U kastryčniku 2014 hoda siamja Zacharanki źviarnułasia ŭ Śledčy kamitet (SK) Biełarusi z chadajnictvam ab spynieńni rasśledavańnia pa spravie ab jaho źniknieńni i davańni ŭsich dakumientaŭ dla aznajamleńnia. Adnak SK dahetul nie spyniŭ rasśledavańnie i, adpaviedna, nie pieradaŭ svajakam dakumienty śledstva, paviedamiŭ BiełaPAN pravaabaronca Aleh Vołčak, jaki pradstaŭlaje intaresy maci źnikłaha hienierała Uljany Zacharanki.
Pavodle słoŭ Vołčaka, takija skarhi padavalisia nieadnarazova, ale adkaz zaŭsiody byŭ paviarchoŭnym: u śledstva, maŭlaŭ, niama padstaŭ spyniać spravu. Razam z tym na pytańnie, kolki budzie doŭžycca śledstva, SK adkazać nie moža.
Zaraz śledstva čarhovym razam praciahnutaje da 24 červienia, paviedamiŭ pravaabaronca.
Vołčak padkreśliŭ, što paśla spynieńnia rasśledavańnia spravy śledstva abaviazanaje padać materyjały spravy dla aznajamleńnia siamji paciarpiełaha. «Kali heta adbudziecca, budzie viadomy chod śledstva, chto byŭ dapytany i ŭ jakaści kaho, ci byli padazronyja, jakija viersii praviaralisia, jak reahavali na našy chadajnictvy, jakich było pryblizna sorak. Ułady nie chočuć raskryvać svajo biaździejańnie. Heta nienarmalna: za 16 hadoŭ tolki na try miesiacy sprava prypyniałasia, a vyniku nijakaha niama», — zajaviŭ pravaabaronca.
Jon taksama zaznačyŭ, što ŭ chadajnictvie ŭtrymlivałasia prośba pierakvalifikavać spravu na artykuł 128 Kryminalnaha kodeksa (złačynstva suprać čałaviečnaści), jaki nie maje terminaŭ daŭniny, ale i ŭ hetym zajaŭnikam admovili.
«Zrazumieła, što pry ciapierašniaj uładzie sprava nie spynicca, budzie znachodzicca ŭ padviešanym stanie.
Jość skieptyki, jakija kažuć, što za hety čas usio zhubicca, źniščacca ŭsie dokazy złačynstva. Ale ja miarkuju, niama idealnych zabojstvaŭ, usie jany rana ci pozna raskryvajucca», — skazaŭ Vołčak, jaki ŭ svoj čas pracavaŭ śledčym.
***
Juryj Zacharanka ŭvachodziŭ u kamandu Alaksandra Łukašenki na vybarach pieršaha prezidenta Biełarusi i ŭ lipieni 1994 hoda, adrazu paśla vybrańnia Łukašenki, byŭ pryznačany na pasadu ministra ŭnutranych spraŭ. U kastryčniku 1995-ha Łukašenka adpraviŭ Zacharanku ŭ adstaŭku, a ŭ krasaviku taho ž hoda były ministr byŭ panižany ŭ zvańni da pałkoŭnika milicyi i zvolnieny z MUS nibyta za hrubyja finansavyja parušeńni i chiby ŭ pracy.
Chutka paśla hetaha Juryj Zacharanka pierajšoŭ na bok apazicyi. U lutym 1998 hoda jon uznačaliŭ kamitet pa biaśpiecy ŭ składzie cieniavoha ŭrada. Viasnoj 1999-ha były paplečnik Łukašenki braŭ aktyŭny ŭdzieł u arhanizavanaj apazicyjaj kampanii pa vybarach prezidenta, uvachodziŭ u kamandu byłoha premjer-ministra Michaiła Čyhira, jeździŭ pa krainie, arhanizoŭvaŭ hrupy pa zbory podpisaŭ.
Viečaram 7 maja 1999 hoda Zacharanka źnik pa darozie dadomu, u rajonie vulicy Mahiloŭskaj. Sprava pa fakcie jaho zabojstva była raspačataja 17 vieraśnia 1999 hoda na padstavie artykuła 101 KK (naŭmysnaje zabojstva), ale nie zavieršanaja dahetul. Rasśledavańnie akaličnaściaŭ źniknieńnia apalnaha hienierała znachodzicca na kantroli kamiteta AAN pa pravach čałavieka.
