Biełaruskija pravaabaroncy patrabujuć ad uładaŭ i administracyi papraŭčaj kałonii № 17 Škłova spynić cisk na eks-kandydata ŭ prezidenty Biełarusi Mikałaja Statkieviča.
Jak paviedamlałasia raniej, tolki za apošni tydzień u dačynieńni da Statkieviča było składziena vosiem aktaŭ na padstavie vyniesienych spahnańniaŭ. Pavodle infarmacyi žonki palityka Maryny Adamovič, Statkievič pazbaŭleny karotkaterminovaha spatkańnia, jakoje płanavałasia ŭ krasaviku, i praduktovaj pieradačy. Akramia taho, 3 krasavika jaho pieraviali na dva miesiacy ŭ pamiaškańnie kamiernaha typu, a da hetaha jon pravioŭ troje sutak u štrafnym izalatary.
Pavodle słoŭ Adamovič, prablemy z administracyjaj u Statkieviča pačalisia adrazu paśla pieravodu ŭ škłoŭskuju kałoniju z mahiloŭskaj turmy i ŭzmacnilisia paśla taho, jak 24 sakavika jon napisaŭ zajavu ab admovie ad niezakonnych rabot pa samaabsłuhoŭvańni. Jak rastłumačyła Adamovič, takija raboty ŭsie źniavolenyja pavinny vykonvać pa čarzie, pryčym nie bolš za dźvie hadziny ŭ dzień, ale ŭ dačynieńni da Statkieviča hetyja normy administracyja nie vykonvała.
Žonka palityka nie vyklučaje, što suprać jaho «rychtujecca novaja sprava», u vyniku čaho Statkieviču mohuć abo praciahnuć termin pakarańnia (jon zakančvajecca ŭ śniežni 2016 hoda), abo ŭzmacnić režym adbyćcia pakarańnia — znoŭ pieravieści ŭ turmu.
Centr pravavoj transfarmacyi Lawtrend i zakryty ŭładami pravaabarončy centr «Viasna» nakiravali ŭ departamient vykanańnia pakarańniaŭ (DVN) MUS i administracyju škłoŭskaj kałonii № 17 zvarot, u jakim vykazvajuć tryvohu adnosna situacyi vakoł Statkieviča.
Pravaabaroncy ličać, što dziejańni administracyi kałonii «majuć metanakiravany charaktar na prymušeńnie Statkieviča da napisańnia prašeńnia ab pamiłavańni na imia prezidenta Respubliki Biełaruś». «Takija dziejańni administracyi kałonii nosiać supraćpraŭny i palityčna matyvavany charaktar i mohuć rasceńvacca jak biesčałaviečnaje abychodžańnie, jakoje źnievažaje čałaviečuju hodnaść», — cytuje zajavu pravaabarončy sajt spring96.org.
Pravaabaroncy patrabujuć:
— spynić administracyjny cisk u dačynieńni da Mikałaja Statkieviča;
— admianić niezakonnyja dyscyplinarnyja spahnańni, atrymanyja na praciahu apošnich dvuch miesiacaŭ, i anulavać składzienyja akty ab parušeńni dyscypliny;
— dapuścić pradstaŭnikoŭ mižuradavych arhanizacyj (pradstaŭnictva ES i AAN u Biełarusi), a taksama dypłamatyčnych misij Jeŭrasajuza ŭ kałoniju № 17 dla pravierki ŭmoŭ utrymańnia apazicyjnaha palityka.
Akramia DVN MUS i administracyi kałonii tekst zajavy nakiravany ŭ pradstaŭnictvy AAN i ES u Biełarusi.
Mikałaj Statkievič adbyvaje pakarańnie pavodle abvinavačvańnia ŭ arhanizacyi masavych biesparadkaŭ u dzień prezidenckich vybaraŭ 19 śniežnia 2010 hoda.
31 sakavika ŭ intervju miedyjachołdynhu «Błumbierh» Łukašenka zajaviŭ, što Statkievič zastajecca ŭ turmie tamu, što sam «choča być viaźniem».
