Jašče nie stračany momant, kab Ukraina zastałasia adzinaj i cełasnaj, zajaviŭ Alaksandr Łukašenka ŭ intervju miedyjachołdynhu «Błumbierh».
«Dla taho kab asudžać, padtrymlivać abo abviarhać, treba być tam, u hetym katle. Parašenka tam, jon — prezident Ukrainy, napeŭna, jamu bolš jasna. U nas mety inšyja. Ułady Ukrainy, vidać, zaraz bolš prychilnyja da taho, kab siłaj vyrašyć heta pytańnie, Uschodniaj Ukrainy. Ja ź inšych pazicyj zychodžu. Ja miarkuju, što siłavoha vyrašeńnia hetaj prablemy niama. Heta budzie šmat kryvi, budzie eskałacyja kanfliktu. Tamu ja za mirnaje vyrašeńnie hetaha pytańnia. I ŭsialak sadziejničaŭ, kab hety mir tam nastupiŭ», — cytuje Łukašenku dziaržaŭnaje ahienctva BiełTA.
«Ja miarkuju, što siońnia nie stračany momant. I dziela taho, kab Ukraina zastałasia adzinaj i cełasnaj, treba vykanać minskija pahadnieńni, pad jakimi stajać podpisy i kiraŭnictva Ukrainy», — zaznačyŭ jon.
«Ja zboku, mnie praściej, ale ja tak dumaju: a jak by ja pavodziŭ siabie na miescy kiraŭnika Ukrainy? Vy viedajecie, čałaviečaje žyćcio, tym bolš čałaviečyja žyćci, bolš kaštoŭnyja i daražejšyja za lubyja kanflikty, terytaryjalnyja pretenzii i inšaje, inšaje. Dziela žyćcia ludziej, kab nie hinuli ludzi, maładyja ludzi, ja b pajšoŭ na kantakty ź lubymi. I tut nie paźbiehnuć kankretnych kantaktaŭ ź ciapierašnimi kiraŭnikami DNR i ŁNR», — miarkuje Łukašenka.
Kanfliktujučyja baki va Ukrainie, na jaho dumku, pavinny sieści za stoł pieramoŭ:
«Kali ŭ łob zadać pytańnie voś hetym, jakija adkałolisia, abo terytoryjam, jakija siabie nazyvajuć DNR i ŁNR, kali tam zadać kankretnaje pytańnie: «Vy dzie chočacie być?» — jany buduć havaryć pra toje, što jany chočuć być va Ukrainie. U nasielnictva, jakoje tam zastałosia, i, upeŭnieny, navat u kiraŭnikoŭ niama žadańnia, kab ź imi adbyłosia tak, jak z Krymam. Absalutna. Dyk što jašče treba? Viedajučy pra toje, što heta tvaja ziamla i što tam ludzi chočuć žyć va Ukrainie, čamu nie rabić kroki nasustrač i nie sieści za stoł pieramoŭ z kiraŭnikami?! Heta pieršaje».
«Druhoje. Ale ŭsie razumiejuć, što patrebnyja va Ukrainie niejkija źmianieńni. I jany bieź źmianieńniaŭ u Kanstytucyju niemahčymyja. Niechta kaža pra fiederalizacyju, pra aŭtanomiju, a ŭkrainskija ŭłady kažuć pra decentralizacyju. Davajcie ŭ Kanstytucyi Ukrainy zamacujem hetyja absalutna zrazumiełyja i nieabchodnyja siońnia dla Ukrainy kirunki. Decentralizacyja — dobra. Treba siońnia hetym terytoryjam pryznać ich z asablivym niejkim statusam — davajcie zrobim, spynicca vajna. Adnovim hetyja terytoryi. Usio z časam naładzicca, kali my chočam miru i cełasnaści Ukrainy», — skazaŭ kiraŭnik biełaruskaj dziaržavy.
«Tamu tut šerah krokaŭ treba rabić — sadzicca ź imi za stoł pieramoŭ, damaŭlacca. Tym bolš jasna, ab čym damaŭlacca. Patrebnyja źmianieńni ŭ Kanstytucyju.
I vychodzić na miažu Ukrainy z Rasijaj, zakryvać jaje. Rasija, darečy, nie suprać hetaha», — dadaŭ Łukašenka.
Adkazvajučy na pytańnie, što b Łukašenka rabiŭ na miescy Uładzimira Pucina, biełaruski kiraŭnik zaznačyŭ, što ni ŭ jakim vypadku, asabliva zaraz, kali namiecilisia tendencyi da vyrašeńnia kanfliktu, nie rabiŭ by kroki da eskałacyi hetaha kanfliktu. «Ja b rabiŭ usio dla taho, kab tam zachavaŭsia mir, dla taho, kab Ukraina zastałasia cełasnaj i adzinaj dziaržavaj. I zrabiŭ usio dla hetaha, kab choć by ź ciaham peŭnaha času narody Ukrainy i Rasii zabylisia pra hety kanflikt», — zajaviŭ Łukašenka.
