Va ŭsich abłaściach Biełarusi i Minsku buduć stvoranyja aŭtaharadki dla praktyčnaha navučańnia dziaciej praviłam darožnaha ruchu i adpracoŭki navykaŭ biaśpiečnych pavodzinaŭ na darozie, paviedamiła na pres-kanfierencyi 15 maja ŭ stalicy kaardynatar Dziciačaha fondu AAN (JUNISIEF) pa pytańniach zdaroŭja i raźvićcia dziaciej i padletkaŭ Viktoryja Łaziuk.
Pavodle jaje słoŭ, aŭtaharadki buduć stvoranyja ŭ miežach prajekta mižnarodnaj techničnaj dapamohi pa prafiłaktycy dziciačaha traŭmatyzmu, jaki realizujecca ŭ Biełarusi ŭ 2014—2016 hadach. Adnoj z metaŭ prajekta źjaŭlajecca źnižeńnie da 2017 hoda na 10% dziciačaj śmiarotnaści i dziciačaj invalidnaści ad źniešnich pryčyn.
U miežach prajekta taksama budzie raspracavany novy dyzajn kutkoŭ biaśpieki darožnaha ruchu, jakija, pavodle słoŭ Łaziuk, «buduć cikavyja i dla małodšaha, i dla siaredniaha školnaha ŭzrostu». Takija infarmacyjnyja stendy buduć ustalavanyja ŭ 250 ustanovach ahulnaj siaredniaj adukacyi pieravažna ŭ sielskaj miascovaści. Aprača taho, budzie raspracavanaja vonkavaja sacyjalnaja rekłama pa temie biaśpiečnych pavodzinaŭ dziaciej na darozie, sacyjalnyja videaroliki, buklety dla baćkoŭ.
Na bazie pierynatalnaha centra RNPC «Maci i dzicia» i abłasnych pierynatalnych centraŭ buduć dziejničać infarmacyjnyja navučalnyja centry dla baćkoŭ pa stvareńni biaśpiečnych umoŭ žyćcia dziciaci jak doma, tak i na vulicy i ŭ transparcie.
Dla pavyšeńnia navykaŭ i viedaŭ śpiecyjalistaŭ budzie stvorany respublikanski i šeść abłasnych kaardynacyjnych centraŭ, kaardynacyjny infarmacyjna-mietadyčny resursny centr na bazie RNPC traŭmatałohii i artapiedyi, buduć raspracavanyja dva vidy mietadyčnych rekamiendacyj: dla supracoŭnikaŭ upraŭleńniaŭ i padraździaleńniaŭ UDAI MUS — pa pracy va ŭstanovach adukacyi pa prafiłaktycy dziciačaha darožnaha traŭmatyzmu, dla piedahohaŭ — pa arhanizacyi adukacyjnych i vychavaŭča-prafiłaktyčnych mierapryjemstvaŭ dla dziaciej starejšaha daškolnaha ŭzrostu i vučniaŭ ahulnaadukacyjnych ustanoŭ pa biaśpiečnych pavodzinach na darozie i ŭ transparcie.
