancavaj nafty viadziecca na siońnia tolki ŭ Kitai, Arhiencinie i Kanadzie, pryčym i tam abjomy pakul nievialikija. Pry hetym aceńvanyja suśvietnyja zapasy słancavych nafty i hazu ŭ Jeŭropie (uklučajučy Rasiju) i Kitai amal utraja bolšyja, čym u ZŠA.
Tolki ŭ Arhiencinie i Ałžyry zdabyča słancavaj nafty na niekalkich radoviščach idzie «hetak ža dobra, jak u ZŠA», kaža Faŭzi Ałułu z EIA.
U Polščy pracu praciahvajuć tolki nievialikija kampanii, padobnyja da pijanieraŭ amierykanskaha słancavaha bumu, niahledziačy na rasčaravańnie hihantaŭ.
Na pavierchni zdabyča słancavaha hazu ci nafty nie škodziać ekałohii, ale pad ziamloj pry hetym mohuć zabrudžvacca padziemnyja vody. Na fota: śvidravina ŭ Polščy.
Jak i ŭ ZŠA, mienavita nievialikija kampanii zmohuć damahčysia pośpiechu ŭ słancavaj haliny, ličyć Ojzin Feninh, staršynia rady dyrektaraŭ San Leon Energy. Hetaja kampanija ŭ lutym abviaściła pra pieršaje kamiercyjnaje adkryćcio ŭ Polščy hazavaha radovišča i źbirajecca pačać pradavać haz u 2016.
Zdabyča słancavaj nafty daražejšaja za zvyčajnuju, bo enierharesursy ŭ śvidravinach chutka skančajucca i treba ŭvieś čas buryć. Akramia taho, dla hidrarazryvu płasta treba šmat vady. Mienavita heta strymlivaje raboty ŭ pustynnych i hustanasielenych rajonach Kitaja, a ŭ Jeŭropie vyklikała vyklikała piarečańni ekołahaŭ.
Dla našaha rehijona asabliva važnyja vyniki raźviedki i bureńnia ŭ Polščy, bo tanny haz u susiedniaj krainie moh by całkam źmianić hieapalityčnuju pierśpiektyvu Biełarusi.
Padlašski słancavy basiejn (žoŭtym kala ŭschodniaj miažy Polščy) vychodzić i ŭ Biełaruś kala Bieraścia, ale jahony patencyjał nizki. Patencyjna pierśpiektyŭnyja basiejny paznačanyja čyrvonym.
Na žal, vyniki pakul niesuciašalnyja. EIA ŭ 2013 źniziła acenki zapasaŭ słancavaha hazu ŭ Polščy na 20%.
ExxonMobil paličyła pracu ŭ Polščy bieśpierśpiektyŭnaj u 2012 hodzie i pakinuła krainu. U studzieni 2015 hoda ab rašeńni pakinuć Polšču abviaściła i Chevron. Z bujnych naftavych kampanij tam praciahvaje pracu tolki ConocoPhillips.
U Polščy, jak i ŭ Kitai, vydatki na śvidravinu mohuć dasiahać $25 młn, a ŭ ZŠA jany, u siarednim, kala $5 młn, adznačaje Mielisa Stark z kansałtynhavaj kampanii Accenture.
Uletku 2014 Chevron pakinuła i Litvu. Uvosień 2014 hoda novy prezident Rumynii Kłaus Jochanis zajaviŭ, što ŭ jaho krainie, mabyć, niama słancavych nafty i hazu.
Shell prypyniła raźviedku ŭ Rasii i Ukrainie paśla napadu rasijskich siłaŭ na Danbas.
Na dumku Stark, patencyjnymi lidarami słancavaj haliny, akramia ZŠA, mohuć stać Kitaj, Arhiencina i Saudaŭskaja Aravija. Tam jość mocnyja nacyjanalnyja naftavyja kampanii, u jakich jość pravy na zdabyču miascovych resursaŭ, padtrymka ŭrada i šmat hrošaj. «Patrebny hulec z hłybokimi kišeniami, jaki moža pracavać tam niekalki hadoŭ», — kaža Stark i dadaje, što na hetuju rolu vydatna padychodziać dziaržkampanii.
Va Ukrainie słancavy haz patencyjna moža zdabyvacca na zachadzie i na ŭschodzie, ale pracu ŭ Dniepra-Danieckim basiejnie spyniŭ nastup rasijskich siłaŭ u Danbasie.
