Nacyjanalny bank ličyć nieabchodnym pierahledzieć umovy raźmiaščeńnia depazitaŭ nasielnictva. Adpaviednyja rekamiendacyi rehulatara niadaŭna atrymali kamiercyjnyja banki Biełarusi, jakija zajmajucca pryciahnieńniem układaŭ.
U rekamiendacyjach, jakija Nacbank pieradaŭ udzielnikam finansavaha rynku, havorycca ab nieabchodnaści «pierahledzieć padychody da farmiravańnia pracentnych stavak» pa ŭkładach «u zaležnaści ad terminaŭ raźmiaščeńnia».
U pryvatnaści, kamiercyjnym bankam Nacbank raić zabiaśpiečyć pryvabnyja ŭmovy pa doŭhaterminovych układach, u tym liku «šlacham ustanaŭleńnia bolš vysokaha ŭzroŭniu pracentnych stavak pa ich».
Poruč z hetym, pavodle infarmacyi BiełaPAN, Nacbank rekamienduje bankam «praduhledzieć značnaje źnižeńnie pracentnych stavak pa ŭkładach» u vypadku daterminovaha źniaćcia apošnich.
Biełaruskija ekanamisty tłumačać płany Nacbanka padaŭžać terminy raźmiaščeńnia ŭkładaŭ žadańniem pierałamać niehatyŭnuju tendencyju, jakaja za apošnija hady sfarmiravałasia na depazitnym rynku.
«Kali ŭ 2012—2014 hadach dachodnaść pa ŭkładach źnižałasia, pačynaŭsia adtok depazitaŭ, heta sparadžała rost stavak, i hety cykł paŭtaraŭsia niekalki razoŭ. Nacyjanalnaja valuta vystupała ŭ hety pieryjad nie jak srodak doŭhaterminovych źbieražeńniaŭ, a jak instrumient śpiekulacyj na rynku», — havoryć ekanamist Biełaruskaha ekanamičnaha daśledča-adukacyjnaha centra (BEROC) Dźmitryj Kruk.
Siońnia Nacbank sprabuje vyvieści krainu sa śpiekulatyŭnaj pastki i hetaja zadača «źjaŭlajecca miehaaktualnaj», ličyć ekanamist. Adnak, dadaje ekśpiert, zrabić rubiel srodkam doŭhaterminovych źbieražeńniaŭ za košt adnych tolki administracyjnych mier nie atrymajecca.
«Čamu za apošnija hady ŭ nas nazirałasia śpiekulatyŭnaja hulnia ź biełaruskim rublom? Sfarmiravalisia vysokija inflacyjnyja i devalvacyjnyja čakańni. Kali nasielnictva budzie čakać vysokuju inflacyju abo devalvacyju praz adzin abo try miesiacy, nijakija administracyjnyja rašeńni ŭ bok padaŭžeńnia terminaŭ układaŭ nie prymusiać nasielnictva zachoŭvać źbieražeńni ŭ rublach», — pierakanany Dźmitryj Kruk.
Ekśpierty finansavaha rynku ličać, što zrabić rubiel instrumientam doŭhaterminovych źbieražeńniaŭ možna budzie ŭ vypadku źnižeńnia inflacyi na doŭhim pramiežku času.
«Siońnia doŭhaterminovyja finansavyja płany nasielnictva buduje časta ŭ zamiežnaj valucie. Kab situacyja stała mianiacca, inflacyja pavinna być nižejšaj za 10% (a lepš — mienš za 5%) niekalki hadoŭ», — ličyć ekanamist Kaciaryna Barnukova.
Ciapier čytajuć
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu1
Kamientary