Dyrektar Instytutu transfarmacyi hramadztva (Kijeŭ) Aleh Soskin adkazaŭ na pytańni «Našaj Nivy» nakont hazavaha kanfliktu pamiž Ukrainaj i Rasiejaj.
Aleh Soskin, dyrektar Instytutu transfarmacyi hramadztva (Kijeŭ): Nia dumaju, što «Hazprom» pojdzie na taki krok. Chutčej za ŭsio praciahnucca pieramovy. Mahčyma za studzień my raźličymsia pa staroj canie, a ź lutaha pačniom płacić pa novaj. U vypadku, kali pasiarednik usio ž zastaniecca, novaja cana składzie niedzie $180. Kali Ukraina kančatkova admovicca da pasłuhaŭ pasiarednikaŭ, to płacić daviadziecca na $100 bolš, ale nie $314, jak kaža Rasieja.
Naša Niva: Dapuścim «Hazprom» usio‑tki spynić pastaŭki, što adbudziecca ŭ takim razie?
A.S.: Technična heta niemahčyma. Kudy ŭ takim razie Rasieja padzienie svoj haz? Ci maje jana hazaschoviščy takoha abjomu? U abchod Ukrainy hety haz nia pojdzie. Možna źmienšyć abjomy pastavak, ale Ŭkraina moža ŭ takim razie adbirać na svaje patreby nabyty ŭ Azii abjom hazu. Akramia taho, heta budzie skandał, jakoha Eŭropa jašče nie bačyła.
NN: Čamu dahetul niama supolnaj biełaruska‑ŭkrainskaj stratehii dačynieńniaŭ z rasiejskaj nafta‑hazavaj manapolijaj?
A.S.: Najpierš heta vina našaha kiraŭnictva. I Juščanki, i Janukoviča, jakija prosta pavinny byli damovicca z Alaksandram Łukašenkam. U ideale takuju stratehiju treba było zadziejničać ad samaha pačatku, kali našyja krainy atrymali ŭ vyniku raspadu SSSR niezaležnaść.
NN: Ci mahčymyja źmieny ŭ hetym kirunku ŭ karotkaj perspektyvie?
A.S.: Dumaju, što na heta zdolnaja naša premjer‑ministar Julija Cimašenka. Joj treba naviedacca ŭ Miensk z kamandaj razumnych ludziej. Stvaryŭšy supolny hazavy kansorcyjum, my zdolejem asłabić cisk manapolii, vystavić joj svaje patrabavańni i ŭmovy, pačynajučy z spraviadlivaha padvyšeńnia tranzytnaha taryfu. Prykład: voźmiem canu hazu — za apošni čas jana ŭzrasła z $40 za tysiaču kubametraŭ da $320. Adpaviedna taryf, jaki siońnia składaje $1,7, pavinien raŭniacca $9.
***
Aleh Soskin (nar. u 1954 h.). Skončyŭ ekanamičny fakultet Kijeŭskaha dziaržaŭnaha ŭniversytetu imia T. Šaŭčenki. Stažavaŭsia pry Niamieckaj akademii kiravańnia, Ekanamičnym instytucie Kałarada (ZŠA). Ad 1994 h. źjaŭlajecca dyrektaram Instytuta transfarmacyi hramadztva.
«Kałaŭra my nie pakryŭdzili»: stała viadoma pra novaje miesca pracy byłoha staršyni Nacbanka3
Kamientary