Ciažka ŭspomnić sustrečy, kab naša zbornaja kamanda pa chakiei hulała ŭ adkryty, atakujučy chakiej z pradstaŭnikami «vialikaj šaściorki». Biełarusy niekali mieli pieramohi nad Rasijaj, Finlandyjaj, Šviecyjaj, ale heta byli hulni, dzie našy ceły matč hieraična abaranialisia, redka dumajučy pra ataku. Siońnia ž u matčy z ZŠA na čempijanacie śvietu ŭ Čechii našy prademanstravali zusim inšy chakiej.
Na kožny kidok amierykancaŭ my adkazvali svaim, na kožny vychad na bramu Kievina Łałanda byŭ praparcyjny adkaz. Karaciej kažučy, biełarusy zusim nie bajalisia aŭtarytetnych amierykancaŭ, jakija za paru dzion da taho pieramahli letašnich čempijonaŭ śvietu z Rasii.
Pieršy pieryjad prynios panyłyja nuli, chacia amierykancy byli i bližejšyja da taho, kab adkryć lik. Ale adnojčy samaachviarny abaronca Javienka vynies šajbu praktyčna z pustych varot.
Pałova druhoj treci taksama prachodziła biez šajb. I ciažka było ŭjavić, što ŭ vyniku hledačy pabačać takuju kolkaść halavych atak.
Biełarusy ŭdarna praviali piacichvilinku pamiž 31-aj i 36-aj, kali zmahli trojčy zasmucić ZŠA. Dźvie pieršyja šajby byli zakinutyja nibyta pad kapirku. Pieradačy sa svajoj pałovy placoŭki praz pravy bort i Haŭrus z Vołkavym vychodzili adzin na adzin z bramnikam – 2:0.
Treciaja šajba naradziłasia paśla taho, jak Alaksandr Kitaraŭ tolki-tolki vyjšaŭ z boksa štrafnikaŭ. I ataka prachodziła praz usio toj ža pravy fłanh.
U pačatku treciaha pieryjada biełarusy narešcie ŭpieršyniu na čempijanacie śvietu realizavali kolkasnuju bolšaść. Adznačyŭsia Alaksiej Kalužny, dakładniej byŭ aŭtahoł, ale samastreły ŭ chakiei, u adroźnieńnie ad futboła, nie ŭličvajucca. Apošniuju piatuju šajbu zakinuŭ znoŭ Alaksiej Kalužny.
Dobrym słovam znoŭ varta adznačyć Kievina Łałanda, jaki svajoj upeŭnienaj hulnioj u bramie natchniaŭ ataku i abaronu.
Na trybunach siońnia znoŭ było šmat bieł-čyrvona-biełych ściahoŭ. Heta pieršaja ŭ historyi pieramoha biełarusaŭ nad ZŠA.
Paśla čatyroch turaŭ zbornaja Biełarusi zajmaje ŭ hrupie pieršy radok, majučy na rachunku 10 punktaŭ!
Nastupnaja sustreča projdzie 9 maja suprać zbornaj Rasii. Pačatak a 13:15.
