Źmieny i dapaŭnieńni ŭ Vybarčy kodeks unosicca nie buduć, zajaviła 30 krasavika ŭ Minsku na sustrečy z pradstaŭnikami BRSM staršynia Centralnaj kamisii pa vybarach i praviadzieńni respublikanskich refierendumaŭ Lidzija Jarmošyna.
«My prytrymlivajemsia rekamiendacyj mižnarodnych arhanizacyj, jakija havorać pra toje, što vybarčaje zakanadaŭstva nie pavinna mianiacca napiaredadni vybaraŭ, — skazała Jarmošyna. — Palityčnyja hulcy, jakija źbirajucca brać udzieł u vybarčaj kampanii, pavinny da vybaraŭ padrychtavacca, vyvučyć źmieny i praviły hulni.
Kali my niešta źmienim pierad vybarami, to pastavim ludziej u niazručnaje stanovišča.
Naprykład, u nas admieniena dziaržaŭnaje finansavańnie kandydataŭ. Jany pavinny sami źbirać svoj fond, a dla hetaha patrebna padrychtavacca, chacia b sabrać ludziej abo jurydyčnych asob, hatovych achviaravać srodki ŭ hety fond. Tamu vybarčaje zakanadaŭstva mianiacca nie budzie».
Na dumku kiraŭnika CVK, kožnaja vybarčaja kampanija — heta vopyt, jaki pakazvaje, što i dzie treba abo nie treba mianiać.
«Mienavita hetyja vybary, całkam mahčyma, pasłužać asnovaj dla źmieny vybarčaha zakanadaŭstva ŭ nastupnym, — zaznačyła Jarmošyna. — Ale jak prafiesijny juryst mahu skazać: ja suprać čachardy z zakanadaŭstvam. Ja miarkuju, što zakony pavinny być stabilnyja, a vybarčyja zakony pavinny być stabilnyja ŭdvaja».
