Supracoŭniki kryminalnaha vyšuku raskryli zabojstva 35-hadovaj žycharki Rečycy, trup jakoj sa šmatlikimi nažavymi ranieńniami byŭ znojdzieny ŭ kancy minułaha tydnia ŭ dvary ŭłasnaha doma. Pavodle papiaredniaj infarmacyi, zabojstva zamoviŭ jaje muž, paviedamili ŭ pres-słužbie UUS Homielskaha abłvykankama.
U dziažurnuju častku Rečyckaha RAUS źviarnułasia maci zabitaj, jakaja znajšła svaju dačku ŭ aharodzie pryvatnaha doma z prykmietami hvałtoŭnaj śmierci. Na miesca złačynstva nieadkładna vybyła śledča-apieratyŭnaja hrupa, ekśpierty. Za niekalki sutak karpatlivaj pracy śledčym udałosia adnavić detali trahičnaha dnia i zatrymać mierkavanych udzielnikaŭ kryvavaha złačynstva.
U pole zroku milicyi adrazu trapiŭ 46-hadovy muž zabitaj. Pavodle papiaredniaj infarmacyi, mužčyna zahadzia spłanavaŭ zabojstva žonki, jakaja znachodziłasia ŭ adpačynku pa dohladzie za dziciom. Dla hetaj mety jon znajšoŭ znajomaha, raniej sudzimaha miascovaha žychara, jaki i pahadziŭsia vykanać zakaz za niekalki tysiač dalaraŭ. Pa źviestkach apieratyŭnikaŭ, najmit pradstaviŭsia praviarajučym słužby hazu, paklikaŭ žančynu na vulicu nibyta dla źniaćcia pakazańniaŭ ličylnika, paśla čaho nanios niaščasnaj bolš za dziesiatak nažavych ranieńniaŭ.
Rečycki RASK raspačaŭ kryminalnuju spravu pa art.139 č.2 KK «Zabojstva». Zatrymanyja dajuć pakazańni. Pravodzicca šerah apieratyŭna-vyšukovych i śledčych mierapryjemstvaŭ.
