fota Vadzima Zamiroŭskaha, Tut.by
Siońnia, 17 krasavika, u Viarchoŭnym sudzie razhledzieli kasacyjnuju skarhu Uładzimira Malcava, hiendyrektara abjadnańnia «Barysaŭdreŭ». Sud zadavoliŭ prośbu abvinavačanaha asabista prysutničać na pasiadžeńni, tamu razhlad spravy pieranieśli z 7 krasavika. Da pierapynku vystupili advakat Dźmitryj Haračka, dziaržabvinavaŭca — pradstaŭnik Hienprakuratury Eldar Safaraŭ i sam abvinavačany, paviedamlaje Tut.by
U vyniku, zasłuchaŭšy ŭsie baki, sudździa Valeryj Kalinkovič začytaŭ rašeńnie suda. Artykuł, pavodle jakoha byŭ abvinavačany Uładzimir Malcaŭ, pierakvalifikavali z č.3 art.424 na č.2 art. 424 (Złoŭžyvańnie ŭładaj abo słužbovymi paŭnamoctvami) — na padstavie hetaha pakarańnie źmianili z 3 hadoŭ da 2 hadoŭ i 6 miesiacaŭ z adbyvańniem pakarańnia ŭ papraŭčaj kałonii ahulnaha režymu z pazbaŭleńniem prava zajmać kirujučyja pasady terminam na try hady.
Aryšt z majomaści Malcava, jaki byŭ nakładzieny padčas papiaredniaha śledstva, sud pastanaviŭ źniać. Taksama sud admianiŭ rašeńnie ab spahnańni z Malcava na karyść «Barysaŭdreva» 1,906 miljarda rubloŭ — u hetuju sumu pieršapačatkova acanili škodu dziaržavie, pryčynienuju byłym top-mieniedžaram.
Taksama na padstavie zakona ab amnistyi ad 17 červienia 2014 h. termin asnoŭnaha pakarańnia skaracili jašče na 1 hod.
— Tak jak Malcaŭ užo znachodzicca ŭ źniavoleńni 1,1 hoda, to jamu zastajecca prabyć u turmie jašče 5 miesiacaŭ. Ale kali da jaho prymieniać jašče i majskuju amnistyju, to jon moža być vyzvaleny ŭžo ŭ mai-červieni hetaha hoda, — vykazaŭ mierkavańnie advakat Uładzimira Malcava Dźmitryj Haračka.
U svaim vystupie siońnia Malcaŭ abviarhaŭ abvinavačvańni ŭ niekampietentnaści ŭ svoj adras, jakija jamu pradjaŭlenyja ŭ sudzie pieršaj instancyi.
— Naradziŭsia ŭ niebahataj siamji i ŭžo z samaha dziacinstva imknuŭsia da raspracovak, — raspavioŭ eks-dyrektar «Barysaŭdreva». — U 12 hadoŭ pieravorvaŭ pole na traktary.
U.Malcaŭ raspavioŭ niekalki faktaŭ sa svajho dziacinstva, jakija paźniej paćvierdziła jaho maci, što prysutničała na pasiadžeńni. Pavodle jaho słoŭ, jon ź vialikaj cikavaściu chadziŭ u hurtki dla junaj tvorčaści i sprabavaŭ stvarać raspracoŭki, z dapamohaj jakich možna palehčyć pracu ludziej.
— U nas było 40 sotak ziamli, i my z baćkam zvyčajna nasili nasiłkami hnoj. Kab było lahčej, u 15 hadoŭ zrabiŭ hnojaraskidalnik. U 17 hadoŭ zrabiŭ bulbasadžałku.
Uładzimir Malcaŭ rodam ź vioski Kochanava Tałačynskaha rajona. Paśla 8 kłasa pastupiŭ u vučelniu ŭ Barysavie, tam ža skončyŭ technikum. I byŭ adnym z vaśmi najlepšych vučniaŭ u svaim vypusku ŭ Politechničnaj akademii.
Uładzimir Malcaŭ padkreśliŭ, što maje vialiki dośvied pracy inžyniera-kanstruktara.
— Niama takoj śpiecyjalnaści na «Barysaŭdrevie», pa jakoj ja nie moh by pracavać. Ja viedaju ŭvieś technałahičny praces i luboha śpiecyjalista hatovy zatknuć za pojas, — upeŭnieny Uładzimir Malcaŭ.
Pry hetym były eks-dyrektar zaŭvažyŭ, što ŭsie śpiecyjalnaści asvoiŭ sam.
Uładzimir Malcaŭ kazaŭ pra niekatoryja momanty madernizacyi na «Barysaŭdrevie».
Naprykład, zhadaŭ toj fakt, što na jaho pradpryjemstvie puskanaładačnyja raboty prajšli za 4 miesiacy, pry hetym na anałahičnym pradpryjemstvie «Viciebskdreŭ» hety praces zaniaŭ vosiem miesiacaŭ. Taksama eks-dyrektar kazaŭ pra toje, što za 1,5 hoda jaho kiraŭnictva «Barysaŭdreŭ» sa strat vyjšaŭ na rentabielnaść.
— Mianie abvinavačvajuć u tym, što pa majoj vinie sarvalisia terminy madernizacyi, ale da mianie pieranosili terminy 6 razoŭ, a pry mnie tolki 1 raz.
Advakat Dźmitryj Haračka padtrymaŭ vystup Malcava. Jon paprasiŭ Viarchoŭny sud admianić prysud, vyniesieny Minskim abłasnym sudom, z pryčyny adsutnaści składu złačynstva ŭ dziejańniach eks-dyrektara Barysaŭdreva, paviedamlaje Tut.by.
Dziaržabvinavaŭca, u svaju čarhu, ličyć rašeńnie suda pieršaj instancyi spraviadlivym. Jon paprasiŭ pakinuć prysud u sile.
Maci Uładzimira Malcava, fota Vadzima Zamiroŭskaha, Tut.by
Na sudzie prysutničała žonka Uładzimira Malcava, fota Vadzima Zamiroŭskaha
Kryminalnuju spravu ŭ dačynieńni da Uładzimira Malcava raspačali ŭ sakaviku minułaha hoda. Jaho abvinavacili ŭ złoŭžyvańni słužbovymi paŭnamoctvami ŭ chodzie vykanańnia dziaržaŭnaj prahramy pa madernizacyi drevaapracoŭčaha pradpryjemstva «Barysaŭdreŭ», jakoje pryviało da ciažkich nastupstvaŭ u vyhladzie naniasieńnia ŭronu ŭ asabliva bujnym pamiery i zryvie terminaŭ pa realizacyi dziaržprahramy pa madernizacyi.
20 śniežnia sud pastanaviŭ pryznać eks-dyrektara «Barysaŭdreva» vinavatym u ździajśnieńni dziejańniaŭ, jakija paciahnuli pryčynieńnie istotnaj škody dziaržaŭnym i hramadskim intaresam, a taksama ciažkija nastupstvy.
Na padstavie č.3 art. 424 KK Biełarusi (Złoŭžyvańnie słužbovymi paŭnamoctvami) Uładzimiru Malcavu pryznačyli pakarańnie ŭ vyhladzie pazbaŭleńnia voli terminam na try hady z adbyvańniem pakarańnia ŭ papraŭčaj kałonii va ŭmovach ŭzmocnienaha režymu biez kanfiskacyi majomaści, z pazbaŭleńniem prava zajmać pasady, źviazanyja z ažyćciaŭleńniem arhanizacyjna-rasparadčych i administracyjna-haspadarčych abaviazkaŭ, terminam na piać hadoŭ.
Padčas sudovych pasiadžeńniaŭ ahučvali sumu, u jakuju acanili škodu dziaržavie, pryčynienuju Malcavym, - 17,008 miljarda rubloŭ. Tym nie mienš, sud pastanaviŭ spahnać z byłoha top-menedžera ŭ karyść «Barysaŭdreva» 1,906 miljarda rubloŭ. U košt pakryćcia škody taksama mielisia nakiravać majomaść abvinavačanaha na ahulnuju sumu 400 miljonaŭ rubloŭ.
Varta adznačyć, što sud vynies pastanovu ŭ adras načalnika hałoŭnaha śledčaha ŭpraŭleńnia Śledčaha kamiteta, u jakim ukazaŭ na parušeńni zakonaŭ i vytvorčaści papiaredniaha śledstva, vyjaŭlenyja pry sudovym razhladzie spravy.
29 studzienia 2015 hoda Alaksandr Łukašenka ŭ čas pres-kanfierencyi dla biełaruskich i zamiežnych ŚMI zajaviŭ, što nie ŭmiešvaŭsia ŭ spravu hiendyrektara «Barysaŭdreva».
— Napeŭna, jon u čymści vinavaty, a za heta treba adkazvać. A ŭ naroda zaŭsiody: «Ach, voś heta strełačnik». Jaki ž heta strełačnik? Jon kiraŭnik pradpryjemstva, jon viedaŭ niedachopy. Jaho tudy nakiravali, źniaŭšy papiaredniaha kiraŭnika. Jon viedaŭ, što rabić … dapuściŭ rastratu i inšaje. Jašče raz padkreślu: ja nie byŭ prychilnikam žorstkaha pakarańnia dla hetaha čałavieka. U pravaachoŭnaj sistemie ludzi nie durnyja, jany heta bačyli. I kali pry hetym jany paličyli patrebnym adpravić jaho ŭ kałoniju, to jany ź im rachunki nie zvodzili, — zajaviŭ Łukašenka.
Pry hetym jon paprasiŭ kiraŭnika svajoj administracyi jašče raz pradstavić jamu materyjały pa hetaj spravie. «Ja bolš padrabiazna pahłyblusia ŭ hetuju spravu. Ale heta nie značyć, što ja budu va ŭhodu hramadskaj dumcy abaraniać čałavieka, jaki ździejśniŭ pravaparušeńnie», — skazaŭ Łukašenka.
Nahadajem, za pravały ŭ madernizacyi «Barysŭdreva» svaich pasadaŭ pazbavilisia staršynia Minskaha abłvykankama Barys Batura i namieśnik kiraŭnika prezidenckaj Administracyi Andrej Tur. U adstaŭku byŭ adpraŭleny kiraŭnik kancerna «Biellespapierapram» Alaksandr Pierasłaŭcaŭ. Były kiraŭnik Administracyi prezidenta Andrej Kabiakoŭ atrymaŭ «strohuju vymovu z apošnim papiaredžańniem».
Heta adbyłosia paśla taho, jak 8 listapada 2013 hoda Alaksandr Łukašenka aznajomiŭsia sa stanam pradpryjemstva «Barysaŭdreŭ», naviedaŭ vytvorčyja pamiaškańni i vykazaŭ krajniuju stupień niezdavolenaści ŭbačanym. Łukašenka zapatrabavaŭ zavieści kryminalnyja spravy pa faktach biezhaspadarčaści.
Na čas vizitu prezidenta na «Barysaŭdreŭ» madernizacyja na pradpryjemstvie išła ŭžo vosiem hadoŭ, a Uładzimir Malcaŭ pravioŭ u statusie hienieralnaha dyrektara paŭtara hoda.
