U sacyjalnych sietkach prajšła infarmacyja, što 20 krasavika ŭ tak zvanaj «Navarosii» zahinuŭ biełarus Siarhiej Ściebichaŭ. Jamu było 40 hadoŭ, jon uradženiec Asipovičaŭ. Jon byŭ u šerahach «Dobraachvotnaha kamunistyčnaha atrada», mieŭ pazyŭny «Varah».
Supołka «Dobraachvotnaha kamunistyčnaha atrada» paviedamlaje, što Ściebichaŭ padarvaŭsia na raściažcy. «Maleńki askiepak trapiŭ jamu ŭ šyju, śmierć była imhniennaj. Piać dzion tamu jamu spoŭniłasia 40», — napisana ŭ paviedamleńni.
«Jon nie byŭ ni ruskim, ni ukraincam, ale jon byŭ naskroź prasiaknuty ruskim ducham, jon biełarus», — napisaŭ Ukantakcie sieparatyst Alaksiej Sučkoŭ.
Na staroncy ŭdzielnika kamunistyčnaha atrada Siarhieja Ściebichava Ukantakcie staić status «Za Ruś śviatuju!»
U «Dobraachvotnym kamunistyčnym atradzie» «Našaj Nivie» paćvierdzili fakt śmierci biełarusa 20 krasavika. Jaho jašče nie pachavali. «Adpaviednyja ludzi z bryhady vyrašajuć pytańnie z transparciroŭkaj cieła ŭ RB», — zajavili tam.
Heta pieršaja paćvierdžanaja infarmacyja pra śmierć biełarusa ŭ vajnie na ŭschodzie Ukrainy. Pavodle niekatorych źviestak, kala dziasiatka biełarusaŭ vajuje tam na rasijskim baku i niekalki dziasiatkaŭ — na ŭkrainskim.
